Məlum olduğu kimi, Azərbaycan-Türkiyə Yüksək Səviyyəli Strateji Əməkdaşlıq Şurasının Bakıda keçirilmiş VIII iclasının yekununda iki ölkə arasında müdafiə və təhlükəsizlik sektorunda əməkdaşlığa dair bir neçə sənəd imzalanıb.
İclas başa çatdıqdan sonra Prezident İlham Əliyevin və Prezident Rəcəb Tayyib Ərdoğanın iştirakı ilə Azərbaycan-Türkiyə sənədlərinin imzalanması mərasimi olub. Azərbaycanın Müdafiə naziri general-polkovnik Zakir Həsənov və Türkiyənin Milli Müdafiə naziri Hulusi Akar “Azərbaycan Respublikası Hökuməti ilə Türkiyə Respublikası Hökuməti arasında hərbi-maliyyə əməkdaşlığı haqqında Saziş”i və “Azərbaycan Respublikası Hökuməti ilə Türkiyə Respublikası Hökuməti arasında maliyyə yardımının tətbiqi haqqında Protokol”u imzalayıblar.
İclasın yekununa dair mətbuat qarşısında çıxış edən Prezident İlham Əliyev görüşdə müdafiə sahəsində birgə gələcək işbirliyi haqqında fikir mübadiləsinin aparıldığını qeyd edib: “Təkcə keçən il 13 birgə hərbi təlim keçirilmişdir. Bu il isə hərbi təlimlərin sayı daha da çox olacaq. Azərbaycan Türkiyədən müasir silahların alınmasını davam etdirəcək və bu gün biz birgə istehsalın təşkili haqqında da danışmışıq”.
Görünən odur ki, Türkiyə ilə imzalanan yeni hərbi-maliyyə sazişi müttəfiqlik tarixində yeni dövr açacaq. Bunun sayəsində qardaş ölkədən yeni silahlar alınacaq. Digər tərəfdən, ordumuzun döyüş imkanları bir qədər də artırılacaq.
Maraqlıdır, bəs ekspertlər iki ölkə arasında imzalanan yeni hərbi-maliyyə sazişinin əhəmiyyətini necə dəyərləndirirlər?
“Bütün bunlar Azərbaycanın hərbi nöqteyi-nəzərdən daha da güclənməsinə xidmət edəcək”
Sözügedən məsələ ilə bağlı fikirlərini “Bakı-Xəbər”lə bölüşən ehtiyatda olan polkovnik-leytenant, hərbi ekspert İbrahim Rüstəmlinin fikrincə, yeni hərbi-maliyyə əməkdaşlığı sazişi hərbi-siyasi nöqteyi-nəzərdən mühüm əhəmiyyət kəsb edir: “Bəlli olduğu kimi, Türkiyə Azərbaycanın ən yaxın və böyük müttəfiqlərindən biri sayılır. İstər beynəlxalq aləmdəki hərbi gücünə, istərsə də regiondakı siyasi mövqeyinə görə regionda ən böyük güc mərkəzlərindən biri kimi tanınır. Çünki Türkiyə çox böyük və qüdrətli orduya malikdir. Azərbaycanla Türkiyə neçə ildir hərbi əlaqələrə malikdirlər. Bu əlaqələrin yeni müstəvidə inkişafı ilə bağlı imzalanan saziş hərbi-siyasi nöqteyi-nəzərdən mühüm əhəmiyyət kəsb edir. Bu, iki ölkənin müttəfiqlik tarixində yeni bir mərhələ açacaq. Zatən, Azərbaycan Türkiyədən hər zaman bir qardaş dəstəyi görüb. Türkiyə Azərbaycana təmənnasız kömək edən yeganə dövlətdir. Bu sırada onun mövqeyini paylaşan ikinci bir dövlət yoxdur. Bu mənada, Azərbaycanın indiki dövrdə Türkiyə ilə hərbi-maliyyə əməkdaşlığını genişləndirməsi iki ölkə əlaqələrinə yeni rəng qatacaq. Bu əlaqələrin daha yeni bir müstəvidə inkişafına stimul verəcək. Bütün bunlar Azərbaycanın hərbi nöqteyi-nəzərdən daha da güclənməsinə xidmət edəcək. Türkiyədən yeni müasir silahlar alınacaq. O üzdən, iki ölkə arasında hərbi əlaqələrin daim genişlənməsi vacibdir. Çünki Azərbaycan işğaldan əziyyət çəkir. Torpaqlarının müəyyən faizi erməni işğalı altındadır. Ona görə də biz hərbi gücümüzü daha da artırmalıyıq. Bu cür müqavilələr hər iki ölkənin mənafeyinə xidmət edir”.
Vidadi ORDAHALLI
