Elşən Mustafayev: “Naxçıvan düşdüyü blokadanı bir neçə istiqamətdən yarmış olacaq”
Türkiyənin Qars şəhərində səfərdə olan həmin ölkənin nəqliyyat, dənizçilik və rabitə naziri Əhməd Arslan deyib ki, ölkəsi Qars-İğdır-Naxçıvan dəmir yolu layihəsini həyata keçirmək niyyətindədir. Nazir qeyd edib ki, Bakı-Tiflis-Qars dəmir yolu layihəsi artıq başa çatır:
"Bu layihə Qars bölgəsinə də fayda verəcək. Bakı-Tiflis-Qars dəmir yolu layihəsindən sonra İğdırdan Naxçıvana, İrana və Pakistana dəmir yolu çəkəcəyik".
Ə.Arslan əlavə edib ki, bu məsələ İqtisadi Əməkdaşlıq Təşkilatının İslamabadda keçirilən 13-cü sammitində də müzakirə olunub: "Bölgələrin yükünü Qarsdan Avropaya daşımaq niyyətindəyik".
Qars-İğdır-Naxçıvan dəmir yolu layihəsinin tam ərsəyə gəlməsinin ölkəmiz və region üçün nə kimi faydaları olacaq?
Azərbaycan Milli İstiqlal Partiyasının funksioneri Elşən Mustafayev qəzetimizə bildirdi ki, bunun Azərbaycan üçün yalnız faydası olacaq: “Naxçıvana qədər uzanacaq dəmir yolu xəttindən danışmazdan əvvəl, biz belə imkanları bizim üçün mümkün edən Bakı-Tiflis-Qars dəmir yolunun ərsəyə gəlməsi və onun faydalarını nəzərdən keçirməliyik. Məlum olduğu kimi, Türkiyə ilə Qafqaz və Orta Asiya ölkələri arasında dəmir yolu əlaqəsi Ermənistan-Azərbaycan Dağlıq Qarabağ münaqişəsi səbəbindən kəsilmişdi. Belə ki, Ermənistanın Azərbaycan ərazilərini işğal etməsinə görə bu ölkə ilə sərhədlərini bağlayan Türkiyənin Qafqaz və Orta Asiya ölkələri ilə dəmir yolu vasitəsilə əlaqələri də dayandı. Belə əlaqədən Azərbaycanın bir hissəsi olan Naxçıvan MR də məhrum oldu. Ermənistanın yürütdüyü işğalçı siyasət səbəbindən Azərbaycanın digər bölgələrinin Naxçıvanla olan quru yol əlaqəsi tam kəsildi. Keçmiş SSRİ vaxtında Naxçıvandan keçməklə Ermənistana gedən dəmir yolu xətti birdəfəlik fəaliyyətini dayandırdı. Ancaq, nədənsə, Ermənistanın blokadasından çox danışan bəzi dünya dövlətləri bu xüsusda Naxçıvanın düşdüyü çətin durumu heç dillərinə də gətirmirlər. Nəhayət, 2007-ci ildə Azərbaycan, Türkiyə və Gürcüstanın birlikdə təməlini atdığı “Bakı-Tiflis-Qars” dəmir yolu layihəsi Qarsla Axalkalaki arasında dəmir yolu xəttinin inşası yolu ilə Bakının Tiflis üzərindən dəmir yolu vasitəsilə Qarsla, başqa sözlə, Azərbaycanın Türkiyə ilə birləşdirilməsini nəzərdə tutan layihə oldu və ərsəyə gəldi. Qərb ölkələrinin “Ermənistanı təcrid edir” iddiasını ortaya ataraq maliyyələşdirilməsində iştirak etmədiyi bu layihə üç ölkənin imkanları ilə reallaşdı. Bu layihə müxtəlif aspektlərdən qiymətləndirilə bilər. Layihənin mühüm iqtisadi və strateji nəticələrindən biri də həmin yolun Naxçıvana kimi uzadılmasının nəzərdə tutulmasıdır. Layihə Ermənistanın təcridini dərinləşdirməklə yanaşı, eyni zamanda, Ermənistan tərəfindən təcrid edilməyə çalışılan Naxçıvanın daha etibarlı dəmir yolu şəbəkəsi vasitəsilə Bakı ilə birləşməsi üçün mühüm imkan yaradır. Belə ki, artıq gündəmdə olan Qars-İğdır-Naxçıvan dəmir yolu xəttinin də çəkilməsi ilə Ermənistanın təcrid etməyə çalışdığı Naxçıvan Qars vasitəsilə Azərbaycanın digər əraziləri və Avropa ilə fasiləsiz dəmir yolu əlaqəsi qura biləcək. Məhz bu baxımdan da türkiyəli nazirin əminliklə çəkiləcəyini bildirdiyi dəmir yolunun Naxçıvana qədər uzanması bizim üçün həm iqtisadi, həm də siyasi aspektdən mühüm dividendlər gətirəcək. Layihənin perspektivi barədə deyirlər ki, dəmir yolunun Naxçıvandan İrana, oradan isə Pakistana qədər uzadılması da nəzərdən keçirilir. Bu da o anlama gəlir ki, Naxçıvan düşdüyü blokadanı bir neçə istiqamətdən yarmış olacaq”.
Məhəmmədəli QƏRİBLİ
