Rəsmi İrəvan qonşularla sərhədi tam bağlasa, Ermənistanda tənəzzül baş verəcək. Bunu “Trend”ə rusiyalı ekspert Yevgeni Mixaylov Ermənistan rəhbərliyinin İran və Gürcüstanla sərhədləri bağlamamaq qərarını şərh edərkən deyib.
Onun sözlərinə görə, İrəvan hələlik iki ziyandan daha azını seçir: “Ermənistan ona görə belə qərar qəbul edib ki, İranla sərhədi bağlamaq öz vətəndaşları üçün vəziyyəti daha da çətinləşdirəcək”.
Koronavirus təhlükəsinə gəldikdə isə, ekspert hesab edir ki, pandemiya hələ yoxdur, epidemiya da müşahidə olunmur: “Bir çox ölkələrin nəzarət məntəqələrində səfər edənlərdə xəstəlik əlamətlərini müəyyən edən mütəxəssislər işləyir. Çox yerdə yoluxanlar aşkar edilib, amma söhbət tək-tək hallardan gedirsə, o zaman vəziyyət nəzarət altındadır”.
Y.Mixaylov bildirib ki, Ermənistan epidemiloji vəziyyətə nəzarət etməsə, bu, regional təhdidə çevriləcək:“İndi əsas məsələ İrəvanın məsuliyyətindədir. Biz İrəvanın koronavirusla mübarizəyə nə dərəcədə hazır olduğunu bilmirik və bu narahatlıq doğurur. Amma iqtisadi blokada şəraitində rəsmi İrəvan sərhədləri tam bağlaya bilməz”.
Ekspertin sözlərinə görə, Rusiyaya gəldikdə, indi İrəvanla əlaqənin kəsilməsini gözləmək lazım deyil:“Amma koronavirusun yayılması Ermənistanda kütləvi xarakter alsa, Moskva radikal addımlar ata bilər. O zaman Rusiya Ermənistanla əlaqəni kəsməli olacaq”.
