Şəhadət yolu…

img

Deyirlər, hər kəsin alın yazısı fərqli olur. Ancaq mən şəhidlərin alın yazılarının bənzər olduğuna çox şahid olmuşam. Hər yazdığım şəhid həyatının izinə öncə yazdığım şəhid həyatlarında mütləq rast gəlmişəm. Ömürləri, nakam arzuları, sevgiləri, yaşadıqları və yaşamadıqları bənzərdi şəhidlərin. Hər biri vətən qəhrəmanı, hər biri vətən daşıdır.

Vətənin qəhrəman şəhidlərindən biri də Məmmədov Əli Abbas oğludu. Əli 1987-ci ildə dekabrın 4-də dünyaya gəlib. Hər zaman qəhrəmanları ilə seçilən Naxçıvan illər sonra daha bir qəhrəmanı ilə qürur duyacağından xəbərsiz idi. Şərur rayonunun Maxtak kəndində Abbas və Seyran Məmmədovların ocağında dünyaya gəlib. Əlinin özündən başqa 2 bacısı və 1 qardaşı da var idi. O, 2003-cü ildə Sədərək rayon tam orta məktəbində təhsil almağa başlayıb. Məktəbi bitirdikdən sonra əsl Azərbaycan oğlu kimi vətən keşiyini çəkməyə gedib. 2016-2017-ci illərdə hərbi xidmətdə olub. Vətən borcunu qaytarıb geri gəldikdən sonra qardaş ölkə Türkiyəyə gedib. Uşaqlıqdan idmana böyük həvəsi olan Əli Türkiyədə idmanın MMA ( qaydasız döyüş) növü ilə məşğul olub. Daha sonra vətənə dönüb. Vətənə döndükdən sonra 2020-ci il yanvarın 13-ü Naxçıvanda müddətdən artıq hərbi qulluqçu kimi Xüsusi Təyinatlı Qüvvələrin (XTQ) sırasına qoşulub.

Əli yeni ailə quran şəhidlərimizdən biridi. Onların da sevgisi makam qaldı. Bir il nişanlı qalan cütlük 2020-ci il avqustun 15-də ailə həyatı qurub. Hər zaman şükür etməyi bacaran Əlinin arzularından biri də ata olmaq imiş. Ancaq onun bənzərsiz bir arzusu var imiş. Hər namazda özünə şəhidlik diləyərmiş. Şəhidimizlə ömrünün cəmi 2 ayını birlikdə keçirən, ancaq bir ömür boyu unutmayacağı sevinci, sevgini yaşayan Təhminə xanım şəhidimizin son vidasını göz yaşları içində danışdı.

- Oktyabrın 10-u Əli evə gəldi. Mənə dedi hazırlaş çıxaq gəzək. Birlikdə çıxdıq. O son gəzintinin hər anı şəkillərdə həkk olundu. Sanki bilirmiş kimi hər anı ölümsüzləşdirdi. Evə gəldikdə isə birlikdə namaz qıldıq. Səhər saat 7-də onunla vidalaşdım. Hərbi salamla yola saldım, dedim gələndə də hərbi salamla qarşılayacam. Mən Əli şəhid olandan sonra o günün vida günü olduğunu anladım. Əli heç kimə heç nə demədən oktyabrın 11-i Vətən müharibəsinin mübariz döyüşçüləri sırasına qoşulub. Füzuli, Qubadlı, Zəngilan uğrunda gedən döyüşlərdə iştirak edib. Gedəndən 1 həftə sonra mənə zəng etdi. Eşitmək istədiyi müjdəni ona yetirdim. Həmin an ağladığını hiss etdim. "Gələcəm, nə səni, nə də balamı tək qoymayacam". Gedəndə 2 həftəyə dönəcəyini demişdi. Sözünü tutdu, 2 həftəyə döndü. Ancaq al bayraqlı tabutda. Əlinin ürəyi oktyabrın 23-də düşmənin atəşinə tuş gəlib. Şəhid olmamışdan öncə dostuna "Şəhid olsam övladım sizə əmanətdi" deyib. Şəhidlər şəhid olacaqlarını öncədən hiss edirlər. Əli Allahından dilədiyi şəhadətə qovuşdu. Ancaq arzusunda olduğu bala qoxusunu duymadı. İndi bircə onunla təsəlli tapıram ki, Əli iki gün də olsa o xəbərin sevincini yaşaya bildi. Əbədi həsrətimin başlanğıcı 26 oktyabrda başladı. Hərbi salamla yola saldığım qəhrəmanımı hərbi salamla şəhid kimi qarşıladım. Əlidən əllərim üzüldü. Mən həyatı onunla sevmişdim. Onsuz həyatın mənim üçün bir mənası yoxdu. Mən hər zaman Əliyə onsuz yaşaya bilməyəcəyimi deyirdim. Ancaq yaşayıram,yaşamalıyam,yaşatmalıyam. Əlinin bu həyatda olan yeganə əmanəti ilə yenidən Əlini yaşatmalıyam. İndi mənim evim-eşiyim Şərur rayonunun Maxta kənd qəbirsanlığında yarımın uyuduğu məzardı. Cənnətinə qovuşmaq üçün onsuz hər anı cəhənnəmdəki kimi yaşayıram. 

Vətən uğrunda canından keçən qəhrəman şəhidimiz Azərbaycan Respublikasının Prezidenti İlham Əliyevin sərəncamı ilə "Vətən uğrunda", "Şuşanın azad olunmasına görə", 

"Hərbi xidmətə görə" medalları ilə təltif edilib. Şəhidimizə verilən ən böyük mükafat isə onun qazandığı cənnətdir. Bir də xalq ürəyindəki yeri…

ŞƏHİD ƏLİ

Qanınla sağaldı neçə ürəyin,

İllərlə qanayan vətən yarası.

Biz məlhəm olmadıq vətənə amma -

Sən vətən qoxudun vətən balası.

 

Allah duydu sənin dualarını,

Seçib cənnətinə apardı səni.

Adının işığı düşdü bəxtinə, 

Əbədi cənnətdə gördün Əlini. 

 

Şəhidim, duymadın bala qoxusun, 

Balan əmanətdi səndən vətənə. 

Böyüyüb övladın sahib çıxacaq, 

Atası Əlinin əmanətinə. 

 

Adın aydınladır bütün bəşərin, 

Ruhunda böyüyən vətən sevgisin. 

Allah ilmə-ilmə toxuyub sanki, 

Torpağın köksünə şəhid incisin. 

Manya SƏXAVƏTQIZI

Son xəbərlər