Prezident İlham Əliyev keçirdiyi iclaslarda dövlətin korrupsiya və rüşvətxorluğa qarşı mübarizədə ardıcıl olacağını, belə əməllərə meyllənən vəzifə sahiblərinin ciddi şəkildə cəzalandırılacağını dəfələrlə bəyan edib. Həmçinin, işində nöqsanlara, qanunsuz əməllərə yol verən məmurların postlarını itirəcəklərini açıqlayıb.
Proseslər əvvəlcədən bəyan olunan siyasi xəttə uyğun şəkildə davam etdirilir. Bu həm də dövlət başçısının iradəsidir. Ölkə başçısı icra başçılarını, nazirləri vəzifəyə təyin edərkən onların qarşısında konkret tələblər qoyur: xalqa xidmət edin, vəzifədən sui-istifadə etməyin, vətəndaşları incitməyin. Hər dəfə açıq şəkildə xəbərdarlıq edir ki, kim çirkin əməllər arxasınca gedəcəksə, layiqli cəzasını alacaq.
Müşahidələr göstərir ki, tələblərə riayət etməyən və fəaliyyətində ciddi səhvlərə yol verən icra başçıları vəzifəsindən kənarlaşdırılırlar. Ciddi naqisliklərə yol verib korrupsiya ilə məşğul olanlar həbs edilir. Cəmiyyət də Prezidentin elan etdiyi islahat kursunu və islahatlara qarşı çıxanların sərt şəkildə cəzalandırılmasını təqdir edir. Cəmiyyət görür ki, ölkə başçısı Azərbaycanda rüşvətin, korrupsiyanın, məmur özbaşınalığının kökünü kəsmək üçün ortaya siyasi iradə qoyur. O da məlumdur ki, son aylar vəzifə səlahiyyətlərini aşaraq bir sıra nöqsanlara yol verən icra başçıları barəsində cinayət işi açılıb. Hansı ki, onlar göstərilən etimadı doğrultmayıblar.
Ancaq o da var ki, naqisliyə yol verən icra başçılarını bir vaxtlar Prezidentə təqdim edən, onlara müəyyən mənada zəmanət verən şəxslər də olub. Hansı ki, sözügedən təqdimata uyğun olaraq, həmin icra başçılarına etimad göstərilib. Ancaq onlar etimadı doğrultmayıblar. Bütün hallarda, özünü doğrultmayan icra başçılarını təqdim edənlər də buna görə məsuliyyət daşıyırlarmı? Onların da cəzalandırılmasına ekspertlər necə yanaşırlar?
“Çünki onların da bu və ya digər dərəcədə burada məsuliyyət payı var”
Məsələyə münasibət bildirən ekspert İlqar Hüseynlinin sözlərinə görə, nöqsanlara yol verən icra başçılarını bir vaxtlar təqdim edənləri də lazım gələndə cəzalandırmaq lazımdır: “Çünki onların da bu və ya digər dərəcədə burada məsuliyyət payı var. Belələri təqdim olunur və Prezident də onlara etimad göstərir. Ancaq sonra məlum olur ki, həmin icra başçıları onlara göstərilən etimadı doğrultmayıblar. Etimadı doğrultmayan icra başçısı cəzalandırılır, amma onu təqdim edən, ona zəmanət duran şəxs kənarda qalır. Hesab edirəm ki, yanaşma dəyişməlidir. Yəni təqdimat verən şəxs də müəyyən məsuliyyət daşımalıdır. Belə olarsa, o zaman təqdimatı verən şəxs daha məsuliyyətli hərəkət edəcək. Bir məqamı da qeyd edim ki, təqdimatda kimsə səhv də edə bilər, yanıla da bilər. Təqdimatdan sonrakı dönəmdə o kadrın görünməyən xüsusiyyətləri ortaya çıxa bilər. Belə məqamlar da var. O üzdən, bütün nöqsanlara yol verən icra başçılarına görə onları təqdim edən şəxsləri ucdantutma cəzalandırmaq da doğru olmaz. Hesab edirəm ki, məsələnin bu tərəfini də nəzərə almaq lazımdır. Bütövlükdə, Prezident Administrasiyası tərəfindən işə qəbul olunan istənilən vəzifə sahibi barədə araşdırma aparılmalıdır. Təyin edilən icra başçısının bioqrafiyası, fəaliyyəti ilə bağlı şəffaf araşdırma aparılmalıdır. Hesab edirəm ki, bu kimi məqamlara diqqət edilərsə, o zaman belə neqativ halları önləmək olar”.
Vidadi ORDAHALLI
