Bütün dünya ölkələrində turizm sektoru koronavirus pandemiyasına görə tətbiq olunan karantin rejimi ilə əlaqədar durğunluq yaşayır.
Pandemiya bütün dünyada vüsət almağa başlayandan bu yana sıra ilə bütün dövlətlər sərhədlərini digər ölkələrin vətəndaşlarına bağladılar. Artıq neçə aydır hava yolu ilə turistlər ölkəmizə gəlirlər. Ancaq bu say elə də yüksək deyil. Aparılan araşdırmalara görə, son iki həftə ərzində bölgələrə turist səfərlərinin sayı kəskin artıb. Rayon və şəhərlərarası gediş-gəlişin bərpa olunduğu tarixdən - 25 yanvardan etibarən bölgələrə edilən səfərlərin sayı yüksələn templə artır. Əsasən həftəsonu səyahətlər çoxalıb.
Onu da qeyd edək ki, 2020-ci ilin mart ayından sonra daxili turizmdə ilk dəfədir ki, bu qədər canlanma yaranıb. Turizm sahəsindəki bu müsbət dinamikanın yüksələn templə mart ayında da davam edəcəyi istisna olunmur.
Ancaq onu da bildirək ki, turizmin inkişaf etməsi sevindirici olsa da, koronavirus infeksiyasının yayılma risqi təlaşlandırır. Ekspertlərin bildirdiyinə görə, turizmdə canlanmanın yaranması virusun yayılmasına səbəb ola bilər.
“İstirahətə gedən ara məsafənin qorunub saxlanmasına diqqət etməli, kütləvi toplaşmanın qarşısını almalı, qoruyucu vasitələrdən istifadə etməlidir”
Həkim-ekspert Rasif Bağırov bildirdi ki, virusun tam şəkildə yox olması üçün insanların sıx olduğu yerlərdən uzaq olması lazımdır: “Məlumdur ki, turizm məkanlarında da insanların sayı çox olur. Restoran və ya digər məkanlarda olan yerli və xarici turistlər əsasən maskadan istifad etmirlər. Təbii ki, bu hal virusun yayılmasına səbəb olur.
İstirahətə gedən ara məsafənin qorunub saxlanmasına diqqət etməli, kütləvi toplaşmanın qarşısını almalı, qoruyucu vasitələrdən istifadə etməlidir”.
Həmsöhbətimiz onu da bildirdi ki, Bakıdan bölgələrə gediş-gəlişin bərpa olunması yerli turizmin inkişaf etməsinə səbəb olub: “İnsanlar uzun müddət idi ki, qapalı həyat tərzi keçirirdilər. Gediş-gəlişin bərpa olunması bəzi şəxslərin istirahətə yollanmasına səbəb oldu. Ancaq insanlar istirahət edərkən koronavirus infeksiyasının tam olaraq yox olmadığını, hələ də bizləri təhdid etdiyini unutmasınlar”.
Günel CƏLİLOVA
