I Qarabağ müharibəsinin bəzi qazilərinə əlillik təyinatından imtina edilir, onlar əlavə müayinəyə cəlb olunur. Son zamanlar bu barədə sosial şəbəkədə şikayət və iddialar çoxalıb.
Əsas narazılıqlar da onlara əlillik dərəcəsinin təyin edilməsi zamanı yaranır. Mediaya, sosial şəbəkələrə üz tutan qazilər həkim-ekspert komissiyalarından şikayət edirlər. Məsələn, onlardan birinin ayağı topuqdan aşağı amputasiya olunsa da, ona üçüncü qrup əlillik dərəcəsi təyin olunub.
Neftçala rayon sakini Bədəlov Faiq Hafis oğlunun əlillik təyinatından imtina edilib və onun müavinəti dayandırılıb. F.Bədəlov Birinci Qarabağ müharibəsində Füzuli uğrunda gedən döyüşlərdə yaralanaraq 3 qrup əlillik dərəcəsi alıb. Ancaq bu günlərdə onun əlilliyi ləğv edilərək müavinəti ləğv olunub.
Vətən müharibəsində bir ayağını itirmiş qazi Vasif Nəbiyev də İTV-yə açıqlamasında ona əlillik dərəcəsinin düzgün təyin edilməməsindən narazı olduğunu bildirib.
“...müvafiq sənədləri elektron sistemə göndərməlidir”
Şikayətlərlə bağlı açıqlama verən Əmək və Əhalinin Sosial Müdafiəsi Nazirliyinin mətbuat katibi Fazil Talıbov bildirdi ki, əsasən amputasiya hallarında və sağalmaz xəstəliklər nəticəsində əlillik ömürlük verilir: “Reablitasiya olunmaqla sağalan xəstəliklərlə bağlı əlillik isə müddətli verilir. Ola bilər ki, hansısa qazimizin və ya vətəndaşımızın əlillik müddəti bitib, o, yenidən təkrar müayinədən keçib, müvafiq sənədləri elektron sistemə göndərməlidir”.
F.Talıbov onu da vurğuladı ki, əlillik dərəcəsinin təyinatı vətəndaş-məmur təması olmadan baş verir: “Elektron sistem üzərində yazılanlar – həkimlərin diaqnozu sənədlərə uyğun olaraq həyata keçirilir. Qanunvericilikdə həmin xəstəliyin, əlillik üçün əsas verən halın təyinatı hansı qrupla müəyyən edilibsə, bizim tərəfdən o icra edilir. Ona görə də bu sahədə də problemimiz yoxdur”.
Günel CƏLİLOVA
