İcbari Tibbi Sığorta üzrə Dövlət Agentliyi (Agentlik) tərəfindən “COVID-19 vaksin randevu” adlı yeni elektron xidmət istifadəyə verilib. Elektron xidmətin yaradılmasında məqsəd tibb müəssisələrinin potensialına görə müraciətləri bölüşdürmək və insan axınını səmərəli idarə etməkdir. Eyni zamanda, onlayn növbə xidməti vətəndaşların vaxtına qənaət etməyə imkan yaradır, belə ki, onların bilavasitə peyvənd məntəqələrində gözləmə növbəsində sərf edəcəkləri vaxt minimuma enir.
Qaydalara uyğun olaraq, 1-ci mərhələdə yaşı 65 və yuxarı olan şəxslərin sözügedən elektron xidmətdən istifadəsi nəzərdə tutulub. Belə ki, xidmətdən yararlanmaq üçün vətəndaşlar https://randevu.its.gov.az/ saytına daxil olub, “COVID-19 vaksin randevu” xidmətini seçməlidirlər. Daha sonra açılan pəncərədə onlayn növbə tutmaq üçün vətəndaş qaydaya uyğun olaraq qeydiyyatdan keçməlidir. Əksər şəxs qeyd olunan saytdan onlayn növbə götürərək peyvənd olunur. Belə olan halda, insanlar xəstəxanada sıxlıqla qarşılaşmır.
Ancaq Xırdalanda qeyd olunanın əski yaşanır. Belə ki, Xırdalan şəhərində 5 saylı orta məktəbdə həyata keçirilən vaksinasiya prosesi zamanı karantin qaydalarının pozulması ilə bağlı məlumatlar yayılıb. Əvvəlcədən növbə götürülsə də, proses lazımi şəkildə tənzimlənmədiyindən, xəstəxananın dəhlizində izdiham yaranıb.
“Bütün günü reklam olunan randevu.its.gov.az saytında valideynlərim üçün saat 11.00-a vaxt götürdüm, gəlmişik, azı 200 nəfər var”
İqtisadçı-ekspert Samir Əliyev qeyd etdi ki, o https://randevu.its.gov.az/ saytına daxil olub, valideynləri üçün onlayn növbə götürüb: “Xəstəxananın dəhlizi başdan-ayağa yoluxma mənbəyidir, müraciət edən insanların hamısı da yoluxmağa həssas insanlardır. Bütün günü reklam olunan randevu.its.gov.az saytında valideynlərim üçün saat 11.00-a vaxt götürdüm. Gəlmişik, azı 200 nəfər var. 50 nəfər keçib, bizə 221-222-ci sıra verilib. Soruşuram mənim vaxtım 11.00-dır, niyə mənə yeni nömrə verirsən? Mənə camaatı göstərib deyir ki, bunlar da növbə gözləyir, bu qədər camaatı tapdayıb keçmək istəyirsən? İzah edə bilmirəm ki, mən növbə tutmuşam, heç kimin növbəsinə girmək fikrim yoxdur. TƏBİB deyir ki, vaxtı seçib növbə gözləmədən vaksin vurdur. Ancaq təcrübə göstərir ki, onlayn növbə boş şeydir, işləmir”.
Qeyd edək ki, Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyi bu məsələ ilə bağlı birgə məlumat yayıblar: “Bildirilir ki, “Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası”na uyğun olaraq, hazırda 50 yaş və daha yuxarı şəxslərin COVID-19 xəstəliyinə qarşı vaksinasiyası həyata keçirilir. Sözügedən şəxslər https://randevu.its.gov.az/ saytına daxil olaraq, “COVID-19 vaksin randevu” elektron xidmətindən istifadə etməklə koronavirus xəstəliyi əleyhinə vaksinasiya üçün onlayn qaydada növbə götürməlidirlər. Lakin bəzi vətəndaşlar koronavirus xəstəliyi əleyhinə vaksinasiya üçün onlayn növbə götürmədən birbaşa olaraq tibb müəssisəsinə müraciət edirlər. Bu da təbii olaraq, tibb müəssisələrində sıxlığa səbəb olur. Tibb müəssisələrinin əməkdaşları növbədənkənar müraciət edən yaşlı nəslin nümayəndələrini hörmət əlaməti olaraq geri qaytarmamaq üçün onlara da xidmət göstərməli olurlar.
Peyvənd məntəqələrində sıxlığın yaranmasına digər bir səbəb onlayn növbə xidmətindən istifadə edən bəzi şəxslərin qeyd olunan randevu vaxtından tez və ya gec müəssisəyə gəlməsi olur”.
Günel CƏLİLOVA
