Məlum olduğu kimi, ötən ay Tarif Şurasının qərarı ilə yanacağın satış qiyməti tənzimləndi. Yanacağın qiymətinin dəyişməsi bir sıra sahələrdə süni qiymət artımına səbəb oldu. Bu sahələrdən biri də rayonlara sərnişin daşıyan taksilərdir.
Taksilərlə rayon və şəhərlərarası sərnişindaşıma qiymətlərində qiymət artımı baş verib. Əsasən Gəncədən Bakıya və ətraf rayonlara sərnişin daşıyan taksi sürücüləri qiyməti qaldırıblar. Sürücülərin özləri də qiyməti qaldırdıqlarını etiraf edirlər. Qeyd edək ki, qiymət artımı təxminən 50 faiz civarındadır. Belə ki, indiyədək Bakıya 1 sərnişinin 10 manata daşındığı Quba avtovağzalında da qiymətlər 15 manata yüksəlib. Təbii ki, gediş haqqı məsafədən asılı olaraq dəyişir. Belə olan halda, taksi sürücüləri yanacağın qiyməti qalxandan sonra gediş haqqını 50 faiz artırıblar. Bu da sərnişinlərin narazılığına səbəb olur.
“Yanacağın qiyməti dəyişəndən sonra həm şəhərdaxili fəaliyyət göstərən, həm də paytaxtdan bölgələrə, bölgələrdən paytaxta gələn taksilər...”
Məsələ ilə bağlı fikir bildirən sosial sahə üzrə ekspert Mayis Əliyev qeyd etdi ki, süni qiymət artımı bir sıra sahələrdə müşahidə olunur: “Yanacağın qiyməti dəyişəndən sonra həm şəhərdaxili fəaliyyət göstərən, həm də paytaxtdan bölgələrə, bölgələrdən paytaxta gələn taksilər qiyməti yarı faiz qaldırıblar. Bu hal sərnişinlərin haqlı narazılığına səbəb olur. Elə hal olur ki, təcili rayona getmək lazımdır. Belə olan halda, sərnişinlər taksidən istifadə etməli olurlar. Taksi sürücüləri də vəziyyətdən istifadə edib, artıq qazanc əldə etmək üçün qiyməti süni şəkildə qaldırırlar. Məlumat üçün bildirim ki, avtovağzalın qarşısından rayonlara sərnişindaşıma ilə məşğul olan taksilərə qurum tərəfindən heç bir nəzarət edilmir”.
Günel CƏLİLOVA
