Dünya ölkələrində olduğu kimi, Azəbaycanda da yeni növ koronavirus infeksiyası (COVID-19) ilə mübarizə davam etdirilir. Dövlətin məqsədyönlü tədbirləri nəticəsində bu gün Azərbaycanda koronavirusla bağlı vəziyyət nəzarət altındadır və hazırda vaksinasiya prosesi aparılır. Yeri gəlmişkən, ölkəmizdə istifadə olunan Çinin “Sinovac” şirkətinin “CoronoVAC” vaksini olduqca effektivdir.
Koronovirus infeksiyası ilə mübarizədə insanların könüllü şəkildə vaksin olunması tövsiyə edilir. Sevindirici haldır ki, insanlar vaksin olunmaqdan çəkinmirlər.
Məlumat üçün bildirək ki, Azərbaycanda 65 yaşdan yuxarı 75 762 nəfərə birinci doz vaksin, 1312 nəfərə isə II doz vaksin vurulub. Nazirlər Kabinetinin mətbuat xidmətinin rəhbəri İbrahim Məmmədov media nümayəndələrinə açıqlamasında qeyd edib ki, 50-64 yaşlarında olan vətəndaşlardan 90 950 nəfərə I doz vaksin, 14 638 nəfərə II doz vaksin vurulub.
Ümumiyyətlə, ölkə üzrə 207 mindən artıq vətəndaş I doz, 35 mindən artıq vətəndaş isə II doz peyvəndi qəbul edib.
Maraqlı məqam ondan ibarətdir ki, vaksin vurduranlar, xüsusilə də yaşı 65-dən yuxarı olan şəxslər vaksinin vurulmasının əhəmiyyəti barədə ictimaiyyətə çağırış edirlər. İnsanları şayiələrə uymamağa səsləyirlər, vaksinin heç bir əks təsir etmədiyini bildirirlər.
“Nə qədər çox insan peyvənd olunsa, koronavirus pandemiyası ilə mübarizədə bir o qədər tez qalib gələcəyik, normal həyatımıza qayıdacağıq”
Professor, həkim-ekspert Adil Qeybulla qeyd etdi ki, qeydiyyatda olan vətəndaşlar vaksinasiyada fəal iştirak edirlər. Peyvənd olunanlar arasında ciddi yan təsirlərə, allergik reaksiyalara rast gəlinməyib: “Məlumdur ki, Azərbaycanın aldığı Çinin “Sinovac” şirkətinin istehsal etdiyi “CoronoVAC” vaksini təsirli peyvənddir. Bir neçə ölkədə kliniki sınaqlardan keçirilib və mənfi təsiri aşkarlanmayıb. Məlumat üçün bildirim ki, “CoronoVAC” vaksini xüsusi ayrılmış peyvənd otaqlarında və yalnız təlim keçmiş həkimlərin nəzarəti altında vurulur”.
Həmsöhbətimiz onu da əlavə etdi ki, əhali peyvəndləmə prosesində daha aktiv olmalıdır: “Nə qədər çox insan peyvənd olunsa, koronavirus pandemiyası ilə mübarizədə bir o qədər tez qalib gələcəyik, normal həyatımıza qayıdacağıq”.
Günel CƏLİLOVA
