Qabil Hüseynli: “Bundan sonrakı proseslərdə Rusiya zorakı üsullara əl ata bilər”
Ermənistan parlamentinin xüsusi iclasında yeni baş nazir seçkiləri keçirilib. Bu posta yeganə namizəd etiraz aksiyalarının lideri, parlamentdə müxalif “Çıxış” fraksiyasının rəhbəri Nikol Paşinyan olub. Paşinyan parlamentdə çıxış edərək ölkədəki mövcud vəziyyət barədə məlumat verib. Qeyd edib ki, xalq ölkə daxilində mövcud olan sosial-iqtisadi siyasətin dəyişməsini istəyir: “Xalq xarici siyasi dəyişikliklər tələb etmir. Rusiya Ermənistanın strateji müttəfiqi olaraq qalır. Bundan başqa, Ermənistan ABŞ, Avropa İttifaqı ölkələri və İranla əməkdaşlığı davam etdirəcək”.
Baş nazir postuna namizəd bildirib ki, ölkənin ikinci və üçüncü prezidentləri Robert Köçəryan və Serj Sarkisyan hökumət başçısının seçilməsini pozmaq məqsədilə parlamentin deputatlarına təzyiq göstəriblər. Daha sonra Paşinyan deputatların suallarını cavablandırıb. Bundan sonra deputatlar baş nazirin çıxışına münasibət bildiriblər. Altı saatdan çox davam edən iclasın yekununda səsvermə keçirilib. Səsvermənin nəticəsinə əsasən Nikol Paşinyan baş nazir seçilməyib. Hakim Respublika Partiyasının deputatları Paşinyanın əleyinə səs veriblər. Bu səbəbdən etirazçı deputat baş nazir seçilməsi üçün lazım olan 53 səsi toplaya bilməyib. 7 gündən sonra parlamentdə yenidən seçki keçiriləcək. Adətən oxşar situasiyalarla rastlaşan ölkələrdə hakim partiyanın bazası sürətli şəkildə parçalanır. Ermənistanda isə biz parlamentdəki hakim partiyanın nümayəndələrinin dirənişini gördük. Vəziyyətin bu hal almasında Rusiya amilini necə qiymətləndirmək olar? Ola bilərmi ki, deputatların dirəniş göstərməsilə bağlı təlimat Rusiyadan gəlsin? Ermənistandakı proseslərin gələcəyini necə proqnozlaşdırmaq olar? Hadisələrin gedişində Paşinyanın fiziki məhv edilməsini gözləmək olarmı?
Politoloq Qabil Hüseynlinin sözlərinə görə, Ermənistan qanunlarına əsasən, parlamentdə hökumət başçısını seçmək mümkün olmasa, yeddi gün sonra ikinci səsvermə keçirilir: “Lakin ikinci səsvermədə də baş nazir seçilməzsə, prezident parlamenti buraxır və 30-45 gün ərzində növbədənkənar parlament seçkilərinin keçirilməsi barədə qərar qəbul edir. Ermənistan müxalifətinin namizədi Nikol Paşinyanın parlamentdə baş nazir seçilməməsi gözlənilməz hadisə deyil. Məntiqlə Serj Sarkisyanın partiyasından olan deputatlar ya parlamentə gəlməməli, ya da Paşinyanın əleyhinə səs verməli idilər. Üstəlik, parlamentdə baş nazir məsələsi müzakirə ediləndə Rusiya Prezidenti Vladimir Putin Serj Sarkisyan və Robert Köçəryanı Moskvaya çağırmışdı. Proseslərdə Rusiya barmağı özünü son həftədə göstərdi. Bundan sonrakı proseslərdə Rusiya zorakı üsullara əl ata bilər. Müxtəlif ssenarilər mümkündür. Paşinyanın həbsindən tutmuş, mitinqlərin zorakı vasitələrlə dağıdılmasına qədər hadisələrin çeşidli inkişafı ehtimal olunur. Digər variant köhnə hakimiyyət nümayəndələrinin parlamenti buraxaraq yeni seçkilər təyin etməsi və özlərinin dediyi kimi, Paşinyana qarşı mübarizə aparıb xalqın içərisinə getməsidir. Qan tökmək məsələsində Rusiyadan hər addım gözləmək olar. Bu gün Paşinyanın ümum erməni tətili çağırışı güclü olarsa, bütün infrastrukturlarda işlər dayanarsa, köhnə hakimiyyət ruslarla birlikdə öz qərarını verəcək. Əgər doğrudan da Paşinyan müxalifətin lideridirsə, əhali onun sözünə baxırsa, ümumerməni tətili baş tutmalıdır. Yox, ümumölkə tətili baş tutmasa, köhnə qüvvələr Paşinyanın üzərinə daha cəsarətlə gedəcəklər. Paşinyan və ətrafında olan bir neçə nəfərin həbsi etiraz xəttinin başsız qalması, lidersiz etirazçıların isə polis dəyənəyi hesabına və ya 2008-ci ilin martında olduğu kimi, silah gücünə dağıdılması ilə nəticələnə bilər. Düzdür, ortada Qərbin mövqeyi məsələsi də var. Avropa strukturlarından zorakı üsullardan qaçmaq çağırışları olub. Onlar da anlayırlar ki, Rusiya bu ölkədə asanlıqla zorakı tədbirlərə əl ata bilər”.
Məhəmmədəli QƏRİBLİ
