Müştərilərdən musiqiyə görə əlavə 5 manat pul tələbi qanunidirmi - "Ajda" kafesinin nümunəsi müzakirədə...
Məlum olduğu kimi, restoran və kafelərin əksəriyyətində müştərilərə canlı musiqi xidməti də göstərilir. Danılmaz faktdır ki, bəzən insanlar restoranlara canlı musiqiyə qulaq asmaq üçün gedirlər. İnsanların istirahət edərək musiqiyə qulaq asmaları restoran sahiblərinin daha çox qazanc əldə etmək istəklərinə səbəb olur. Belə ki, bir sıra restoran və kafelər insanların musiqiyə qulaq asması üçün onlardan artıq pul alırlar.
Bu günlərdə sosial şəbəkələrdə yayılan foto müzakirələrə səbəb olub. Kafelərin birində müştəriyə təqdim edilən hesab kağızında musiqinin də qiyməti açıq şəkildə göstərilib. Musiqi üçün müştəridən ödəniş edilməsi tələb olunub.
Maraqlıdır, iaşə obyektlərinin müştəridən əlavə ödəniş tələb etməsi nə dərəcədə düzgündür?
- “...istehlakçı hüquqlarının pozulmasıdır”
Sosial sahə üzrə ekspert Mayis Əliyev qeyd etdi ki, restoran və kafelərdə səslənən musiqi üçün müştəridən əlavə ödəniş tələb edilməsi düzgün deyil: “Ola bilər ki, müştəri könüllü şəkildə hansısa mahnının səslənməsini sifariş edir və buna görə musiqiçilərə pul ödəyir. Bu, tamam başqa bir prosesdir. Hesab çekində restoranda səslənən musiqiyə əlavə 5 manat ödəniş qeyd edilməsi yanlışdır. Bəzi restoranlar musiqiyə görə əlavə ödəniş tələb etməsini Avropada belə bir təcrübənin olması ilə əlaqələndirirlər. Bəli, bir sıra Avropa ölkələrində restoran və kafelər müştəridən əlavə ödəniş tələb edirlər. Ancaq onu da nəzərə almaq lazımdır ki, xarici ölkələrdə bu qayda barədə öncədən müştəriyə məlumat verilir. Müştəri həmin obyektə daxil olarkən musiqiyə əlavə pul verəcəyini bilir. Bizdə isə belə qayda yoxdur. Müştəri restorana daxil olarkən ona hər hansı bir məlumat verilmir. Bu isə müştəri üçün gözlənilməz olur. Heç bir xəbərdarlıq edilmədən insanlardan əlavə ödəniş tələb etmək isə, ən azından, istehlakçı hüquqlarının pozulmasıdır. Əlbəttə, bu, vətəndaşlarda ikrah, qəzəb və haqlı narazılıq yaradacaq”.
Günel CƏLİLOVA
