Nikol Paşinyanın hakimiyyəti ələ keçirməsindən təxminən 2 il ötməsinə baxmayaraq, Baş nazir nə qədər çək-çevir etsə də, nəinki ölkə ictimaiyyətinin, hətta yaxın tərəfdarlarının da ümidlərini doğrulda bilmir. Hökumət başçısının vaxtilə verdiyi vədlər söz olaraq qalır, cəmiyyətdə siyasi ab-havanı sabitləşdirmək, milli iqtisadiyyatı irəli aparmaq üçün ölkədə elə bir təsirli tədbir görülmür.
Bunlara paralel, son günlər Ermənistanda Paşinyanla Konstitusiya Məhkəməsinin sədri Hrayr Tovmasyan arasında yaranan qarşıdurma artıq daha gərgin mərhələsini yaşamaqdadır. Məlum olduğu kimi, bir neçə həftə bundan əvvəl uzunmüddətli mübarizədən sonra Ermənistan parlamentinin təcili iclasında Konstitusiya Məhkəməsinin sədri və üzvlərinin istefasına dair referendum keçiriləcəyi barədə qanun layihəsi təsdiq edilib. Aprelin 5-də keçiriləcək referendumda siyasi qüvvələr iştirak etmək istəmədiklərini elan etdikləri halda, Paşinyan geri çəkilmək niyyətində deyil.
Erməni mediası yazır ki, ölkə vətəndaşları aprel referendumunun onların real problemləri ilə əlaqəli olmadığını artıq başa düşürlər. Buna görə də onların könüllü olaraq seçki məntəqələrinə gedib Nikolun xeyrinə səs verəcəyi elə də inandırıcı görünmür. Bildirilir ki, sosial proqramların ixtisar edildiyi bir şəraitdə Baş nazirin iqtisadi problemləri bir tərəfə ataraq ayyarım müddətində antikonstitusiya layihəsi üçün kampaniya aparacağına mənfi yanaşırlar. Çünki kampaniyaya sərf olunacaq vəsait nə Paşinyanın, nə də onun ətrafının deyil, sadə ermənilərin hesabına ödəniləcək.
Gülməli məqamlardan biri də ondan ibarətdir ki, Paşinyan konstitusiya dəyişiklikləri ilə bağlı referendumda “bəli” səs verməyə çağıran bukletlər paylamaq üçün İrəvan küçələrinə çıxıb. Bu minvalla, Paşinyan bukletlər paylayıb, əhali ilə söhbət edib və bir neçə nəfərlə selfi çəkib. Görünən odur ki, Paşinyan əvvəl cəmiyyətə verdiyi vədlərin üzərindən sükutla keçərək, indi də ölkə sakinlərinin başını başqa vasitələrlə qatmaq istəyir. Bütün hallarda, Paşinyanın bu cür populist addımları nə deməkdir?
“Çünki inqilabın ikinci illiyində ölkəyə vəd edilən islahatlar özünü doğrultmayıb və sosial vəziyyət müsbətə doğru dəyişməyib”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə aspektdən yanaşdı: “Ermənistanda keçiriləcək konstitusiya referendumunda Paşinyanın əsas planı Konstitusiya Məhkəməsinin hakimini vəzifədən uzaqlaşdırmaqla yanaşı, öz hakimiyyətini möhkəmləndirməyə hesablanıb. Hesab edirəm ki, bu referendumun baş tutması üçün Paşinyanın İrəvan küçələrində populist mesajları və bukletlər paylaması heç də ona tam inam yaratmayacaq. Çünki inqilabın ikinci illiyində ölkəyə vəd edilən islahatlar özünü doğrultmayıb və sosial vəziyyət müsbətə doğru dəyişməyib. Ona görə də referendumda xalqın böyük ölçüdə səs verməyi reallaşmayacaq. Ancaq referendum baş tutsa da, burada seçicilərin kiçik bir hissəsi iştirak edəcək. Paşinyan populizmə və siyasətdə əsasən yalana üstünlük verir. Referendum öncəsi onun belə jestləri, küçədə vətəndaşlarla görüşü blefdir. Ümumiyyətlə, Ermənistanın demokratik bir sistemlə inkişafı mümkün görünmür. Orada baş verənlər Paşinyanın öz siyasi ambisiyalarıdır. Konstitusiya referendumu da onun kimi. O baxımdan hesab edirəm ki, bu vəziyyət çox davam etməyəcək və ölkədə siyasi proseslər gərginləşəcək”.
Vidadi ORDAHALLI
