Azərbaycan Respublikasının Prezidenti İlham Əliyev martın 10-da altıncı çağırış Milli Məclisin ilk iclasındakı çıxışında deputatlara olduqca ciddi bir mövzu ilə bağlı xəbərdarlıq edib: “Bütün deputatlara deyirəm, beynəlxalq təşkilatlarla heç bir sövdələşməyə getmək olmaz”.
Ölkə başçısı daha sonra qeyd edib ki, bütövlükdə, beynəlxalq təşkilatlar çərçivəsində bizim fəaliyyətimiz daha məqsədyönlü olmalıdır: “Orada bizi təmsil edən deputatlar fəal olmalıdırlar, turist kimi getməməlidirlər, sonra hesabat verməlidirlər ki, nə iş görmüsən, kiminlə görüşmüsən, hansı məsələni qaldırmısan. Yoxsa, bəzi hallarda bu, turist səfərlərini xatırladır. Getdik, görüşdük, oturduq, danışdıq, yedik, qayıtdıq. Özü də bəzi səfərlər, ümumiyyətlə, qəbuledilməzdir. Mən bu gün bu haqda çox danışmaq istəmirəm, amma bilirəm nə baş verir, hansı hadisələr baş verir. Ona görə biz beynəlxalq fəaliyyətimizin səmərəliliyini artırmalıyıq. O təşkilatlarda ki, bizə qarşı əsassız yanaşma var, bizə qarşı ittihamlar irəli sürülür, biz orada mübariz olmalıyıq. Yəni onların qarşısında yaxşı olmaq yox, dövlət, xalq qarşısında yaxşı olmaq lazımdır. Hansısa məsələni kəskinləşdirmək istəmirəm bəhanəsi ilə kənara çəkilmək yox, əksinə, öz sözünü demək lazımdır. Qərəzli yanaşmanı ifşa etmək lazımdır. Necə ki, mən daim bunu edirəm və kifayət qədər faktlar var. Bunu demək üçün siyasətçi olmaq lazım deyil. Adi vətəndaş bunu görür televiziyada. Baxın, bizə demokratiyadan dərs vermək istəyənlər hansı cinayətlər törədirlər. Avropanın dırnaqarası demokratiya beşiyi sayılan ölkələrdə xalqın gözü qarşısında, dünyanın gözü qarşısında dinc nümayişçiləri vururlar, əzirlər, gözlərini çıxarırlar, öldürürlər, həbs edirlər. Jurnalistləri əsassız ittihamlarla həbs edirlər, çürüdürlər onları. Göz qabağındadır, dinc nümayişçiləri itlərlə, atlarla dağıdırlar. Bir ölkədə yox, iki ölkədə yox, demək olar ki, bu, indi bizi tənqid etmək istəyən məkanda kütləvi hal alıbdır. Müsəlman miqrantlara qarşı baxın, necə münasibət göstərilir. Onları XXI əsrdə itlərlə əzirlər, qəfəsə salırlar. Sonra isə qəfəsə yemək parçaları atırlar, heyvan kimi. Budurmu münasibət?!
İndi də bütün vasitələrdən istifadə edib onları əzmək fikrindədirlər. Bəs o miqrantlar haradan yarandı? Nə üçün onlar yarandı? Nəyə görə öz ölkələrini tərk etdilər? Kim onların ölkələrinə basqın etdi? Kim o ölkələri məhv etdi? Kim sabitliyi pozdu? Kim milyonlarla qaçqının yaranmasına səbəbkar oldu? Ona görə kim bunu edibsə, qoy, onun acısını da çəksin. Nə üçün Türkiyə, bizim qardaş ölkəmiz 4 milyon qaçqını qəbul etməlidir, yedirməlidir, içirməlidir, milyardlarla pul xərcləməlidir? Bunları Türkiyəmi didərgin salıb? Yox. Onları didərgin salanlar gəlib onlara sahib çıxsınlar.
