Ermənilərin Azərbaycanın Xocalı şəhərində törətdiyi soyqırımdan 29 il ötür. 1992-ci il fevralın 25-dən 26-na keçən gecə erməni hərbi birləşmələri Rusiyanın 366-cı motoatıcı alayının köməyilə Xocalı şəhərini işğal edərək, burada yaşayan dinc əhaliyə - azərbaycanlılara qarşı soyqırımı törədiblər.
Hər il Xocalı qurbanlarının xatirəsi anılır. Həmin gündə əyləncəli verilişlər yayımlanmır. Restoranlar belə o gündə işləməməyə üstünlük verirlər.
Ancaq Lerikdəki “Relax” istirahət məzkəzi fevralın 26-sı və 27-də xüsusi kampaniya elan edib. Həmin gün istirahət mərkəzində diskotekanın təşkil olunacağı qeyd edilir.
Qeyd edək ki, artıq bir neçə gündür istirahət mərkəzinin rəsmi səhifəsində bununla bağlı elan yerləşdirilib. Həmin elanda qeyd edilir ki, “Relax” fevralın 26 və 27-si, həftəsonu ilə əlaqədar kampaniya keçirir. Kampaniya bir gecə, iki gün olmaqla yanaşı, tədbirdə uşaqlar üçün əyləncələrin təşkili, konsert proqramı, diskoteka nəzərdə tutulub. Bunun üçün isə 79 manat pul ödənilməsi tələb olunur.
“Relax” istirahət mərkəzi: “Belə bir proqram nəzərdə tutulub, istirahət mərkəzində yerləşmək üçün əvvəlcədən rezerv etmək lazımdır”
Kampaniya ilə bağlı “Relax” istirahət mərkəzi ilə əlaqə saxladıq. İstirahət mərkəzinin nümayəndəsi bildirdi ki, belə bir proqram nəzərdə tutulub. İstirahət mərkəzində yerləşmək üçün əvvəlcədən rezerv etmək lazımdır: “Diskotekaların, konsertlərin və uşaq əyləncələrinin təşkili üçün bütün tədbirlər görülüb”.
İstirahət mərkəzinin nümayəndəsi də Xocalı soyqırımı günü həmin yerdə çal-çağır olacağını bildirdi. Bu isə o deməkdir ki, adıçəkilən istirahət mərkəzi şəhidlərimizin ruhuna hörmətlə yanaşmır, onlar üçün ancaq gəlir önəmlidir.
Fatimə Hacıbəyli: “...Xocalı faciəsində şəhid olan insanlarımızın ruhuna hörmətsizlikdir”
“Vəfa” Sosial-İctimai Birliyinin sədri Fatimə Hacıbəyli qeyd etdi ki, Xocalı soyqırımı günündə əyləncə təşkil etmək düzgün deyil: “Hər kəs yaxşı bilir ki, hər il dövlət başçısı və ailə üzvləri daxil olmaqla, bütün hökumət və ictimai-siyasi kəsim, habelə ölkə əhalisi Xətai rayonu ərazisində yerlşən “Xocalı abidəsi”ni ziyarət edirlər. Bundan başqa, bütün dünyada yaşayan azərbaycanlılar hər il fevralın 26-da yaşadıqları ölkələrdə Xocalı faciəsini yad edir, bunun üçün tədbirlər, yürüşlər təşkil edirlər. Lakin görünən odur ki, “Relax” istirahət mərkəzi üçün Xocalı soyqırımının heç bir əhəmiyyəti və önəmi yoxdur. 26 fevralda belə bir proqramın təşkil edilməsi Azərbaycan tarixinə, onun ən qanlı səhifələrindən biri – Xocalı faciəsində şəhid olan insanlarımızın ruhuna hörmətsizlikdir”.
Günel CƏLİLOVA
