Məlum olduğu kimi, Münhen Təhlükəsizlik Konfransında Azərbaycan Prezidenti İlham Əliyevin 20-ci əsrdə Dağlıq Qarabağla bağlı baş verən tarixi hadisələri xatırlatması fonunda Ermənistan Baş naziri Nikol Paşinyan erməni əfsanələrindən misal gətirərək iddia edib ki, guya Tiqranın vaxtında regionda yalnız ermənilər və gürcülər olub.
Bu arada Paşinyanın “erməni hökmdarı” Böyük Tiqrana “sığınması” bəzi araşdırmalara yol açıb. Məlum olub ki, tarixdə heç də müsbət şəxsiyyət və böyük sərkərdə kimi xatırlanmayan Böyük Tiqranın ermənilərə heç bir aidiyyətinin olmaması aydındır. Ancaq məsələ burasındadır ki, Nikol Paşinyanın özünün saxta tarixə “istinad etməsi” vaxtilə yazdığı məqalələri bir daha gündəmə gətirib. Nikol Paşinyan bu məqaləsini özünün redaktoru olduğu “Aykakan Jamanak” qəzetində 9 dekabr 2005-ci ildə çap etdirib. Paşinyan yazısında bildirib ki, əcdadlarına nifrət edir və bunun səbəbini belə əsaslandırıb: “Bizim əcdadlarımız bizə, sadəcə, belə soyqırımlar, alçaldılmalar, satqınlıqlar və əxlaqsızlıqlar ehtiyatı miras qoyublar. Belə görünür ki, bunu aradan qaldırmaq çətin, həddən artıq çətindir.
Mən bizim atalarımızı qınayıram və onları lənətləyirəm. Çünki onlar bizim bu gün daha ləyaqətli və qürurlu yaşamağımız üçün heç bir şey etməyiblər. Bizim əcdadlarımız, ən azından, öz nəsillərinin qeydinə heyvanların instiktiv şəkildə öz nəsillərinin qeydinə qaldığı kimi də qalmadı. Mən bizim əcdadlarımızı tərif edən hər kəsi qınayıram. Bununla da, sadəcə, bundan sonrakı nəsillərin layiqli və güclü vətənə sahib olmaq hüququnu inkar edir, bizə, yaşayanlara isə gələcək nəsillərə heç bir şey vəsiyyət etməmək haqqını bəxş edirlər. Əcdadlarımızı tərənnüm etməklə onlar indiki erməni məmurlarının təkəbbürlü gədəçələri kimi primitiv tərbiyə almamış oğlunun xəyanətinə məruz qalan Böyük Tiqran adlandırılan şəxsin öz tacını Roma hökmdarının ayağı altına atdığı həmin vaxtdan başlayan və artıq iki min ildən artıqdır içində olduğumuz bu sonsuz prosesə, sadəcə, yeni təkan verirlər. Mən əcdadlarımızı lənətləyirəm”.
Göründüyü kimi, Paşinyanın saxtakarlığı və iç üzü bir daha bəlli oldu. Məlum oldu ki, Paşinyan yalan üzərində təbliğat aparır. Misal çəkdiyi Tiqranı bir vaxtlar tamamilə mənfi mənada təqdim edib.
“Belə çıxır ki, ya onun yaddaşı doğrudan da çox korlanıb, ya da onda, ümumiyyətlə, məntiq yoxdur”
Məsələyə münasibət bildirən millət vəkili Elman Nəsirovun sözlərinə görə, bir daha məlum oldu ki, Paşinyan özünü inkar edir: “Münhen Təhlükəsizlik Konfransında Azərbaycan və Ermənistan prezidentlərinin dialoqu bir sıra həqiqətlərə işıq saldı. Məlum oldu ki, Moskva Dövlət Beynəlxalq Münasibətlər İnstitutunun professoru İlham Əliyevlə Yerevan Dövlət Universitetinin bakalavr ikinci kurs tələbəsi üz-üzə gəlib. Sözün həqiqi mənasında, Paşinyan şparqalkadan istifadə edən savadsız bir tələbə vəziyyətində idi. Bütün parametrlər üzrə Azərbaycan Prezidentinin öz rəqibindən üstün olması göz qabağında idi. Prezident İlham Əliyev Paşinyana həm tarix dərsi keçdi, həm də siyasət və hüquq dərsi. Paşinyanın səsləndirdiyi cılız arqumentlər bir çox hallarda onun öz əleyhinə yönəldi. Sözügedən debatda Paşinyan Tiqrandan danışdı. Ancaq məlum olur ki, Paşinyan vaxtilə yazdığı məqaləsində Tiqrana və ümumiyyətlə, əcdadlarına nifrət edir. Dəfələrlə müşahidə etmişik ki, Paşinyan özünü inkar edən fikirlər səsləndirir. Bu da Paşinyanın özünü inkar etməsi deməkdir. Məsələn, bir fikrində deyir ki, Dağlıq Qarabağ danışıqlarda tərəf olmalıdır. Başqa bir çıxışında qeyd edir ki, “Dağlıq Qarabağ Ermənistandır”. Məlum olur ki, Paşinyan özünü təkzib edən bir insandır. Belə çıxır ki, ya onun yaddaşı doğrudan da çox korlanıb, ya da onda, ümumiyyətlə, məntiq yoxdur. Belə bir adam bu gün Ermənistana rəhbərlik edir. Görün vəziyyət nə yerə çatıb ki, Paşinyanın ölkəni biabır etdiyini tək opponentləri deyil, tərəfdarları da etiraf edirlər”.
Vidadi ORDAHALLI