Bütün bunları demək lazımdır. Mən bu gün bu kürsüdən bunu deyirəm, açıq, heç kimdən çəkinmədən. Çünki mən haqlıyam və həqiqətə qarşı heç kim heç nə deyə bilməz. Əlbəttə, bax, görərsiniz, bu sözlərdən bir neçə gündən sonra yenə çirkin məqalələr çıxacaq, yenə hansısa bir qondarma təşkilat nəsə bəyanat verəcək ki, Azərbaycanda o, pisdir, bu, pisdir. Eybi yoxdur, qoy desinlər. Amma biz bu həqiqətləri deməsək, sabah bu, bizim başımızda sınacaq. Ona görə bunu deməliyik və siz də deməlisiniz. Mən bütün deputatlara deyirəm, heç bir sövdələşməyə getmək olmaz. Beynəlxalq təşkilatlarla işləmək lazımdır, biz də işləyirik, ancaq bizim maraqlarımız var və kifayət qədər arqumentlərimiz var. Ona görə mən sizi bu mübarizəyə çağırıram - həm Avropa Şurasında, həm ATƏT Parlament Assambleyasında, həm də bütün başqa təşkilatlarda. Beləliklə, hesab edirəm ki, bu istiqamətdə atılacaq addımlar bizim ölkəmizin mövqeyini daha da gücləndirəcək".
Göründüyü kimi, Prezident indiyə qədər fəaliyyət göstərmiş deputat korpusunun beynəlxalq əlaqələrin qurulması sahəsindəki fəaliyətində ciddi nöqsanların olduğunu bildirib. Hətta xüsusilə qeyd edib ki, deputatlar heç bir beynəlxalq qurumla sövdələşməyə getməməlidirlər. Bunu deputaların gələcək fəaliyyətlərində nəzərə almaları vacib olan bir xəbərdarlıq kimi qəbul edə bilərik. Ancaq məsələyə bir qədər də məntiqlə yanaşdıqda iddia etmək olar ki, keçmişdə belə fəaliyyətlərə, sövdələşmələrə cəhdlər olub və məhz buna görə də ölkə başçısı bu cür açıq notla xəbərdarlıq edir. Maraqlıdır, deputatların xarici qurumlarda sövdələşməsi hansı formada ola bilər?
Qabil Hüseynli: “Hansısa millət vəkilinin xarici qurumla sövdələşməyə getməsi vətənə xəyanət anlamına gələ bilər”
Sabiq dövlət müşaviri, politoloq Qabil Hüseynli “Bakı-Xəbər”ə açıqlamasında bildirdi ki, Prezidentin toxunduğu məsələ olduqca ciddidir: “Hansısa millət vəkilinin xarici qurumla sövdələşməyə getməsi vətənə xəyanət anlamına gələ bilər. Bununla həmin adam təsir agenti funksiyasını yerinə yetirmək öhdəliyini üzərinə götürmüş olur. Bu da ağır dövləti cinayətdir. Belə əməllərə yol verən sadə vətəndaş belə bağışlanmır, onlara ən ağır formada cəza nəzərdə tutulur. Açığını deyim ki, mənim ağlıma gəlmir kimlərsə buna risq etsin. Prezident belə bir xəbərdarlığı təsadüfən etməz. Son zamanlar görünür ki, Azərbaycanda xüsusi xidmət orqanlarının fəaliyyətində də ciddi canlanma var. Əgər belə faktlar olubsa, çox ürəkbulandırıcı hadisədir. Eyni zamanda, ağır dövləti cinayətdir. Milli xəyanəti heç nə ilə kompensasiya etmək olmaz və bu hal bağışlana bilməz. İndiyə qədər belə faktlar olubsa, ona mütləq hüquqi qiymət verilməlidir. Bizim beynəlxalq qurumlarda bir çox nümayəndə heyətimiz fəaliyyət göstərir. Bu baxımdan da konkret kimin belə işlərlə məşğul olabilmə ehtimalını söyləyə bilmərəm. Millət vəkili milli simvoldur. Onlar da qırmızı xətti tapdalayırlarsa, burada söz tapa bilmirəm”.
Məhəmmədəli QƏRİBLİ
