İmişli rayonunun Bədirəvan kənd sakinlərindən bir qrupu KIV-lərə şikayətlə müraciət ediblər. Hətta etiraz əlaməti olaraq iki gün əvvəl kəndin ərazisindən keçən magistral yolu da bağlayıblar. Sakinlərin etirazına səbəb Araz çayının sahilindəki qum-çınqıl yatağını iddialara görə qanunsuz istismar edən "AZE" MMC-nin fəaliyyətidir.
Kənd sakinlərinin sözlərinə görə, dəfələrlə aidiyyəti instansiyalara şikayətlər etsələr də, onların dərdinə əlac tapılmayıb: “Bizim şikayətimizə baxan yoxdur. “AZE” MMC-nin onlarla iri tonnajlı yük maşınları kəndimizdən keçən Araz çayının sahilindəki qum-çınqıl yatağını qanunsuz istismar edirlər və normadan artıq yük götürüldüyündən kəndimizin asfalt yolunu darmadağın ediblər. Əslən Sabirabaddan olan Kamran Yəhyayev özünün qohumlarını burada işə cəlb edib, amma kəndimizdən bir nəfəri belə işə götürmür. Amma kəndin yollarını dağıtdırıb, çayın sahilinin bəndlərini təhlükəyə atıb, yay aylarında isə əkin sahələrimiz toz-torpağa batırılır, yollarımız viran qoyulur. Günlük dövriyyəsi 60-70 min manat olan bu MMC-də çalışan işçilər müqaviləsiz işləyir. Bütün bu qanunsuz əməllərlə təbiətə vurulan ziyanın qarşısının alınması üçün magistral yolu kəsdik, yük avtomobillərini karxanaya buraxmadıq. İri texnikaların, yük maşınlarının səs-küyündən evimizdə də otura bilmirik... Bir daha xahiş edirik, səsimizi Baş Prokuror Kamran Əliyevə çatdırın. Təbii sərvətlərin qanunsuz istismarına görə, MMC-yə cinayət işi başlanılsın...".
İradə İbrahimova: “Nazirlik rəsmisi Samir Qurbanov İmişlidəki vəziyyətlə bağlı ətraflı məlumat verəcək”
Məsələ ilə bağlı Ekologiya və Təbii Sərvətlər Nazirliyinin mətbuat katibi İradə İbrahimova “Bakı-Xəbər”ə açıqlamasında bildirdi ki, bu məsələdən məlumatlıdırlar: “Son vaxtlar müxtəlif karxanalarla bağlı bizə şikayətlər daxil olur. İmişlidə yaranan vəziyyətlə bağlı da məlumatlıyıq. Həftədə bir dəfə bizim idarə, department rəhbərləri nazirliyin rəsmi “Feysbuk” səhifəsi üzərindən canlı yayıma çıxırlar. Orada vətəndaşları və jurnalistləri maraqlandıran sualları cavablandırırlar. Budəfəki qonağımız Dövlət Mineral Xammal Ehtiyatlarından İstifadə Agentliyinin rəhbəri Samir Qurbanov olacaq. Biz onu məlumatlandırmışıq. İmişlidəki vəziyyətlə bağlı ətraflı məlumat verəcək”.
Mehman Muradlı: “Bu MMC-nin arxasında hansısa məmurlar durursa, onlarla da bağlı lazımi ölçü götürülməlidir”
Hüquqşunas Mehman Muradlı isə qəzetimizə açıqlamasında bildirdi ki, artıq bu məslə ictimailəşir və həmin MMC ilə bağlı ciddi hüquqi ölçülər götürülməlidir: “Edilən şikayətdəki mətləblər öz təsdiqini taparsa, MMC-yə bir neçə maddə ilə cinayət işi açıla bilər. Çünki orada söhbət təbii sərvətlərin qanunsuz istismarı, əmək müqaviləsinə riayət olunamamsı və yol infrastrukturuna vurulan ziyandan gedir. Bu MMC-nin arxasında hansısa məmurlar durursa, onlarla da bağlı lazımi ölçü götürülməlidir. KİV-də dərc edilən material cinayət işinin başlanılması üçün tam əsas ola bilər. Düşünürəm ki, sözügedən MMC-ilə bağlı ciddi hüquqi araşdırmalar başlayacaq”.
Məhəmmədəli QƏRİBLİ
