Beynəlxalq Bank 1-ci qrup əlilin ikiaylıq pensiyasının karta oturmasını əngəlləyib, üstəlik, anlaqsız müştərinin şəxsən banka gəlməsini tələb edir...

Şəmsəddin Əliyev: “Beynəlxalq Bankın 1-ci qrup əlil olan vətəndaşın müraciətinə göstərdiyi bu münasibət, sərgilədiyi hərəkət bürokratizmdir, qeyri-humanistliyin nümunəsidir”

img

Redaksiyamıza 1-ci qrup əlil, təqaüdçü Bakı şəhər sakini olan bir nəfər vətəndaş müraciət edib. O, üzləşdiyi problemin həllinə kömək etməyimizi istədi. Vətəndaşın bildirdiyinə görə, yanvar və fevral ayları üzrə pensiyası Dövlət Sosial Müdafiə Fondu tərəfindən köçülsə də, Beynəlxalq Bank tərəfindən ona verilən pensiya kartında problem yarandığı üçün o, iki aydır ki, pensiyasını ala bilmir.

Vətəndaş hələ yanvar və fevral ayının pensiyasını almayıb.  Vətəndaşın ailə üzvləri onun üzləşdiyi problemin səbəbini öyrənmək və həllinə nail olmaq üçün Beynəlxalq Bankın qısa nömrəsinə zəng ediblər, lakin onların banka ünvanladıqları müraciətə bank əməkdaşları telefon vasitəsilə cavab verməkdən imtina edərək tələb edirlər ki, 1-ci qrup əlil özü banka gəlsin. Birinci qrup əlil olan vətəndaş isə insult keçirib, hərəkətləri məhduddur, yeriyə bilmir, anlaqsız vəziyyətdədir. Hərəkət məhdudiyyəti olan, üstəlik də anlaqsız olan vətəndaş banka necə gedə bilər? Vətəndaşın pensiya kartı niyə bloklanıb, nə üçün DSMF-nin köçürdüyü vəsait karta oturmayıb, hansı səbəbən bu cür vətəndaşın banka gəlməsi tələb olunur və ona telefonda heç bir informasiya verilmir?

  • “Əlilliyi olan vətəndaşın banka dəvət edilməsi yolverilməzdir, onun müraciətinə telefon vasitəsilə cavab verilməlidir”

“Polisə Dəstək” İctimai Birliyinin rəhbəri,  hüquqşünas Şəmsəddin Əliyev baki-xeber.com-a açıqlamasında bildirdi ki, Beynəlxalq Bankın 1-ci qrup əlil olan vətəndaşın probleminə belə bürokratik münasibət göstərməsi yolverilməzdir. Ş.Əliyev hesab edir ki, bu həm hüquqi, həm də mənəvi baxımdan doğru deyil. “Əvvəla mən çox təəssüflənirəm və məyus oluram ki, 44 günlük Vətən müharibəsindən sonra bizim bəzi məmurlarımız, eləcə də bank sektoru əməkdaşları vətəndaşların qayğı və problemlərinə, üzləşdikləri çətinliklərə humanizm prinsipi ilə yanaşmırlar. Bankların vətəndaşların müraciətlərinə biganə yanaşması da faktdır, bu da məni çox narahat edir. Banklar əlilliyi olan insanlara həssas yanaşmalıdırlar. Baxırsan ki, vətəndaş birinci qrup əlildir, hərəkətləri məhduddur, işləmək, gəlib-getmək imkanları yoxdur, onun bir ünvandan başqa ünvana getməsi üçün başqa bir adamın yardımına ehtiyacı var. Beynəlxalq Bankın 1-ci qrup əlil olan vətəndaşın müraciətinə göstərdiyi bu münasibət, sərgilədiyi hərəkət bürokratizmdir, qeyri-humanistliyin nümunəsidir. Yeriyə bilməyən, fikrini tam çatdırmaqda çətinlik çəkən, başqasının yardımı olmadan yerindən tərpənə bilməyən vətəndaşın banka dəvət olunması yolverilməzdir. Ölkə Prezidentinin bütün kateqoriyadan olan vətəndaşlara nümunəvi yanaşmasından Beynəlxalq Bank bir örnək götürməlidir. Vətəndaş gələ bilmirsə, bank işçiləri vətəndaşın evinə gedə bilər. Bu tamamilə qanunauyğundur. Bankın məsul işçiləri notariusu götürüb həmin vətəndaşın evinə getməli idilər və onun adından qohumuna, bacı, qardaşına, həyat yoldaşına etibarnamə verməklə bu əməliyyatı apara bilərdilər. Eyni zamanda, Beynəlxalq Bank müştərinin şəxsiyyətini müəyyən etmək üçün yenə özünün iki-üç nümayəndəsini onun yaşadığı ünvana göndərə və yerindəcə məsələni çözə bilərdi.  Hərəkəti məhdud olan 1-ci qrup əlilin Beynəlxalq Banka aparılması bürokratiklik və süründürməçilikdir. Bu özü də korrupsiya əlamətləridir. Yəni bu bank tərəfindən vətəndaşın sosial təminat hüququna əngəl yaradılmasının açıq nümunəsidir. Belə yanaşmaq, ümumiyyətlə, vətənpərvərlik ruhuna zərbə vurmaq deməkdir”.

Ş.Əliyevin sözlərinə görə, Beynəlxalq Bankın bu davranışı, əlil vətəndaşa qarşı bürokratizmi insanda ikrah hissi doğurur. “Mən çox təəssüf edirəm ki, Beynəlxalq Bankın o böyük və nüfuzlu kollektivinin sırasında bürokratik insanlar da var. Mən belə düşünürəm ki, Beynəlxalq Bankın rəhbərliyinin bu hallardan xəbəri yoxdur.

Bank işçiləri o incəliyi qəbul etmək istəmirlər. Onların bu hərəkəti tamamilə mənfi bir haldır. Beynəlxalq Bank vətəndaşın müraciətlərinə telefon vasitəsilə cavab verməyə borcludur. Ən azından, indiki pandemiya şəraitində müştərinin, özü də əlilliyi olan vətəndaşın banka dəvət edilməsi yolverilməzdir, onun müraciətinə telefon vasitəsilə cavab verilməlidir. Bu gün bütün əməliyyatlar onlayn qaydada aparılır, suallara telefon vasitəsilə cavab verilir. Bank əməkdaşları telefonla məsləhət verməli və vətəndaşı narahat edən suallara aydınlıq gətirməli, insanlara diqqətlə yanaşmalıdırlar. Bu özü də vətəndaşların sorğu və müraciətlərinə münasibətin nəticəsidir. Bununla bağlı qanun var. Belə yanaşmaq, təbii ki, olmaz” - deyə Ş.Əliyev qeyd etdi.    

İradə SARIYEVA

Son xəbərlər