Sosial şəbəkələrdə AXCP tərəfdarı olan bir qrup qadının aksiya zamanı təzyiqlə üzləşməsinə dair məlumatlar paylaşılır. Həmin xəbərlərə bir qadının polis tərəfindən döyüldüyünü əks etdirən fotolar da əlavə edilir. Daxili İşlər Nazirliyi tərəfindən yayılan rəsmi məlumatda isə həmin görüntünün montaj olunduğu bildirilir.
Daxili İşlər Nazirliyinin Mətbuat Xidmətindən verilən məlumata görə, bu iddialar yalan və böhtan olmaqla yanaşı, həm də qərəzlidir: "Son günlər sosial şəbəkələrdəki bəzi səhifələrdə fevralın 28-də Daxili İşlər Nazirliyinin inzibati binası önündə bir qrup qadının aksiya keçirməyə cəhd göstərməsi zamanı onlardan birinə guya polis əməkdaşı tərəfindən üz nahiyəsinə xəsarət yetirilməsi barədə əsassız ittihamlar paylaşılır. Belə ki, AXCP tərəfindən aldadılaraq və istiqamətləndirilərək 10-15 qadın həmin gün razılaşdırılmamış, qanunsuz aksiyaya cəhd göstəriblər. Onlardan bəzilərinin azərbaycanlı xanıma xas olmayan tərzdə ictimai asayişi mühafizə edən polis əməkdaşlarının ünvanına təhqiramiz ifadələr işlətmələrinə və əxlaqdan kənar hərəkətlər etmələrinə baxmayaraq, polis əməkdaşları dözümlülük və təmkinlilik nümayiş etdirərək öz xidməti vəzifələrini yerinə yetiriblər. Bu zaman xəsarət alan və saxlanan olmayıb.
O ki qaldı sosial şəbəkələrdəki səhifələrdə paylaşılan, üzündə xəsarət olan qadının fotolarına, oradan açıq-aydın görünür ki, bu fotolar ya montaj edilib, ya da həmin qadının özünün bilərəkdən və məqsədli şəkildə çəkdiyi makiyajdan başqa bir şey deyil".
Göründüyü kimi, rəsmi məlumatda fotonun montaj edildiyi və ya qadının guya sifət nahiyəsinə xəsarət yetirildiyini sübut etmək üçün xüsusi makiyajdan istifadə etdiyi bildirilir. Polisi nüfuzdan salmaq üçün istifadə olunan bu yeni metodla bağlı ekspertlərin düşüncəsi necədir?
Şəmsəddin Əliyev: “Azərbaycan polisini nüfuzdan salmağa yönələn bu cür böhtanlarla bağlı həm də lazımi hüquqi ölçü götürülməlidir”
Hüquqşünas Şəmsəddin Əliyev “Bakı-Xəbər”ə açıqlamasında bildirdi ki, vətəndaşların təhlükəsizliyinin təmin olunduğu, ictimai asayişin gözəl qorunduğu bir ölkədə polisə atılan bu böhtan ayaq tutar, ancaq yeriməz: “Biz həmin aksiyanın gedişini izləmişik. O cümlədən, həmin hadisə ilə bağlı rəsmi bəyanat da verilib. Hər halda, rəsmi bəyanatın verilməsi konkret faktlara əsaslanır. Həmin ətrafda kifayət qədər müşahidə kamerası var. Hamısı araşdırıldıqdan sonra həmin münasibət açıqlanıb. Əgər hər hansı polisin əməlində qadını döymək aşkar olunardısa, onun barəsində dərhal tədbir görülərdi. Təbii ki, polis qanunsuz aksiyanın qarşısını almalıdır. Həmin vaxt qadınlar polisi provokasiyaya çəkiblər. Ancaq gəlin görək bizim polis necə davranıb? Mən bu cür hadisələri Avropa ilə müqayisə edirəm. Analoji vəziyyətlərdə aksiyaçıların üstünə at sürürlər, it salırlar, su şırnağından istifadə edirlər. Bizdə isə bunların heç biri olmursa, radikal dairələrin təsiri altında olan xanımlar gedib polisi bu üsulla şərləyib, sosial şəbəkələrdə paylaşırlar. Azərbaycan polisinin işi ilə bağlı biz vətəndaş məmnunluğunun hansı səviyyədə olduğunu bilirik. Bunu bəzi radikal dairələrin gözü götürmür. Bu səbəbdən də polisin şərəfli adını ləkələmək, onların qanuni fəaliyyətinə kölgə salmaq yolunu tuturlar. Aksiya zamanı həmin qadınlar əynində Azərbaycanın atributlarını gəzdirən polisə qarşı çox nalayiq hərəkətlərə yol verdilər. Bunun müqabilində polisin cavabı çox humanist olub. Polisə qarşı edilən bu haqsızlıqları kəskin şəkildə pisləyirik. Azərbaycan polisini nüfuzdan salmağa yönələn bu cür böhtanlarla bağlı həm də lazımi hüquqi ölçü götürülməlidir”.
Məhəmmədəli QƏRİBLİ
