Rusiya hakimiyyəti qondarma Qarabağ rejiminin “xarici işlər naziri” Masis Mailyanın və keçmiş “müdafiə naziri” Samvel Babayanın Rusiyaya girişini 5 il müddətinə məhdudlaşdırmaq barədə qərar qəbul edib. Bu barədə Ermənistanın "Qraparak" qəzeti məlumat yayıb. Qəzet bu qərarın konkret səbəbini, habelə məlumatın mənbəyini açıqlamır.
Qeyd edək ki, Mailyan hələlik Paşinyanın Qarabağdakı “prezident seçkisində” əsas namizədi sayılır. Mailyan və Babayan qarşıda duran 31 mart "Qarabağ prezidenti seçkilərində" birgə çıxış edirlər. Mailyan qarşıda duran “seçkilərdə” namizəddir, Babayan isə 10 il Qarabağda yaşamadığına görə bu imkandan məhrumdur. Babayan məhkəmə yolu ilə bu qərarın ləğvinə çalışsa da, bu baş tutmayıb. Nəticədə onun təsis etdiyi “Vahid Vətən” partiyası bu “seçkilərdə” Masis Mailyana dəstək verir.
Qəzet onu da qeyd edib ki, Mailyanın və Babayanın Rusiyaya girişinin qadağan edildiyi barədə məlumatı rəsmən nə təsdiq, nə təkzib edirlər. Lakin qərarın əsasında siyasi və ola bilsin həm də hüquqi səbəblər dayanır: “Biz bununla bağlı rəsmi sorğu göndərmişik və cavabını alanda dərc edəcəyik”.
Qəzetin məlumatı təsdiqini taparsa, bunu Moskvanın Qarabağda bu şəxslərin hakimiyyətə gəlməsini istəməməsi kimi qiymətləndirmək olar. Belə olan halda, separatçı qurumda digər namizəd - Araik Arutyunyanın şansı artır. Çünki o, bu istiqamətdə fəal iş aparır.
O da məlumdur ki, son vaxtlar Ermənistan mediasında mütəmadi olaraq anti-Rusiya mövzusunda yazılar gedir. Rusiyanın məlum qərarı aparılan kampaniyaya, bir növ, cavab da ola bilər. Rusiyada Qarabağdakı separatçılarla bağlı yeni baxış formalaşır.
Maraqlıdır, bəs ekspertlər bütün bunların səbəbini nə ilə əlaqələndirirlər?
“Ola bilsin ki, Qərb Qarabağ separatçılarını Kremlin təsir dairəsindən çıxarmaq istəyir”
Məsələyə münasibət bildirən AMİP-in baş katibi Arzuxan Əlizadənin fikrincə, Rusiya Paşinyana yaxın olan şəxsin separatçı qurumun “prezidenti” olmasını istəməz: “Bu açıq həqiqətdir. Rusiya istəyər ki, sırf “Qarabağ klanı”nı təmsil edən şəxs orada seçilsin. Çünki Rusiya separatçı qurumdan həm Ermənistana, həm də Azərbaycana qarşı bir təzyiq vasitəsi kimi istifadə edir. Paşinyan isə bütün vasitələrlə istəyir ki, özünə yaxın olan şəxsi seçdirsin. Bəzi məlumatlara görə, Paşinyana yaxın olan şəxs Araik Arutyunyandır. Digər tərəfdən, Rusiya açıq formada kimi dəstəklədiyini bəyan etməz. Ancaq reallıq ondan ibarətdir ki, Ermənistanda hakimiyyət dəyişikliyindən sonra Rusiya ilə Qərb arasında geosiyasi mübarizə kəskinləşib. Ola bilsin ki, Qərb Qarabağ separatçılarını Kremlin təsir dairəsindən çıxarmaq istəyir. Ermənistanda olduğu kimi, separatçı qurumda da analoji prosesləri təkrarlamaq istəyir. O üzdən, Rusiya Qərbin planlarını pozmaq üçün bu cür qabaqlayıcı addımlar atır. İstənilən halda, belə bir məlumatın yayılması təsadüfə oxşamır”.
Vidadi ORDAHALLI
