Hər bir avtomobil sahibi avtomobilinə qulluq üçün mütləq avtoservis seçməlidir. Çünki avtomobil nə qədər təzə olsa da, bəlli bir müddətdən sonra və yaxud da müəyyən hallarda servisə müraciət etmək zərurətə çevrilir. Bu avtoservislər rəsmi və ya qeyri-rəsmi ola bilər.
Ən yaxşı servislər konkret olaraq bir marka üzrə ixtrisaslaşırlar və ya yalnız sürət qutusu ilə məşğul olan servislər də var. Onlar sizin üçün mühərrik yağı dəyişməyəcəklər. Elə servis var ki, onlar yalnız alman avtomobilləri ilə məşğul olurlar. Bütün markalara və bütün xidmətləri göstərən servislərdə ehtiyatlı olmaq lazımdır. Çünki bir sıra hallarda onlar müştəriləri aldadırlar. Məlum olur ki, həmin servislərdə heç də bütün markadan olan avtomobilləri təmir etmək mümkün deyil.
O da məlumdur ki, paytaxtda çoxsaylı avtoservis fəaliyyət göstərir. Ancaq onların fəaliyyətindən müştərilər razı deyil. Problem ondadır ki, Bakıda fəaliyyət göstərən avtoservislərin əksəriyyətində müştəriyə kassa çeki verilmir. Müxtəlif bəhanələrlə avtoservislər çek verməkdən yayınırlar. Bununla yanaşı, sifarişçi ilə xidmət göstərən tərəf arasında heç bir müqavilə bağlanmır. Nəticədə bu, avtomobil sahiblərinə sonradan müxtəlif ciddi problemlər yaradanda avtoservis heç bir cavabdehlik daşımır. Məsələn, görürsən ki, servisdən təzə çıxan avtomobil alışıb yanır, amma müqavilə olmadığına görə avtoservis heç bir ödəniş etmir.
Bütün bunların fonunda, avtoservislərin müştərilərə kassa çeki verməməsi və onlarla müqavilə bağlamaması nə dərəcədə doğrudur?
“...hansısa texniki problemlə üzləşdikdə yenə yük onların üzərinə düşür”
Məsələyə münasibət bildirən ekspert İlqar Hüseynlinin sözlərinə görə, avtoservislərin bütün bunlardan yayınması qanunun və müştərilərin hüquqlarının pozulmasıdır: “Bütün xidmət sahələri, o cümlədən, avtoservislər müştərilərə göstərdikləri xidmətə görə çek verməlidirlər. Bunu etmirlərsə, deməli, qanunu pozurlar. Bəzi xidmət sahələri var ki, orada işçi sayına və kvadrata görə kassa-nəzarət aparatı nəzərdə tutulmur. Ancaq bu, konkret avtoservislərə aid deyil. Ona görə də sözügedən servislər müştərilərə çek təqdim etməlidirlər. VÖEN-lə fəaliyyət göstərən istər fiziki, istərsə də hüquqi şəxslər çek təqdim etməlidirlər. Nəzərə almaq lazımdır ki, avtoservislərdə çoxsaylı işçi çalışır. Ona görə də mütləqdir ki, orada kassa-nəzarət aparatı quraşdırılsın. Kassa aparatı quraşdırmağına quraşdırırlar, amma görüntü üçün. Həmçinin, xidmət göstərən avtoservislə müştəri arasında müqavilə imzalanmalıdır. Müqavilə sənədi, bir növ, zəmanət rolunda çıxış edir. Təəssüf doğuran hal odur ki, avtoservislər bilərəkdən bundan yayınırlar. Nəticədə avtomobil sahibləri hansısa texniki problemlə üzləşdikdə yenə yük onların üzərinə düşür. Bu məsələdə problem yaradan digər məqam ondan ibarətdir ki, müştərilər bir sıra hallarda avtoservislərlə müqavilə bağlamaqda maraqlı olmurlar. Məsələnin bu tərəfi də var. Yəni vətəndaş özü çeki almaqda, müqavilə bağlamaqda maraqlı olmalıdır. Hansı ki, bütün bunlar çox vacibdir”.
Ekspert onu da qeyd etdi ki, çek verməyən və müştəri ilə xidmətə görə müqavilə bağlamayan avtoservislər böyük məbləğdə cərimə olunmalıdırlar.
Vidadi ORDAHALLI
