Rusiya mediasında Xocalı və Sumqayıt hadisələri ilə bağlı dərc edilən obyektiv yazılar Ermənistan rəsmi dairələrini və onların Moskvadakı havadarlarını özündən çıxarıb. Xüsusilə də Lev Əsgərovun Rusiyanın məşhur "Nezavisimaya qazeta" nəşrində dərc edilən və 1988-ci ildə Sumqayıtda baş verən hadisələrdən bəhs edən yazısı onları daha da özündən çıxarıb.
Məlumat üçün bildirək ki, Lev Əsgərov "Sumqayıt faciəsi. Necə başlanıb və nə baş verib?” sərlövhəli yazısında arxiv materiallarına istinadən Sumqayıt hadisələrinin əsl iştirakçılarının ermənilər olduğunu göstərir. Onun məlum yazısının araşdırılması ilə bağlı Ermənistanın Rusiyadakı səfirliyi prokurorluğa müraciət edib və məqaləni milli münasibətləri qızışdıran təbliğat kimi qeyd edib. Erməni soyadlı tanınmış jurnalist Roman Babayan isə özünün sosial şəbəkə hesabında məqalənin müəllifini təhqir edib. Babayanın yazdığı postdan görünür ki, o, Azərbaycanı yaxşı tanıdığını deyir: “Mən, əlbəttə, bilirəm ki, jurnalistlər arasında satqın yoldaşlar var, amma öz sadəlövhlüyümə görə düşünürdüm ki, hətta bu kateqoriyadan olan “həmkarlarım” üçün müəyyən sədd var ki, onu adlaya bilməzlər. 1988-ci ilin fevral ayında Sumqayıtda baş verən hadisələr haqqında “Nezavisimaya qazeta”da material dərc ediləndən sonra başa düşdüm ki, bu, belə deyil. Prinsipsizlik, alçaqlıq və satqınlıq. Digər sözlər seçmək çətindir. Sovet Azərbaycanındakı erməni qırğınlarının bütün dəhşətini keçmiş bir adam kimi deyə bilərəm ki, əgər siz o materialı pula görə dərc etmisinizsə, sadəcə olaraq, alçaq və əclafsınız!”.
R.Babayan yazısında 90-cı il hadisələrini də gözü ilə gördüyünə işarə edib.
Erməni mediası “Danışır Moskva” radiostansiyasının baş redaktoru R.Babayanın bu fikirlərini geniş tirajlayıb. Maraqlıdır, R.Babayanın Azərbaycanla hansı əlaqəsi olub ki, o guya buradakı qırğınları gözü ilə gördüyünü yazır?
Müasir jurnalistlər arasında onu şəxsən tanıyan olmadı. İnternet üzərindən apardığımız araşdırma zamanı isə məlum oldu ki, Babayanı Azərbaycanla bağlayan tellər həqiqətən var. O, 1967-ci ilin 7 dekabr tarixində Bakı şəhərində rusla erməninin qarışıq nikahda olduğu ailədə doğulub. İki il Azərbaycan Politexnik İnstitutunda təhsil aldıqdan sonra hərbi xidmətə yollanıb. 1986-cı ildə Sovet ordusunda xidmət edib. Xidmətini Macarıstanda keçib. Ordudan qayıtdıqdan sonra isə 1988-ci ildə təhsilini Moskvada “televiziya və radio” üzrə davam etdirib. 1991-ci ildə televiziya və radio mühəndisi ixtisası üzrə ali təhsilini başa vurub. Elə həmin ildən də Rusiyanın Dövlət Televiziyasında çalışmağa başlayıb. 1994-2000-ci illərdə isə “Vesti” proqramında çalışıb. İngilis və türk dillərində bilir. Sonrakı illərdə R.Babayan bir çox telekanal və radioada çalışıb. 8 sentyabr 2019-cu ildə Moskva Şəhər Dumasına deputat seçilib. Ailəlidir, 3 övladı var. Rusiyanın bir çox ali dövlət təltifləri ilə mükafatlandırılıb.
R.Babayanla qısa tanışlıq kifayət etdi ki, onun xislətinə bələd olaq. Azərbaycanla onu bağlayan burda doğulmağı, buranın suyu, havası və çörəyi ilə böyüməsi olub. Ancaq uzun müddət Moskvada tanınmış yerlərdə işləsə də, erməni xislətini yerə qoya bilməyib. Əsl erməniyə yaraşan tərzdə Rusiya mətbuatında işıq üzü görən obyektiv məqaləyə təhqir və böhtanla cavab verib.
Məhəmmədəli QƏRİBLİ
