Azərbaycan Prezidenti İlham Əliyev və Birinci vitse-prezident Mehriban Əliyeva eks-prezident Ayaz Mütəllibovla “Ana harayı” abidəsini ziyarət edərkən salamlaşıblar.
Qeyd edək ki, Azərbaycan Prezidenti İlham Əliyev və Birinci vitse-prezident Mehriban Əliyeva Xocalı soyqırımının 28-ci ildönümü ilə əlaqədar Xətai rayonunda faciə qurbanlarının xatirəsinə ucaldılmış abidəni ziyarət ediblər. Bu zaman mərasimdə iştirak edən Ayaz Mütəllibov Azərbaycan Prezidenti və Birinci vitse-prezidentlə görüşüb.
Xatırladaq ki, A.Mütəllibov Xocalı soyqırımından bir neçə gün sonra vəzifəsindən istefa verib.
Bu mənzərə bizi bir paralel aparmağa vadar etdi. Azərbaycanda və Ermənistanda eks-prezidentlərə olan münasibət necədir?
Azərbaycanın eks-prezidentlərindən olan Əbülfəz Elçibəyin ailəsi onlara verilmiş yüksək statusdan bəhrələnə bilir. Ötən il Heydər Əliyev Fondunun prezidenti Mehriban xanım Əliyevanın tapırığı əsasında Əbülfəz Elçibəyin Bakı şəhərində olan mənzili əsaslı şəkildə təmir olundu. Azərbaycanın digər eks-prezidenti Ayaz Mütəllibovla da bağlı bir sıra humanist addımlar atılıb. Vaxtilə onunla bağlı qaldırılan cinayət işi ləğv olunub, onun Azərbaycanda yaşamasına şərait yaradılıb. Ayaz Mütəllibov da hazırda eks-prezident statusuna sahibdir. Bəs Ermənistanda vəziyyət necədir?
Hazırda Ermənistanda üç eks-prezident var. Onlardan biri Levon Ter Petrosyandır. Onun vəziyyəti nisbətən yaxşıdır. Bu heç də eks-prezidentin statusundan qaynaqlanmır. Paşinyanla Levon Ter Petrosyan arasında olan şəxsi dostluq münasibətlərinə söykənən amildir. Çünki biz analoji isti yanaşmanı digər iki eks-prezidentə münasibətdə görmürük. Həmin eks-prezidentlərdən biri sayılan Robert Köçəryanı Paşinyan hakimiyyətə gələn kimi həbsə saldırdı. Hətta bu məsələdə, demək olar ki, hüququ tapdaladı. Köçəryanı məhkəmə həbsdən azad etsə də, onun zor gücünə yenidən həbsxanaya göndərilməsinə nail oldu. Rusiya Prezidenti Vladimir Putin iki dəfə Köçəryana həbsxanaya məktub yazıb və onu müəyyən ələmatdar günlər münasibətilə təbrik edib. Həmin məktubların mətnləri medaida yayılıb və aydın hiss olunub ki, Putin də Köçəryanın həbsdə qalmasını istəmir. Hətta bu cür beynəlxalq diqqətə baxmayaraq, Paşinyan eks-prezidenti dörd divar arasında saxlayır. Digər eks-prezident Serj Sarkisyana qarşı da cinayət işi qaldırılıb. Onun bütün yaxın qohumları, demək olar ki, həbsdədir. Paşinyan hakimiyyəti Serj Sarkisyanı da daim həbs oluna biləcəyi şantajı altında saxlayır.
Bu müqayisə bir daha göstərir ki, Ermənistan dövlətçilik ənənələrinə sayğı, siyasi opponentlərə ehtiram göstərmək baxımından da Azərbaycandan qat-qat geri qalır. Qeyd edək ki, İlham Əliyevin Ayaz Mütəllibova xüsusilə də Xocalı faciəsi ilə bağlı anım tədbirində göstərdiyi diqqət həm də Ermənistanın mövcud hakimiyyətinin yalanını bir daha ifşa etmiş oldu. Çünki Paşinyan Münhendə keçirilən debatda demişdi ki, guya Ayaz Mütəllibov bu qətliamın müxalifət tərəfindən törədildiyini deyib. Düzdür, Ayaz Mütəllibov onun iddiasını rəsmən təkzib etdi. Ancaq Azərbaycanın mövcud və eks-prezidentlərinin məhz Xocalı abidəsi önündə salamlaşması Paşinyanın növbəti fiaskosu sayıla bilər.
Məhəmmədəli QƏRİBLİ
