Ermənistanda hakimiyyət daxilində getdikgə özünü daha qabarıq şəkildə büruzə verməyə başlayan problemlər Nikol Paşinyan iqtidarı üçün indi ən böyük təhdidlərdən birinə çevrilib. Hətta fikirlər səslənir ki, hadisələrin indiki şəkildə inkişafı fonunda Paşinyan iqtidarının devrilmə ehtimalı da yüksəkdir. Elə bundan irəli gələrək Nikol Paşinyan Milli Təhlükəsizlik Xidmətinin gizli dinləmə funksiyasını həyata keçirən bölməsinin işlərini gücləndirmək və bu işlə məşğul olanların sayını əhəmiyyətli dərəcədə artırmağı tapşırıb.
Məlumata görə, Paşinyanı tənqid edən bütün şəxslərə qarşı gizli dinləmə və xarici nəzarət həyata keçirmək tapşırılıb. Təkcə Paşinyanı tənqid edənlər deyil, eyni zamanda onu tənqid edənlərin ailə üzvləri və yaxınları da gizli dinləmə obyektidir. Qeyd olunur ki, gizli dinlənilənlərin bu cür misli görünməmiş sayı heç vaxt olmayıb. Artıq Ermənistan Milli Təhlükəsizlik Xidməti resursunun böyük bir hissəsi Ermənistanda Paşinyan əleyhdarlarına qarşı nəzarət həyata keçirmək və bu barədə ona məruzə etmək üzərində mərkəzləşib. Məlumata görə, Ermənistan Milli Təhlükəsizlik Xidməti zabitlərindən bir çoxu yaranmış misilsiz vəziyyətə sadəcə heyrət edir.
Ermənsitanın “Qraparak” nəşri yazır ki, hadisələrin bu səpkidə inkişafını şərtləndirən əsas məqamlardan biri Paşinyan komandasının monolitlikdən uzaq olmasıdır. Qəzetin yazdığına görə, elə gün yoxdur ki, Ermənistanda yeni bir qalmaqal yaranmasın və hansısa bir cavabdehin bəyanatı dövlətin birinci simalarının dodaqlarından səslənməsin:“Referendumun seçkiqabağı təbliğat mərhələsində olduğu üçün məlumat verilməlidir ki, bu cür bəyanatlar, qalmaqallar getdikcə artacaq, vəziyyət daha da idarəolunmaz olacaq və insanlar daha çox təşvişə düşəcəklər. Məsələn, bu günlərdə hökumət rəhbəri hüquq-mühafizə orqanları rəhbərlərini yanına çağırıb, onların iştirakı ilə korrupsiyaya qarşı yönəlmiş alovlu bir çıxış edərək növbəti populist təbliğat aktını həyata keçirib. Çıxışın qısa mənası bu olub ki, ötən 2 il ərzində Ermənistan korrupsiyaya qarşı mübarizədə misilsiz uğurlar qazanıb. Lakin Nikol Paşinyan templərdən, xüsusilə də “dövlət reketi” ölçülərindən razı qalmayıb. Bu “dövlət reketi” adı altında müxtəlif varlılardan mühakimə, məhkəmə, normal hesablamalar olmadan və zərərlərin ölçüləri dəqiqləşdirilmədən böyük məbləğlər toplanır. Hökumət rəhbəri razı deyil, çünki “hüquq-mühafizə sisteminin rəhbərləri” arasında hansısa “tapşırıqları” yerinə yetirmiş “xainlər” olub. Bu “xainlər” kimlərdir? Onlar kimin və hansı göstərişləri yerinə yetiriblər? Niyə bunlar tapılmayıb və cəzalandırılmayıb? Nə bir söz, nə də bir konkret say və ya ad. Əlbəttə, bu məsuliyyətsiz münasibət sözdə yeni deyil. Qeyd etməyə məcburuq ki, Nikol Paşinyan təkcə “ağlar”ın yox, eyni zamanda savadsızların baş naziridir”.
