Dağlıq Qarabağdakı qondarma separatçı qurumda vəziyyət gərginləşir. Bəzi erməni media orqanları bunu inqilaböncəsi vəziyyətə bənzədirlər. Məlumata görə, separatçı qurumda yaşayan əhalinin narazılığı artır. Bunun başlıca səbəbi sosial-iqtisadi vəziyyətin dözülməz dərəcədə ağır olmasıdır.
Erməni mediası yazır ki, qondarma “DQR”də əhalinin 80% -dən çoxu illərdir kredit çuxurundan çıxa bilmir. Əhali soruşur ki, “artsaxlıların” qaçılmaz iqtisadi rifahı barədə “DQR” hakimiyyətinin verdiyi çoxsaylı vəd hara getdi? Qarabağda, demək olar ki, hər ikinci ailə elementar məişət texnikası almaq üçün ailənin daş-qaşını girov qoymaq məcburiyyətində qalır, avtomobil isə yalnız mənzil və evləri girov qoymaqla alınır.
Bu arada Qarabağdakı ağır sosial-iqtisadi vəziyyətlə bağlı “Azadlıq” radiosunun Ermənistan xidməti vidiosüjet yayıb. Videosüjeti “Azadlıq” radiosunun Ermənistan xidmətində yaydıqdan sonra radionun Ermənistan redaksiyası bu süjeti blokladı. Daha sonra həmin radionun Ermənistanda yayımına məhdudiyyət qoyulub. Həmin süjetdə radiostansiyanın irəvanlı müxbiri Sarqis Arutyunyan Qarabağ sakinləri arasında sorğu keçirib və adamların 99% -i bildirib ki, artıq ərzaq məhsullarını borca alırlar. Məlum olub ki, separatçı qurumda kriminal rejim hökm sürür.
“Demokratiyadan danışan Paşinyan söz azadlığını boğur”
Sözügedən məsələ ilə bağlı fikirlərini “Bakı-Xəbər”lə bölüşən politoloq Məhəmməd Əsədullazadənin sözlərinə görə, Ermənistan işğalda saxladığı Azərbaycan ərazilərində ermənilərin sosial-iqtisadi vəziyyətini yaxşılaşdırmaq iqtidarında deyil: “Bu yöndə görülən işlər imitasiya xarakterli olub. Bu gün Ermənistanın özündə əhali çətin sosial durumdan ölkəni tərk edir. Qarabağda yaşayan əhali necə burada dolanacaq? Əsasən Xankəndidə bir qisim erməninin dolanışığı normaldır. Digər ərazilərdə ermənilər çox pis vəziyyətdə yaşayırlar. Çəkilən kadrlardan görünür ki, elementar yaşayışa malik deyillər. Necə deyərlər, tövlədə yaşayırlar. Ermənistan burada sosial vəziyyəti yaxşılaşdırmaq üçün heç bir güclü maliyyə imkanlarına sahib deyil. Onlar Qarabağa ikinci sort kimi baxırlar. Bundan sonra da Ermənistan dövlət siyasətində buradakı ermənilərin vəziyyətini yaxşılaşdırmaq üçün heç bir layihə irəli sürməyəcək. İşğal olunmuş ərazilərdə Ermənistanın məskunlaşma siyasəti bir il ərzində fiaskoya uğrayır. Digər yerlərdən köçürülən ailələr burada 6 aydan artıq yaşamırlar. Separatçı rejimin üzvləri yalnız burada öz maddi imkanlarını genişləndirirlər. Hesab edirəm ki, nə qədər işğal faktoru aradan qalxmayıb, günü-gündən ermənilər Qarabağda çətin vəziyyətlə üzləşəcəklər. Bir müddətdən sonra digər ərazilərdən də köçəcəklər. İşğalçı ölkə və burada cinayətkar qrup birlikdə Qarabağda məskunlaşma siyasətlərini rahat reallaşdıra bilmirlər. Çünki infrastruktur və digər yaşam imkanları üçün maliyyə yoxdur. Ona görə də ermənilər burada yalnız çobanlıqla məşğuldurlar. Ermənı generalları və separatçılarının mal-qoyununu otarırlar. Bir qisim qocalar da cüzi pul müqabilində Azərbaycanla təmas xəttində postda dayanır. Demokratiyadan danışan Paşinyan söz azadlığını boğur”.
Vidadi ORDAHALLI
