Elşən Həsənov: “Ardınca çalışmalıyıq ki, məsələyə hüquq müstəvisində qiymət verilsin”
Azərbaycanın Rusiyadakı səfiri Polad Bülbüloğlu "Exo Moskvı" radiosunun efirində Azərbaycana qarşı yol verilən hörmətsizliklə bağlı radionun baş redaktoru Aleksey Venediktova müraciət edib. Məktub aprelin 28-də "Exo Moskvı" radiostansiyasının efirində yayımlanan, aparıcı Yuliya Latıninanın müəllifi olduğu "Kod Dostupa" verilişində jurnalistin Azərbaycanı və azərbaycanlıları təhqir etməsi ilə əlaqədardır.
Səfir məktubunda Y.Latıninanın növbəti dəfə məhdud tarixi biliklərini və ermənilərə simpatiyasını göstərərək tarixi faktları təhrif, işğalçını qurban, hərbi cinayətkar olan Serj Sarkisyan və ətrafını isə qəhrəman kimi təqdim, 100 il ərzində işğal, soyqırım, etnik təmizləmə kimi beynəlxalq cinayətlərdən əziyyət çəkən Azərbaycan xalqını bütün günahlarda ittiham etdiyini vurğulayıb: “Aydındır ki, Yuliya Latınina tərəfindən canlı efirdə deyilən fikirlər onun qərəzli və qeyri-peşəkarlığının təzahürüdür və faktları təhrif etmək, anti-Azərbaycan təbliğatı aparmaq yolu ilə narahat Ermənistan cəmiyyətini real əhval-ruhiyyədən yayındırmaq üçün Rusiya auditoriyasını çaşdırmaq məqsədi daşıyır".
P.Bülbüloğlu Y.Latıninanın jurnalistika etikasının bütün sərhədlərini pozduğunu, reallıq hissini itirdiyini, öz hüquqi və vətəndaşlıq məsuliyyətini unudaraq auditoriyaya müraciətində Azərbaycan cəmiyyətini "ruhən xəstə" adlandıraraq bütün Azərbaycan xalqına qarşı məsuliyyətsiz, əxlaqsız və alçaldıcı ifadələr işlətdiyini vurğulayıb: "Xüsusilə qeyd etmək istəyirəm ki, bütün dünyada 50 milyondan çox azərbaycanlı yaşayır. Onlardan 10 milyonu Azərbaycandadır. Unutmaq lazım deyil ki, Rusiyanın özündə 2 milyona yaxın azərbaycanlı yaşayır və onların yarım milyonu Moskvada məkunlaşıb. Bu statistikanı nəzərə alaraq “Exo Moskvı” radiosunun böyük Rusiya Federasiyasında yaşayan Azərbaycan auditoriyasını özünə qarşı kökləməkdə maraqlı olduğunu düşünmürəm. Birinci dəfə deyil ki, Y.Latınina "Exo Moskvı" radiosunun çoxmilyonlu auditoriyasından istifadə edərək Azərbaycan xalqını alçaldır, Rusiya cəmiyyətində nifrət əhval-ruhiyyəsi formalaşdırır”.
Səfir A.Venediktovdan baş vermiş hadisə ilə bağlı lazımi tədbirləri görməyi xahiş edib: “Mövcud vəziyyəti diqqətinizə çatdıraraq sizdən Rusiya Federasiyasının "Kütləvi İnformasiya Vasitələri Haqqında" Qanunu çərçivəsində lazımi tədbirləri görməyi, redaksiya tərəfindən müvafiq təkzibin yayılmasını və bütün Azərbaycan xalqından üzr istənilməsini xahiş edirəm”.
Göründüyü kimi, Rusiyanın kifayət qədər populyar olan “Exo Moskvı” radiosunun efirində bir millət olaraq bizi ən pis formada təhqir ediblər. Bunu təsadüf də saymaq olmaz. Çünki Latınina soyadlı jurnalist bir neçənci dəfədir öz erməni sevgisini gizlətmir. Bu onun jurnalist fəaliyyətində aydın sezilir. Azərbaycan diplomatik müstəvidə məsələyə münasibət bildirib, bəs yaranmış vəziyyətlə bağlı başqa hansı addımlar atılmalıdır?
Ekspert Elşən Həsənovun sözlərinə görə, Latıninanın bütün jurnalist fəaliyyəti ermənilərə aşırı sevgi, bizə isə nifrət üzərində qurulub: “Mən bunu Rusiya KİV-lərini yaxından izləyən bir adam kimi deyirəm. Onun belə bir sevgisi varsa, bunu efirdən milyonlara xitabən bəyan etməməlidir. Gedib öz evində, rəfiqlərilə söhbət edəndə danışa bilər, amma efirdə böyük tarixi, dövləti olan bir milləti “ruhi xəstə” adlandırmaq ən azından cinayətdir. Mən P.Bülbüloğlunun Latıninanın təmsil olunduğu media qurumun rəhbərinə ünvanladığı məktubun mətni ilə tanış oldum. Çox dolğun və əhatəli yazılıb. Təbii ki, radio rəhbərliyinin reaksiyası maraqlı olacaq. Burada Latıninanı təmizə çıxarmaq üçün heç bir əsas və dəlil yoxdur. Çünki o birbaşa bizi təhqir edib və bunun fonunda erməniləri tərifləyib. Bu açıq-açığına düşmənçilik anlamı daşıyır. Hesab edirəm ki, bu vəziyyəti dünyadakı bütün diaspor təşkilatlarımızın diqqətinə çatdırmalıyıq. Çünki söhbət dünyada yaşayan 50 milyonluq azərbaycanılıdan gedir. Ardınca çalışmalıyıq ki, məsələyə hüquq müstəvisində qiymət verilsin. Biz belə qərəzli mövqe tutan bir jurnalisti cəzalandırmasaq, vəziyyət düzəlməyəcək. Görün bunlar nə qədər özündən razıdırlar ki, efirdən bir milləti tənqid yox, təhqir edirlər. Bütün resurslarla bu məsələnin üstünə getməliyik. Rusiyada belə qərəzli mövqedə olan jurnalistlər az deyil. Onların da əksəriyyəti erməni təsiri altındadır”.
Məhəmmədəli QƏRİBLİ
