Uzun illərdir Bakıətrafı kəndlərdə sərnişindaşıma məsələsi ilə bağlı müxtəlif problemlər mövcuddur. Təəssüf ki, sakinlərin narazılığına baxmayaraq, hələ də bu çətinlik tam olaraq aradan qaldırılmayıb.
Düzdür, ötən illər ərzində avtobuslar yenilənib və köhnə nəqliyyat vasitələri xəttdən çıxarılıb. Ancaq sürücülərlə bağlı intizam problemi qalmaqdadır. Bakıda avtobus sürücüləri ilə bağlı nə qədər sərt addımlar atılsa da, yenə də sürücülərin özbaşınalığına rast gəlmək mümkündür. Bu sahədə son illər bəzi problemlər öz həllini tapsa da, hələ də müəyyən çətinliklər qalmaqdadır.
Problem ondadır ki, axşam saatlarında sürücülər hərəkət intervalına əməl etmirlər. Necə deyərlər, bununla bağlı dərəbəylikdir. Çünki Bakıətrafı kənd və qəsəbələrə işləyən avtobuslar axşam saat 8-dən sonra qrafiki əməllicə pozurlar. Problem ondadır ki, belədə avtobuslar 5 dəqiqə dayanacaqda qaldıqları halda, 8-dən sonra yarım saatdan başlayıb 1 saata qədr dayanacaqda qalırlar. Sürücünün haçan kefi istəyirsə, o zaman tərpənir. Sərnişinlər buna etiraz etsələr də, nə sürücü, nə də dispetçer bunu vecinə alır. Dispetçerlə sürücü sövdələşərək sərnişinlərə problem yaradırlar.
Sözügedən məsələ ilə bağlı Bakı Nəqliyyat Agentlyindən münasibət öyrənməyə çalışsaq da, bu mümkün olmadı.
“Sürücülər yanacağa qənaət etməkdən ötrü məqsədli şəkildə avtobusun dayanacaqdan çıxışını yubadırlar və nəticədə bunun əziyyətini sərnişinlər çəkirlər”
Məsələyə münasibət bildirən ekspert Rəsul Cahangirli sürücülərin bu özbaşınalığını müxtəlif səbəblərlə əlaqələndirdi: “Başlıca problem onunla bağlıdır ki, Bakı kəndlərinə işləyən avtobuslar kart sisteminə keçməyib. Kart sistemi olsa, bu kimi özbaşınalıqlar o dərəcədə baş verməz. Digər problem onunla bağlıdır ki, şəhərin mərkəzinə işləyən marşrutların hərəkət intervalına olan nəzarət kəndlərə işləyən avtobuslara münasibətdə ya yoxdur, ya da çox aşağı səviyyədədir. Bakıətrafı kəndlərə daşımalarla məşğul olan şirkətlər ancaq gəlir güdürlər. Onlar üçün sərnişinlərə yüksək səviyyəli xidmət ön sırada durmur. Bunun nəticəsidir ki, sərt qışda avtobusların bir çoxunda peçlər nasaz işləyir. Necə gəldi avtobusu sərnişinlə doldururlar. Halbuki, bu, koronavirusun yayılma risqini artırır. Sərnişinlər arasında ara məsafəni saxlamaq, ümumiyyətlə, mümkün olmur. Onu da nəzərə almaq lazımdır ki, pandemiya ilə əlaqədar olaraq metro işləmədiyi üçün bütün yük avtobus nəqliyyatının üzərinə düşür. Başqa bir problem ondadır ki, nəqliyyat daşımaları ilə məşğul olan sahibkarlar gündəlik olaraq sürücülərin üzərinə çox plan qoyurlar. Sürücü bilmir planın dərdini çəksin, yoxsa özünə pul qazansın. Bu səbəbdən sürücülər yanacağa qənaət etsinlər deyə, məqsədli şəkildə avtobusun dayanacaqdan çıxışını yubadırlar. Nəticədə bunun əziyyətini sərnişinlər çəkirlər. İşdən yorğun qayıdan sərnişin vaxtında evə çata bilmir, əsəb, stress və s. Təəssüflər olsun ki, Bakı kəndləri nəqliyyat sarıdan bu cür çətinliklərlə üzləşirlər”.
Ekspert hesab edir ki, bütün bu problemlər kompleks şəkildə təhlil olunub tədbirlər görülməsə, sürücülərin bu özbaşınalığı davam edəcək.
Vidadi ORDAHALLI
