Məlumdur ki, Ermənistan hökuməti silahlı qüvvələrdə qeyri-döyüş itkilərinin artmasına dair aparılan müzakirələrdən sonra, kadr dəyişiklikləri də daxil olmaqla, bəzi qərarlar verib. Bu xüsusda baş nazir Nikol Paşinyanın tələbi ilə ölkə prezidenti Armen Sarkisyan artıq iki generalı tutduğu vəzifədən uzaqlaşdırıb.
Onlardan biri Ermənistan Silahlı Qüvvələrinin Mənəvi-Psixoloji Təminat üzrə İdarəsinin rəisi Aleksan Aleksanyandır. Aleksanyanın vəzifədən uzaqlaşdırılması orduda baş verən sensasiyalı hadisələrin nəticəsidir. Belə ki, bu ilin əvvəlindən Ermənistan ordusunda 13 hərbi qulluqçu ölüb. Bütün ölüm faktları dinc şəraitdə qeydə alınıb.
Bununla yanaşı, Ermənistanın Hərbi Polis İdarəsinin rəisi general-mayor Artur Bağdasaryan da vəzifəsindən azad edilib. Bildirilir ki, Bağdasaryan hakimiyyət dəyişikliyindən sonra da hərbi polis sistemində korrupsiya əməlləri, kadr alveri ilə məşğul olub. Əməkdaşları heç bir əsas olmadan işdən azad edib, daha sonra bərpa etmək üçün 4-6 min dollar tələb edib. Heç kimin onun bu korrupsiya əməlləri və qanunsuzluqları barədə danışmağa, etiraz etməyə cürət tapmaması üçün bütün əməkdaşları qorxu altında saxlayıb. Hərbi polisin indiki və keçmiş əməkdaşlarının sözlərinə görə, Bağdasaryan keçmiş hərbi polis rəislərindən, xüsusilə Levon Yeranosyandan daha rüşvətxordur. Onun indiki əməkdaşlarının sözlərinə görə, kadr alverindən başqa, onlara ayrılan benzini də satıb. Bəzi məlumatlara görə, onun vasitəsilə aylıq 20-30 ton benzin satılır. Əldə edilən məlumatlara görə, Paşinyana, yaxud Tonoyana yazılan şikayət məktubları geri - Bağdasaryana qaytarılıb və o da şikayətçi hərbi polis əməkdaşlarını çağırıb, qisas alaraq haqq-hesab “çürüdüb”. Amma o, indiyə qədər digər generallar tərəfindən himayə olunub. Xüsusən də Ermənistan Silahlı Qüvvələrinin Baş Qərargah rəisi Artak Davtyan tərəfindən. Xatırladaq ki, elə sonuncu da Paşinyanın hədəfindədir. Erməni mediası yazır ki, vəzifədən çıxarılan iki general da məhz Artak Davtyanın adamları sayılıb. Onların ardınca Artak Davtyanın da istefası gündəmdədir. Düzdür, sonuncu bununla razılaşmır və Paşiynana qarşı güclü müqavimət formalaşdırmaq istiqamətində addımlar da atır. Erməni hərbi ekspert Mher Akobyan bildirir ki, Davtyan Paşinyana qarşı digər generalları da cəlb edə bilsə, hakimiyyətlə ordu arasında qarşıdurma qaçılmaz olacaq: “Mən prinsipcə son günlərdə orduda baş verən hadisələrin hansısa daxili qüvvələrin sui-qəsdi ilə təşkil olunması halını istisna edirəm. Problem ondadır ki, hazırda orduda “köhnə” və “yeni” Ermənistanın müəyyən qədər toqquşması var, yəni ordu idarəetməsi hələ də hansısa qaydada köhnə standartlarla idarə olunur və bununla bağlı mən hərbi rəhbərliyin rolunu mənfi mənada ayırardım. Faktdır ki, orduda dəyişiklik üçün hərbi rəhbərliyin tam heyətdə dəyişməsi lazımdır. Bunu indiki generalitet istəmir. Ona görə də onların Paşinyana münasibəti mənfidir və müxalif mövqedədirlər”. Keçmiş erməni döyüşçü Pavlik Manukyan isə qeyd edir ki, orduda heç bir şey dəyişməyib, eyni korrupsiyalaşmış generallar, əxlaqsızlar qalıb. Amma o, Paşinyanın da orduya rəhbərlik etmək haqqına sahib olmadığını vurğulayır: “Biz əsgərimizi bir dəfə də tək buraxsaq, ruhdan düşmüş və ümidini itirmiş əsgərə sahib olsaq, vətənimizi itirəcəyik. Qarnizon prokuroru vəzifəsinə orduda xidmət etməmiş, ordudan anlayışı olmayan bir şəxsi təyin edirlər. Əziz insanlar, bizə ordudan anlayışı olmayan və orduda xidmət etməmiş belə nazir, qərargah rəisi, ali baş komandan lazım deyil”.
İndi maraq doğuran məsələ Paşinyanla generalitet arasında ziddiyyətin nə ilə nəticələnəcəyidir. Paşinyan hesab edir ki, generalitet yalnız onun ətrafında cəmləşməlidir. Fəaliyyət sahəsindən asılı olmayaraq köhnə hakimiyyətin yanında olan generallar isə inqilabçı hakimiyyətin hədəfindədir. Bu da onların Paşinyana qarşı birləşməsinə gətirib çıxarıb. Erməni ekspert Sasun Mikayelyan bu vəziyyətdə generalların Paşinyana qarşı sərt addımlar atmasını istisna etmir. Onun sözlərinə görə, Ermənistan hakimiyyəti tərəfindən ardıcıl olaraq proqramlaşdırılmış şəkildə erməni ordusunun təcrübəli yüksək vəzifəli heyəti yox edilir, ordunun zabit heyəti ləkələnir. Burada məsələnin daha bir maraq doğuran tərəfi odur ki, bir vaxtlar Ermənistanın baş naziri Nikol Paşinyanın hakimiyyətə gəlməsinə yardım edən qüvvələr də sıradan çıxarılır. Paşinyan mütləq mənada yeganə hakim qüvvə olmağı düşünür və inqilabda ona yardım edənləri də sıradan çıxarır. “Yerkrapah” hərbi təşkilatı ətrafında baş verənlər bunun real təsdiqidir. Məhz bu durumda “Qarabağ klanı” “Yerkrapah”ı öz sıralarına cəlb edərək onunla Paşinyana qarşı birləşməyi düşünür. Erməni mediası yazır ki, hadisələr bu səpkidə inkişaf edərsə, İrəvanda növbəti hakimiyyət dəyişikliyi qan tökülməsi hesabına baş verəcək. Hər halda, baş verənlər qarşıdakı dövr ərzində Ermənistan ictimai-siyasi həyatını silkələyəcək mühüm dəyişikliklərin olacağını istisna etmir. Hesab edilir ki, güc strukturlarının Paşinyana qarşı dayanması ölkə daxilində silahlı qarşıdurmanın olacağını da aydın şəkildə nümayiş etdirir.
Nahid SALAYEV
