Paytaxta yağan qar şəhər təsərrüfatına məsul qurumların yarıtmaz fəaliyyətini bir daha üzə çıxardı.
Hələ qış gəlməmiş, qışa hazır olduqlarını bəyan edən qurumların hazır olduqlarının hansı səviyyədə olduğu məlum oldu. Baxmayaraq, hidrometeoroloqlar bir neçə gün əvvəldən havanın kəskin dəyişəcəyi, qar yağacağı, şaxta olacağı barədə aidiyyəti qurumları xəbərdar etmişdilər. Ancaq qarın yağması ilə həyatın iflic olduğu aydın oldu. Belə ki, yollar buz bağladı, nəqliyyatın hərəkəti iflic vəziyyətə düşdü, avtobuslar gecikdi, bəziləri isə, ümumiyyətlə, işləmədi və ən əsas problem səkilərdə yaşandı. Səkilərin buz bağlaması piyadaların hərəkətinə mane oldu. Nəticədə onlarla insan yıxılaraq müxtəlif dərəcəli xəsarət aldı.
Yolların və səkilərin qardan təmizlənməsi üçün xüsusi texnika işə cəlb olunmalı idi. Ancaq biz bunun əksinin şahidi olduq. Belə ki, səkilər xüsusi texnika ilə deyil, insan əməyi vasitəsilə təmizlənib. Texnika əvəzinə, mənzil-kommunal və texniki xidmət sahələrinin işçiləri yollara çıxarılaraq, səkilər təmizləndi. Məlumdur ki, qarın təmizlənməsi üçün hər il texnika alınır, ancaq səkilərin təmizlənməsində insanlar iştirak edirlər.
“Bakı şəhərində qarla bağlı təmizləmə işləri aparanda piyadalar tamam unudulur”
Məsələ ilə bağlı fikir bildirən nəqliyyat üzrə ekspert Ərşad Hüseynov qeyd etdi ki, Azərbaycanda səkiləri təmizləmək üçün xüsusi texnika yoxdur: “Yolların qırağı ibtidai üsulla – bellə təmizlənir. Gələcəkdə bu texnikaların alınması haqqında düşünməyə dəyər. Bakı şəhərində qarla bağlı təmizləmə işləri aparanda piyadalar tamam unudulur. Amma unudulmamalıdır. Çünki piyadalar yol hərəkətində daha çoxdur, nəinki avtomobil və sürücülər. Piyadaların təhlükəsizliyi üçün şərait yaradılmalıdır. Bunu qanun da tələb edir. Qartəmizləyən texnikalarla səki təmizləmək mümkün deyil. Bunun üçün xüsusi kiçik texnikalar var. Balaca, yüngül, asanlıqla səkilərə çıxır və təmizləmə işini apara bilir".
Həmsöhbətimiz onu da əlavə etdi ki, səkilərin buz bağlamaması üçün həmin yerlərə qum səpilməli idi: “Qarlı hava şəraitində travma alan vətəndaşların sayı 70-i keçib. Bunun olmaması üçün səkilərin təmizlənməsi mütləqdir".
Günel CƏLİLOVA
