Koronavirus pandemiyası ilə mübarizə tədbirləri çərçivəsində kütləvi tədbirlərin, toy, nişan, xınayaxdı, ad günü mərasimlərinin keçirilməsinə qoyulan qadağalar hələ öz qüvvəsində saxlansa da, təəssüf ki, qayda pozucularına sıx-sıx rast gəlirik.
Qanunu pozanlar sırasında gizli toy, nişan, xınayaxdı edən vətəndaşlar da var ki, onlar da xüsusi qanunların tələblərinə uyğun cəzalandırılırlar. Qanunsuz toy, ad günü, xınayaxdı, nişan keçirənlər arasında bölgə əhalisinin çoxluq təşkil etdiyi yayılan məlumatlardan da aydın görünür.
Bu arada belə iddialar eşidilir ki, yerli icra orqanları, bələdiyyələr buna şərait yaradırlar. Hətta bu məclislərin keçirilməsinə müəyyən “şirinlik” müqabilində şərait yaradıldığı ilə bağlı şayiələr dolaşır.
Ümumiyyətlə, icra hakimiyyətləri, bələdiyyələr, icra nümayəndələri nə üçün əhali arasında lazımi maarifləndirmə işləri aparmırlar ki, qanunsuz olaraq toy-nişan keçirmək olmaz, bunlar pandemiya ilə mübarizə siyasətinə ziddir və sair.
“Qaydalara mütləq əməl edilməli və müvafiq dövlət qurumları...”
Siyasi şərhçi Azər Həsrət “Bakı-Xəbər”ə bildirdi ki, belə bir durumun olması təəssüf doğurur: “Əlbəttə, belə bir durum var, biz bu barədə tez-tez xəbərlər eşidirik. Hətta Bakı şəhərinin özündə, eləcə də ayrı-ayrı rayon mərkəzlərində gizlin şəkildə şadyanalıq məclislərinin keçirilməsi ilə bağlı məlumatlar alırıq. Təbii ki, bu məsələnin mövcud olmasında bir tərəfdən nəzarətsizlik qeyd edilməlidir, digər bir tərəfdən isə “icazə verilmiş” nəzarətsizlikdən danışa bilərik. Çünki tez-tez eşidirik ki, hansısa şadlıq evlərində, sadəcə olaraq, məclis iştirakçılarının mobil telefonlarının yasaqlanması yolu ilə məclislər keçirilir. Yəni bunu mətbuatdan oxuyuruq. Siz bunu şayiə kimi qeyd etdiniz, amma bu, şayiə deyil, bir neçə dəfə belə hallar olub, bununla bağlı uyğun tədbirlər də görülüb. Xatırladım ki, akademik Ramiz Mehdiyevin nəvəsinin şadlıq məclisi ilə bağlı çox böyük skandal da yaşanmışdı və buna görə həmin məclisi təşkil edən şəxslər də 15 günlük həbsə məhkum edilmişdilər. Yəni belə hallar baş verir, bunun baş verməsi üçün şərait yaradanlar var və təəssüflər olsun ki, şərait yaradanlar da bunu, sizin ifadənizlə desək, müəyyən “şirinlik” qarşılığında edirlər. Bu isə o deməkdir ki, buna şərait yaradanlar dövlətə və dövlətin siyasətinə zidd davranırlar. Belə davrananlar da, təbii ki, cəzalandırılmalıdırlar”.
A.Həsrətin fikrincə, burada başqa məqamlar da var ki, onun üzərindən keçə bilmərik. O qeyd edir ki, xüsusən də rayon və kənd yerlərində insanlar bir-birilə daha yaxındır, iç-içədir, qohumluq əlaqələri daha güclüdür, bu səbəbdən də insanlar bir-birinin sözündən keçə, xahişini yerə sala bilmir: “Rayonlarda, kəndlərdə belə hallar da olur ki, icra nümayəndələri, sadəcə olaraq, bu məsələyə “göz yummalı” olurlar, burada rüşvətdən, hansısa “şirinlik”dən söhbət gedə bilməz. Sadəcə olaraq, insanlar bir ailə kimidir və ona görə də bir-birinin bu kimi davranışlarına göz yummağa məcbur olurlar. Düşünürəm ki, dövlətimiz tədricən toy məclisləri ilə bağlı müəyyən məhdudiyyətlərlə müşayiət olunan qaydalar tətbiq etməlidir. Pandemiyadan qorunmaq üçün mövcud olan şərtlər daxilində tutaq ki, geniş zallarda yüz nəfərin iştirakı ilə toy məclisləri ola, yaxud 30 nəfərin iştirakı ilə nişan mərasimi keçirilə bilər. Yəni yavaş-yavaş buna getmək lazımdır. Biz başa düşürük, dövlətimiz vətəndaşın qayğısına qalır, amma insanların da əsəbləri buna uzun müddət davam gətirə bilmir. Ona görə də düşünürəm ki, Nazirlər Kabineti yanında Operativ Qərargah müəyyən qaydalar işləyib hazırlamalı və biz artıq o məclislərin müəyyən şərtlər daxilində keçirilməsinə imkan tanımalıyıq. Yəni insanlar evlənmək, şadlanmaq, şad günlər keçirmək, stressdən qurtulmaq istəyirlər, yavaş-yavaş bunun üçün yollar açılmalıdır. Amma ümumilikdə götürəndə qaydalar varsa, o qaydalara mütləq əməl edilməli və müvafiq dövlət qurumları da həmin qaydalara riayət edilməsini təmin etməlidirlər. Heç kim “bu mənim qohumumdur”, “o, mənə şirinlik verdi” deyib qaydalardan kənara çıxmamalıdır” - deyə A.Həsrət vurğuladı.
İradə SARIYEVA
