Azərbaycan özü və qonşuları üçün enerji təhlükəsizliyini təmin edən ölkədir. Bunu Prezident İlham Əliyev Bakıda, Heydər Əliyev Mərkəzində “Cənub Qaz Dəhlizi” Məşvərət Şurası çərçivəsində nazirlərin VI toplantısında çıxışı zamanı deyib.
Ölkə başçısının sözlərinə görə, bizim təsdiqlənmiş qaz ehtiyatlarımız 2,6 trilyon kubmetr, proqnozlaşdırılan ehtiyatlar 3 trilyon kubmetr civarındadır: “Azərbaycan 100 ildən çox müddət üçün karbohidrogen ehtiyatlarının etibarlı təchizatçısı olacaq. Bu gün ənənəvi tərəfdaşlarımızla – “Şahdəniz”, “Azəri-Çıraq-Günəşli” konsorsiumlarına rəhbərlik edən və strateji tərəfdaşımız olan BP ilə “D 2030” adlandırılan layihə üzərində çalışırıq. Bu, 2018-ci ildə qüvvəyə minib. BP ilə birlikdə biz “Şəfəq- Asiman” qaz yatağı üzərində çalışırıq və ilk quyu çox tezliklə qazılmalıdır. Biz BP ilə, həmçinin, “Dayazsulu” adlandırılan layihə üzərində çalışırıq. Bu layihənin aşkar edilməyən yataqlar baxımından böyük potensialı var, çünki o, sahilə çox yaxın yerləşir və bizim ənənəvi hasilatımız dənizdə aparılırdı. Gələn il biz “Total”la 300 milyard kubmetr qaz potensialı olan “Abşeron” yatağından qaz hasilatına başlayacağıq. SOCAR fəal şəkildə “Ümid-Babək” yatağının işlənilməsi ilə məşğuldur”.
Prezident İlham Əliyev onu da deyib ki, bunlar hamısı beynəlxalq bazarlarda iştirakımızın genişləndirilməsi, şaxələnmiş üsullarla karbohidrogen ehtiyatlarımızın ixracı və xalqımız üçün daha yaxşı şəraitin yaradılmasından ibarət olan strateji məqsədlərimizin həyata keçirilməsinə töhfə verəcək.
Göründüyü kimi, Azərbaycan dünyada enerji təchizatçısı rolunu uğurla həyata keçirir. Bununla bağlı nə mümkündürsə onu edir. O baxımdan bəs digər dövlətlər, beynəlxalq təşkilatlar Azərbaycanın 100 il özünün və başqalarının enerji təhlükəsizliyini təmin etməsi üçün nə etməlidirlər? Bu işə hansı töhfələr verə bilərlər?
“Ona görə də aparıcı ölkələr işğalçı dövləti beynəlxalq öhdəlikləri yerinə yetirməyə məcbur etməlidirlər”
Məsələyə münasibət bildirən politoloq Elçin Mirzəbəyli buna bir neçə rakursdan yanaşdı: “Ümumilikdə, böyük dövlətlər, beynəlxalq təşkilatlar Azərbaycanın enerji siyasətini dəstəkləyirlər. Bunun nəticəsidir ki, bir sıra enerji layihələri həyata keçirildi. Enerji ilə bağlı keçirilən bir sıra böyük tədbirlərdə aparıcı dövlətlər, beynəlxalq təşkilatlar, böyük şirkətlər iştirak edirlər. Azərbaycanın ortaya qoyduğu layihələrə hərtərəfli dəstək verirlər. Bundan sonra da Azərbaycan region və dünya dövlətləri üçün etibarlı enerji təchizatçısı rolunda çıxış edəcək. Ancaq aparıcı dövlətlər, beynəlxalq təşkilatlar bu məsələdə regionda təhlükəsizliyin gücləndirilməsinə xüsusi önəm verməlidirlər. İqtisadi-siyasi dəstək öz yerində. Ancaq nəzərə almaq lazımdır ki, Ermənistanın apardığı işğalçılıq siyasəti region üçün bütün hallarda təhdid mənbəyidir. Ona görə də aparıcı ölkələr işğalçı dövləti beynəlxalq öhdəlikləri yerinə yetirməyə məcbur etməlidirlər. Hesab edirəm ki, bu təmin edilsə, o zaman bunun effekti daha böyük olacaq”.
Vidadi ORDAHALLI
