“Freedom House” təşkilatı martın 4-də dünyada insan hüquqlarının vəziyyəti haqqında illik hesabatını dərc edib. Sənədə əsasən, 2019-cu ildə siyasi və mülki hüquqlar sahəsində irəliləyiş əldə etmiş ölkələrin sayı iki dəfə artıb.
14-cü ildir "qlobal azadlıq" sahəsində pisləşmə müşahidə olunur. "Azad olmayan ölkələrə" 49 dövlət aid edilib. Təşkilat yenə qərəzli mövqedən çıxış edərək Azərbaycanı "azad olmayan" ölkələr qrupuna aid edib. Azərbaycandan başqa həmin ölkələrin içində Türkmənistan, Tacikistan və digər ölkələr var.
Hesabatda, həmçinin, bu il ölkə parlamentinə keçirilən növbədənkənar seçkilərə toxunulur. Aparıcı müxalif qüvvələrin bir hissəsi seçkiləri boykot edib. “Freedom House” iddia edir ki, guya seçkilər qanun pozuntuları, o cümlədən, jurnalistlərin qorxudulması ilə müşayiət olunub. Təşkilat hesab edir ki, Azərbaycanda siyasi mühit plüralist və rəqabətqabiliyyətli deyil. Guya namizədlərin seçkiqabağı mitinqlər keçirmək imkanları məhdudlaşdırılıb, ifadə və mətbuat azadlıqları sistemli şəkildə pozulur, diffamasiya əvvəlki kimi cinayət tərkibi olaraq qalır. Qurum iddia edir ki, jurnalistlər və onların yaxınları zorakılıq və qorxutma ilə üzləşirlər, müstəqil saytlar vaxtaşırı bloklanır və s.
Göründüyü gimi, sözügedən təşkilat Azərbaycana yönəlik qərəzli mövqeyini bu dəfə də nümayiş etdirib. Yenə də bəlli dairələrin sifarişini icra edərək tutarlı əsaslar ortaya qoymadan Azərbaycanı "azad olmayan" ölkələr qrupuna aid edib. Bu bir daha “Freedom House”un qeyri-obqeyktiv və qərəzli bir təşkilat olduğunu ortaya qoyur.
“Başlıca olaraq bu təşkilat erməni lobbisinin əlində alətdir”
Sözügedən məsələ ilə bağlı fikirlərini “Bakı-Xəbər”lə bölüşən “İki Sahil” qəzetinin baş redaktoru Vüqar Rəhimzadənin sözlərinə görə, “Freedom House” təşkilatı erməni lobbisinin təsiri altında olduğu üçün sözügedən hesabatın obyektivliyindən söhbət gedə bilməz: “Freedom House” təşkilatı bəzi dairələrin əlində bir alət və təsir vasitəsidir. Ona görə də adıçəkilən təşkilatın hazırladıqları hesabatlar sifarişə uyğun olaraq yazılır. Başlıca olaraq bu təşkilat erməni lobbisinin əlində alətdir. Yaxşı olardı ki, “Freedom House” öz azadlığı barəsində düşünsün. Bu təşkilat QHT kimi fəaliyyət göstərsə də, azad deyil. Davamlı olaraq bu təşkilat Azərbaycanı qaralamaqla məşğuldur. Bu da təsadüfi deyil. Çünki sifarişi bu cür verirlər. Azad olmayan ölkədə internet, media necə azad olar? Bu gün Azərbaycanda bütün azadlıqlar təmin olunub. Ancaq “Freedom House” təşkilatı bunları görmək istəmir. Ona görə də bu təşkilat qeyri-ciddi və mənfi obraza malik bir təşkilatdır. O üzdən, bu təşkilatın hazırladığı hesabatlar məni təəccübləndirmir. Aydın məsələdir ki, bu təşkilatın hazırladığı hesabatlarda Azərbaycanla bağlı məqamlar qərəzli olacaq. Bunun da səbəbləri, qeyd olunduğu kimi, məlumdur. Bu təşkilatın hesabatları ciddi qəbul oluna bilməz”.
Vidadi ORDAHALLI
