Azərbaycanın pandemiya ilə mübarizə sahəsində həyata keçirdiyi səmərəli mübarizə tədbirləri bütün dünyada bir örnək olaraq qeyd edilir.
Azərbaycan Qafqazda həm pandemiya ilə mübarizə mərhələsində səmərəli iş üsuluna görə, həm də vaksinləşmə dövründə mütəşəkkil iş aparmaqda regionun və MDB məkanının, dünyanın qabaqcıl ölkələrindən biridir.
Azərbaycan nələrin sayəsində buna nail ola bilir?
“Azərbaycanda pandemiya ilə mübarizə tədbirləri və vaksinasiya prosesi olduqca peşəkar səviyyədə qurulub”
Hemofiliyalı Xəstələrin Respublika Assosiasiyasının sədri Ayaz Hüseynov “Bakı-Xəbər”ə bildirdi ki, ölkəmizin bu istiqamətdə də öncüllər sırasında olması təsadüfi deyil, çünki pandemiyanın yayıldığı ilk günlərdən dövlət səmərəli mübarizə üsulu seçib. A.Hüseynov hesab edir ki, Azərbaycan dövlətinin yürütdüyü siyasətin mərkəzində vətəndaş amili dayanır və atılan bütün addımlar vətəndaşın sağlamlığının təmin edilməsinə yönəlib. Bundan əvvəl dövlətimizin pandemiya ilə ümumbəşəri mübarizəyə olduqca operativ şəkildə qoşulması, bu xəstəliklə beynəlxalq müstəvidə mübarizəyə dəstək verməsi, eləcə də vaksinləşmə məsələsinə aktiv qoşulması Azərbaycanın ön sıralara çıxmasına səbəb olub. Azərbaycan dövlətinin xüsusi olaraq vaksinləşmə strategiyasının olduğunu deyən A.Hüseynovun fikrincə, vətəndaşlarımız da vaksinasiya prosesində aktivlik edirlər: “COVID-19 virusu ilə mübarizədə və virusa qarşı vaksinasiyanın təşkilində Azərbaycan həm regionda, həm də dünyada nümunəvi dövlət kimi özünü göstərdi. Bunun səbəbi odur ki, ölkə başçısı üçün ən əsası vətəndaşının sağlamlığı, sosial rifahının, sağlamlığının təmin edilməsidir. Cənab Prezident insan faktorunu və sağlamlığını ön plana çəkərək dünyaya bir nümunə olub. Azərbaycanda pandemiya ilə mübarizə tədbirləri və vaksinasiya prosesi olduqca peşəkar səviyyədə qurulub. Əlbəttə, vaksinasiyanın təşkilində və elektron növbənin yaradılmasında aidiyyəti səhiyyə qurumlarının peşəkarlığını da qeyd etmək lazımdır. Operativ addımlar atılaraq 17 fevraldan etibarən artıq 50 yaşdan yuxarı olan insanların və risq qrupuna aid olan vətəndaşların vaksinasiyası başlayıb. Bir Azərbaycan vətəndaşı olaraq məni ölkə başçısının qayğısı və aidiyyəti səhiyyə qurumlarının vaksinasiyanın təşkilində peşəkarlığı çox sevindirir. Burada vətəndaşların da üzərinə çox böyük məsuliyyət düşür. Beləliklə, bir çox ölkəyə əlçatmaz olan dövlətimizin yaratdığı şəraitdən istifadə edilməli və vətəndaşlarımızın növbəyə yazılaraq vaksinasiya olması mütləqdir” - deyə A.Hüseynov vurğuladı.
İradə SARIYEVA
