Kənd Təsərrüfatı Nazirliyi tərəfindən təşkil edilən “Kənddən şəhərə” yarmarkalar davam edir. Həftəsonu keçirilən yarmarkalarda təqdim edilən məhsullar ucuzluğu ilə fərqlənsə də, bu imkandan hər kəs yararlana bilmir. Səbəb isə yarmarkaların yalnız şənbə və bazar günləri keçirilməsidir.
Sözügedən yarmarkalarda qiymətlər bazara baxanda münasibdir, amma bunun şənbə və bazar günləri keçirilməsi problem yaradır. Həmin günlər marşrut işləmədiyi üçün aztəminatlı əhalinin çoxu bundan faydalana bilmir. Yalnız evi yaxın olanlar gedə bilir. Eyni zamanda, kimin şəxsi maşını varsa, o bundan istifadə edir. İctimai nəqliyyatın işləməməsi bu imkandan hamının faydalanmasına şərait yaratmır. Nəzərə almaq lazımdır ki, Novruz bayramı ərəfəsində bir sıra kənd təsərrüfatı məhsullarına tələbat artır. Həmin yarmarkalara getmək istəyənlər ya şəxsi maşını ilə getməlidir, ya da taksi ilə. Bu da baha başa gəlir. Söhbət taksi ilə gedib-gələnlərdən gedir.
Olmaz ki, bu yarmarkalar həftəsonu deyil, digər günlər keçirilsin? Yaxud da sözügedən yarmarkalar yalnız 3 yerdə yox, paytaxtın bütün rayonlarında təşkil edilsin?
Məsələ ilə əlaqədar Kənd Təsərrüfatı Nazirliyinin mövqeyini öyrənmək istəsək də, bu mümkün olmadı.
“Ya bu, ictimai nəqliyyatın işlədiyi günlər təşkil olunmalı, ya da onun dislokasiyası genişləndirilməlidir”
Sözügedən məsələ ilə bağlı fikirlərini “Bakı-Xəbər”lə bölüşən Azad İstehlakçılar Birliyinin sədri Eyyub Hüseynov hesab edir ki, pandemiya şəraitində yarmarkaların yalnız bir neçə ünvanda keçirilməsi doğru deyil: “Bu, istehlakçıların normal əlçatanlığını aşağı salır. Hər həftə bununla bağlı AİB-ə çoxsaylı şikayət və telefon zəngi daxil olur. Ona görə də bu məsələ həll olunmalıdır. Ya bu yarmarkalar ictimai nəqliyyatın işlədiyi günlər təşkil olunmalı, ya da yarmarkaların dislokasiyası genişləndirilməlidir. Yəni Bakının bütün rayonlarını əhatə etməlidir. Yalnız o halda bu yarmarkaların effekti böyük olacaq və daha çox istehlakçının bundan faydalanmaq imkanı yaranacaq. İndiki halda istehlakçılar narazıdırlar. Çünki hamının şəxsi maşını yoxdur getsin yarmarkaya. Müşahidələr göstərir ki, həftəsonu ictimai nəqliyyatın işləməməsi yarmarkalardakı satıcıları da zərərə salır. Alıcının az olması məhsulun realizə olunmasına mənfi təsir edir. Nəticədə dövlətin apardığı sosialyönümlü iş mahiyyətini itirir. Ona görə də sözügedən məsələlər həllini tapmalıdır. Yoxsa, belə gedərsə, fermerlər və satıcılar “Kənddən şəhərə” yarmarkasında iştirakdan imtina edəcəklər. İnzibati yollarla bunu uzatmaq mümkün olmayacaq”.
AİB sədri onu da qeyd etdi ki, bütün bu amillər nəzərə alınmalıdır.
Vidadi ORDAHALLI
