Bir ildir dünya gündəmində olan koronavirus infeksiyası həyatımıza yeni şərtlər gətirdi. İnsanların bir çox alışqanlığını silərək, yerinə fərqli qaydalar diktə etdi. Bir il öncəyə qədər tibb işçilərindən başqa, çox az adamın ehtiyacı olan maska indi hava və su kimi həyatımızın ən vacib elementinə çevrilib. Ölüm-qalım məsələsində qoruyucumuza, dünyanı istila edən virusa qarşı sipərimizə dönüb.
Bu bir reallıqdır ki, bəzən böyük bəlaların qarşısını kiçik həmlələrlə də almaq mümkündür. Elə koronavirus pandemiyasına qarşı mübarizənin də üsulları çox asan və sadədir: sosial məsafə, maska taxmaq və gigiyena qaydalarına riayət etmək.
Koronavirus infeksiyasından qorunmaq üçün qeyd etdiyimiz üç sadə qaydaya əməl etmək barədə aidiyyəti qurumlar dəfələrlə çağırış ediblər. Hətta ictimai məkanlarda, insanların sıx olduğu yerlərdə maska taxmağın vacibliyi barədə çağırışlar edilib. Bu qaydalara əməl etməyən qanunvericiliyin tələbinə uyğun olaraq cəzalandırılır.
Bu günlərdə Daxili İşlər Nazirliyi maska ilə bağlı əhaliyə müraciət etdi. Müraciətdə qeyd olunur ki, pandemiya şəraitində hər bir şəxs izolyasiya, sanitariya-gigiyena və karantin qaydalarına əməl etməlidir. Bu dövrdə fərdi qoruyucu vasitələrdən istifadə ilə bağlı müəyyən edilən tələblərə əməl edilməsi vətəndaşların sağlamlığına xidmət edir: "Nə dövlət, nə polis kiminsə bu qaydaları pozmasına görə cərimələnməsində maraqlı deyil. Pandemiya şəraitində vətəndaşlarımız qaydalara ciddi əməl etməklə özünü, yaxınlarını, bütövlükdə, cəmiyyəti bu bəladan qorumalıdırlar.
İnzibati cərimə çəkindirici xarakter daşıyır, inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədindən irəli gəlir. İndiki şəraitdə bu məsuliyyət hər birimizin həyat tərzi olmalıdır. Bir daha diqqətə çatdırırıq ki, xüsusi karantin rejiminə nəzarəti həyata keçirən polis əməkdaşları hansısa vətəndaşın cərimə edilməsində maraqlı deyil. Yetər ki, vətəndaşlar tibbi maskadan düzgün istifadə etsinlər”.
Mütəxəssislər də koronavirus infeksiyasından qorunmaq üçün tibbi maskadan istifadə etməyin vacib olduğunu bildirirlər.
“İnsanlar cərimə olunmamaq üçün deyil, özlərinin və ətrafında olan insanların sağlamlığı üçün tibbi maskadan istifadə etməlidirlər”
Sosioloq Aytəkin Kamranqızı bildirdi ki, milyonlarla insanın mübarizə apardığı koronavirusdan qorunmaqda, onun yayılmasının qarşısını almaqda təsirli vasitələrdən biri olan maskadan istifadə çox vacibdir: “Qapalı yerlərdə, hətta açıq sahələrdə də maskadan istifadənin təhlükədən qorunmaqda müstəsna rol oynadığı dönə-dönə vurğulanır. Məlumdur ki, maska taxılması ilə xəstə və sağlam insanı ayırd etmədən xəstəliyin ötürücülüyünün qarşısı alınır. Bu, eyni zamanda, sosial mesajdır. Hər kəs maska taxdığı zaman ortamda olan digər insanlar da bunu özünütənqid bilərək, maska taxmağa məcbur olurlar. Danılmaz faktdır ki, maska yoluxma sayını xeyli azaldır”.
Həmsöhbətimiz onu da vurğuladı ki, insanlar cərimə olunmamaq üçün deyil, özlərinin və ətrafında olan insanların sağlamlığı üçün tibbi maskadan istifadə etməlidirlər.
Günel CƏLİLOVA
