Vüqar Bayramov: “BMT Azərbaycanda dayanıqlı inkişaf hədəflərinə nail olan fəaliyyətləri dəstəkləyir”
“Dayanıqlı İnkişaf Məqsədlərinin həyata keçirilməsi üçün “yol xəritələri” hazırlanmalıdır”. Bunu Birləşmiş Millətlər Təşkilatının Azərbaycandakı rezident əlaqələndiricisi Qulam İsaqzai VI Bakı Beynəlxalq Humanitar Forumu çərçivəsində keçirilən Dayanıqlı İnkişafa dair Bakı Forumunda deyib.
O qeyd edib ki, bu sahədə irəliləyişə nail olmaq üçün Azərbaycanda çox ciddi addımlar atılıb, ölkənin müvafiq strukturları bizimlə səmərəli əməkdaşlıq edirlər. Qulam İshaqzai 73 il əvvəl qəbul olunan BMT Nizamnaməsinin və BMT-nin İnsan Hüquqları Bəyannaməsinin Minilliyin İnkişaf Məqsədlərinin əsasını təşkil etdiyini bildirib. Qeyd edib ki, məqsədlərin həyata keçirilməsi üçün sözdən əmələ keçməyin vaxtı çatıb. 2030-cu ilə qədər “yol xəritələri”, milli planlar müəyyən edilməlidir.
BMT-nin Azərbaycandakı nümayəndəsinin Dayanıqlı İnkişaf Məqsədlərinin həyata keçirilməsi üçün “yol xəritələri”nin hazırlanması barədə fikir bildirməsi onu deməyə əsas verir ki, bu sahədə Azərbaycanla əməkdaşlıq etmək istəyirlər.
İqtisadçı-ekspert Vüqar Bayramov “Bakı-Xəbər”ə açıqlamasında qeyd etdi ki, paytaxtda keçirilən Dayanıqlı İnkişafa dair Bakı Forumu beynəlxalq əhəmiyyətə malikdir: “Məlumdur ki, forum BMT-nin dəstəyi ilə həyata keçirilir. Forumda iştirak edən nümayəndələr bir sıra məsələlərə toxunub. O cümlədən, BMT-nin xüsusi nümayəndəsi “yol xəritələri”nin hazırlanması ilə bağlı fikir səsləndirib. Dayanıqlı inkişaf üzrə birgə əməkdaşlığın genişləndirilməsi ilə bağlı aparılan müzakirələr ondan xəbər verir ki, BMT Azərbaycanda dayanıqlı inkişaf hədəflərinə nail olan fəaliyyətləri dəstəkləyir. Bizim üçün bu hədəflərə nail olmaq çox vacibdir. Nəzərə almaq lazımdır ki, Azərbaycan BMT-nin yüksək səviyyəli forumlarında dayanıqlı inkişaf hədəfləri üzrə icra hesabatını təqdim edən ilk ölkələrdəndir. Dayanıqlı inkişaf hədəfləri üzrə fəaliyyət planına Azərbaycan Hökuməti tərəfindən ciddi önəm verilir. Tərəflər “yol xəritələri”nin hazırlanmasında maraqlıdırlar. Azərbaycanda həyata keçirilən fəaliyyətlər BMT tərəfindən dəstək kimi qiymətləndirilməlidir”.
Günel CƏLİLOVA
