Şamaxıda yerləşən "Sakit göl" otelində nahar etmək istəyənlər mütləq otel işçilərinə nikah şəhadətnaməsini təqdim etməlidirlər. Əks halda, qeyd olunan məkanda nahar etmək mümkün deyil. Bu barədə sosial şəbəkə istifadəçiləri öz narazılıqlarını qeyd ediblər.
Bildirilir ki, oteldə nahar üçün rezervasiya etmək istəyən şəxslər evli olmalı və həm də nikah haqqında şəhadətnamələrini özləri ilə gəzdirməlidirlər. Əks halda, otel rəhbərliyi restorandan istifadəyə məhdudiyyət qoyur.
Onu da qeyd edək ki, bu qayda tək restoranın xidmətində deyil, eyni zamanda, oteldə gecələmək istəyənlərə də şamil olunur.
Apardığımız araşdırma zamanı məlum oldu ki, tək “Sakit göl” oteli deyil, "Askar" (Bakı),"Ramada Otel" (Bakı), "Alp İnn" (Bakı),"Arena" (Bakı), "Bosfor" (Bakı), "Ariva" (Bakı), "Excelsior Otel" (Bakı), "Atropat" (Bakı), "Araz Otel" (Bakı), "Qafqaz Park" (Bakı), "Admiral" (Bakl), "Qubek Otel"(Balakən), "Deluxe Otel" ( Gəncə), "Naftalan Otel by Rixos" (Naftalan) müştərilərdən nikah şəhadətnaməsi tələb edirlər.
"Sakit göl" oteli - Ceyhun Dadaşov: “Oteldə gecələmək istəyənlərdən nikah şəhadətnaməsi tələb olunur”
Məsələ ilə bağlı "Sakit göl" otelinin meneceri Ceyhun Dadaşov bildirdi ki, sosial şəbəkədə yayılmış məlumat həqiqəti əks etdirmir: “Otelin restoranı qonaqları qəbul edir və buna görə heç kimdən nikah haqqında şəhadətnamə tələb olunmur. Bu məlumat həqiqətə uyğun deyil. Ancaq oteldə gecələmək istəyənlərdən isə nikah şəhadətnaməsi tələb olunur”.
Elçin Rüstəm: “Otellərin nikah kağızı tələb etməsi qanuna ziddir”
Turizm sahəsi üzrə ekspert Elçin Rüstəm bildirdi ki, otellərin nikah kağızı tələb etməsi qanuna ziddir. Çünki şəxsiyyəti təsdiq edən sənəd təqdim edildiyi halda, otel müştərini qəbul etməlidir: “Otel şəxsiyyət vəsiqəsini qəbul etmirsə, ilk növbədə, Azərbaycan vətəndaşına qarşı və ölkə tərəfindən tanınan şəxsiyyət vəsiqəsinə hörmətsizlik edir.
Onu da qeyd edim ki, qanunvericilikdə istirahət mərkəzləri, otellərə daxil olan zaman nikah şəhadətnaməsinin tələb edilməsi qeyd edilməyib. Sadəcə, otel rəhbərləri insan alverinə qarşı mübarizə üçün bu addımı atırlar ki, insanlarda məsuliyyət artsın. Aydın məsələdir ki, rəsmi nikah yoxdursa, cütlüklər hansı məqsədlə oteldə bir nömrədə qalır. Amma qanunvericilikdə belə bir qadağa yoxdur”.
Ekspert onu da vurğuladı ki, nikah sənədinin tələb olunması əxlaqsızlığa qarşı mübarizədə çıxış yolu deyil: "Əslində, bu, insanların əxlaqsızlığa görə daha çox pul xərcləməsinə şərait yaradacaq. Qadağalar sui-istifadə hallarının çoxalmasına səbəb olur. Tutaq ki, 22 yaşlı bir gənc öz yaşıdı olan bir xanımla istirahətə getmək istəyir. Onlar bir-birlərini sevirlər. Müəyyən müddətdən sonra evlənməyi planlayıblar. Onlara görüşməyi necə qadağan etmək olar? Belə yanaşılsa, onda istənilən intim münasibət qadağan olunmalıdır”.
Günel CƏLİLOVA