Ermənistanın “Milli Gündəm” partiyasının həmtəsisçisi Avetik Çalabyan da eyni mövqedən çıxış edir:“Nikol Paşinyan özünəməxsus sensasion üslubda bildirdi ki, Ermənistanın hüquq-mühafizə sisteminin ən yuxarı halqalarında soyğunçulara qarşı mübarizə aparmağa və xalqa vəd etdiyi milyardları geri qaytarmağa mane olan xainlər var. Amma hesab etmək olardı ki, bu onun təxəyyülünün növbəti məhsuludur. Paşinyan sui-qəsdlər nəzəriyyəsinə qayıdıb və artıq rəhbərlik etdiyi hüquq-mühafizə orqanlarında xainlər tapıb”. Ermənistanın “Past” nəşrində dərc olunan məqalədə də məsələyə bu prizmadan yanaşılır: “Hakimiyyət dəyişikliyi dövründə Paşinyanla birlikdə addımlayan insanlar, əsasən dövlət idarəetmə aparatı haqqında heç bir təsəvvürə malik olmayan gənclər dərhal rəhbər vəzifələrə gəldilər. Bununla da Paşinyan ümid edirdi ki, heç olmasa dövlət idarəetmə sistemini yeniləyə və fəaliyyətini daha səmərəli və şəffaf edə biləccək. Kadr seçimini edərkən Paşinyan peşəkarlıq və təcrübəni yox, siyasi məqsədəuyğunluğu nəzərə alıb. Ancaq zaman göstərdi ki, eyforiya təsiri altında yüksək vəzifələrə təyin edilənlər özlərini doğrultmur. Paşinyan kadr siyasətinə uygun etdiyi təyinatları Ermənistanda artıq korrupsiyanın olmadığını bildirmək üçün kifayət hesab etsə də, zaman bunun əksini sübut etdi. Çünki bəzi öz təyin etdiyi kadrları, dövlət nəzarəti xidmətinin rəhbəri, elm, təhsil, idman və mədniyyət nazirinin müavini və şəhərsalma komitəsinin sədri, indi də Acapnyak məhəlləsinin rəhbəri və sair şəxslər korrupsiya qalmaqalları ilə ortaya çıxdılar. Bu, mövcud hakimiyyət üzvlərinin korrupsiyadan azad olmadığını göstərdi. Hətta mətbuat konfranslarının birində baş nazir kadr siyasətində nöqsanların olduğunu etiraf etməli oldu. Bununla belə, kadr siyasətinin problemləri bunlarla məhdudlaşdırmır, çünki bir çox digər dövlət məmurları aşağı səviyyəli peşəkarlıqları ilə məşhurdurlar. Yəqin ki, bir çox məsələlərin baş nazirə çatmayanadək və ya baş nazir müdaxilə etməyənə qədər həll edilməməsinin səbəbi budur. Ümumiyyətlə, mövcud problemlərin həlli ilə bağlı cəmiyyətin müxtəlif tələbləri aidiyyəti qurumlara deyil, ilk növbədə baş nazirə ünvanlanır. Siyasi baxımdan məqsədəuyğunluğundan irəli gəlsə də, baş nazir bütün dövlət sistemini inqilaba qarşı çıxmaqda günahlandırır, amma digər tərəfdən bu, hökumətin “əksinqilabçı” dövlət idarəetmə sistemini işlədən məktəb səviyyəli nazirləri işə götürdüyünü, vəzifəyə təyin etdiyini etiraf edir. Bu çərçivədə vacib bir məsələ ictimai maraq kəsb edir. Hökumətin müxtəlif səviyyələrində çalışan yüksək səviyyəli dövlət məmurlarının iş qabiliyyəti, peşəkarlığı aşağıdırsa, dövlət büdcəsindən milyonlarla dram şəklində mükafatları necə alırlar? İş fəaliyyəti nəticəsində ictimaiyyətə fayda verməyi bacaran məmurlar, mükafat alacaq nazirlər və digər yüksək vəzifəli məmurlar üçün qiymətləndirmə miqyası tətbiq etməyin vaxtı çatmadımı?”. Rusiya Siyasi Müşavirlər Assosiasiyasının üzvü Yuliya Mileşkina bildirir ki, belə vəziyyətdə elə öz komandası da Paşinyanı devirə bilər. Onun sözlərinə görə, qeyri-peşəkar komanda özünə təhdid yarandıqda asanlıqla Paşinyanın rəqibləri ilə birləşib baş naziri oyundan kənarlaşdıracaq.
Nahid SALAYEV
