Günümüzün ən aktual problemi olan koronavirus pandemiyası dünyada mövcud olan bütün sahələrə ciddi təsir etdiyi kimi, təhsil sahəsi üçün də arzuolunmaz problemlər yaratdı. Yaranmış vəziyyətlə bağlı universitetlər, orta məktəblər məsafədən təhsilin tətbiqi yolunu seçərək, təhsilin davamlılığının təmin olunmasını prioritet vəzifə kimi həyata keçirməyə başladılar.
Koronavirus infeksiyası ilə bağlı olaraq ölkədə tətbiq edilən karantin rejimi repetitorluqla məşğul olanların “bazarına” müsbət təsir etdi. Repetitorluqla məşğul olan müəllimlər pandemiyanı əsas gətirərək qiymətləri qaldırdılar.
Pandemiya səbəbindən məktəblərin bağlandığından, repetitorluqla məşğul olan müəllimlər öz zəhmət haqlarını artırdılar. Belə ki, əvvəl aylıq 50 manat ödənilən müəllimlər artıq 70 manat, 70 manat ödənilən pedaqoqlar isə 100 manat tələb edirlər.
Məlumat üçün qeyd edək ki, həftədə iki dəfə olmaqla tədris olunan fənlərin ortalama qiyməti 60-80-100 manat arasında dəyişir.
“Müəllim hazır materiallardan deyil, özünün tərtib etdiyi testlər, mətnlərlə çalışırsa, bu hal qiymətə təsir edə bilər”
Məsələ ilə bağlı fikir bildirən təhsil eksperti Kamran Əsədov qeyd etdi ki, son zamanlar repetitorluq bazarında qiymət artımı yaşanır. Bu daha çox dəqiq fənlərdə müşahidə edilir: “Fizika, riyaziyyat, kimya fənlərini tədris edən müəllimlər daha artıq zəhmət haqqı tələb edirlər. Etiraf edək ki, ibtidai sinif şagirdləri ilə çalışan müəllimlər üçün məsafədən tədrisi başa salmaq, xüsusən də birinci siniflər üçün yazı yazmağı və oxumağı onlayn öyrətmək heç də asan deyil. Ancaq bu platformalar üzərində çalışan təhsil işçiləri saatlarla vaxt ayırmasına baxmayaraq, qiymət dəyişikliyi etməyiblər”.
Həmsöhbətimiz hesab edir ki, Azərbaycanda repetitorluq xidmətinin həyata keçirilməsinə bir neçə amil təsir göstərir: “İlk olaraq qeyd edim ki, tədrisin onlayn formada keçirilməsi zamanı müəllimin özünə aid elektron resursu varsa, bu, tədrisin qiymətinə təsir edə bilər. Yəni müəllim hazır materiallardan deyil, özünün tərtib etdiyi testlər, mətnlərlə çalışırsa, bu hal qiymətə təsir edə bilər”.
Günel CƏLİLOVA
