Bəhruz Quliyev: “Paşinyanın son bəyanatı bunu bir daha sübut etdi”
Məlum olduğu kimi, Ermənistanda vəziyyət gərgin olaraq qalır. İllərlə hakimiyyəti zor gücünə əlində saxlayan, adı kriminal dairələrlə birgə çəkilən Serj Sarkisyan devrilsə də, İrəvanda minlərlə adamın iştirakı ilə etiraz aksiyaları davam edir. Erməni müxalifətinin lideri Nikol Paşinyan parlamentdəki çoxluğu əlində tutan hakim Respublika partiyasının üzvlərinin lazımi qədər səs verməməsi üzündən baş nazir seçilmədi. Nəticədə ölkədə vəziyyət daha da dramatikləşməyə doğru gedir.
Ermənistanda baş nazir Serj Sarkisyanın vəzifədəsindən uzaqlaşdırılması ilə nəticələnmiş proseslər bölgənin həssaslığı üzündən istər beynəlxalq ictimaiyyət, istərsə də region ölkələri, xüsusilə Azərbaycan tərəfindən diqqətlə izlənir. Dağlıq Qarabağ münaqişəsinə görə Ermənistanla müharibə vəziyyətində olan Azərbaycan İrəvandakı hadisələri daha diqqətlə və həssaslıqla izləyir. Çünki Ermənistanda gedən proseslər bu və ya digər dərəcədə Dağlıq Qarabağ danışıqlarına öz təsirini göstərir. Azərbaycanın Ermənistanla heç bir siyasi, iqtisadi və humanitar əlaqələri olmasa da, Bakıda siyasi və ictimai dairələr Ermənistanda yaşananların Dağlıq Qarabağ münaqişəsinin gələcəyinə necə təsir edə biləcəyi haqda düşünürlər. Ötən illər ərzində Dağlıq Qarabağ münaqişəsinin həllilə bağlı danışıqların nəticə vermədiyi bir şəraitdə, Ermənistanda hakimiyyət dəyişikliyilə bu problemin sülh yolu ilə həllinə az da olsa ümid yaranıb. Yəni hazırkı radikal klanın hakimiyyətdən getməsi proseslərdə aktivliyi artıra bilər. Lakin Paşinyanın bəzi radikal məzmunlu açıqlamaları fərqli mənzərə yaradır. Belə olan halda, ehtimal etmək olarmı ki, ermənilər ölkə daxilində siyasi gərginliyi süni şəkildə uzatmaqla Dağlıq Qarabağ danışıqlarını təxirə salmaq məqsədi güdürlər? Bu ehtimal nə dərəcədə doğrudur? Məsələyə münasibət bildirən politoloq, “Səs” qəzetinin baş redaktoru Bəhruz Quliyev bunu istisna etmədi. Onun fikrincə, Ermənistan hakimiyyəti və müxalifəti Dağlıq Qarabağdan bir kart kimi istifadə edir: “Ümumilikdə, Ermənistanda keçirilən seçkilər bu ölkənin iflasına səbəb oldu. Müşahidə olunan mənzərə ondan ibarətdir ki, Ermənistanda ciddi siyasi təbəddülatlar yaşanır. Baxmayaraq ki, beynəlxalq ictimaiyyət Cənubi Qafqazın 2 ölkəsində keçirilən seçkilərə ikili standartlardan yanaşır. Yəni Azərbaycanda seçkilər demokratik keçirilib, amma Ermənistanda qeyri-demokratik. Ancaq buna baxmayaraq, Ermənistanda baş verənləri görməzdən gəlirlər. Azərbaycana qarşı isə bəzən qərəzli münasibət sərgilənir. Ancaq bu amil belə, Ermənistanı xilas edə bilmədi. Ermənistanda kütləvi etirazlar böyüdü və S.Sarkisyan istefa verməli oldu. Dağlıq Qarabağ məsələsinə gəldikdə isə, istər Ermənistan hakimiyyəti, istərsə də müxalifəti ondan bir kart kimi istifadə edirlər. S.Sarkisyanın prezidentliyi dövründə Dağlıq Qarabağla bağlı aparılan danışıqlar ermənilərin düzgün mövqedə olmadığını göstərdi. Onların məqsədi o idi ki, status-kvo olduğu kimi qalsın. Problemin həll olunmamış qalması onlara sərf edirdi. Ermənilər maksimum çalışırdılar ki, danışıqlar prosesi uzansın. Bu gün də onun elementləri özünü göstərir. Görünən odur ki, Ermənistan müxalifəti də danışıqların uzadılmasına yönəlik siyasi reveranslar edir. Məsələ ondadır ki, erməni küçə müxalifətinin lideri Nikol Paşinyan xalqı itaətsizliyə çağırdı. Onun baş nazir olmaması böyük bir problem yaratdı. Hesab edirəm ki, ölkədə gedən proseslər nəticəsində Ermənistan uzun illər özünə gələ bilməyəcək. Ermənistan hakimiyyətində gedən mübarizələr daha da şiddətlənəcək. Onların seçim etmək imkanı məhdudlaşacaq. Faktiki olaraq Ermənistanda Rusiya ilə ABŞ-ın geosiyasi mübarizəsi gedir. Ermənistanda hakimiyyətə kimin gəlməyindən asılı olmayaraq, həmin qüvvələr Dağlıq Qarabağ məsələsində erməni xislətindən çıxış edəcəklər. Paşinyanın Qarabağla bağlı son bəyanatı bunu bir daha sübut etdi. O da münaqişənin ədalətli həllində maraqlı görünmür. Halbuki, münaqişənin həlli ilə bağlı Ermənistan qeyd-şərtsiz işğal etdiyi torpaqlardan çəkilməlidir. Ancaq görürük ki, Ermənistandakı siyasi qüvvələr Qarabağ kartından istifadə edib danışıqları uzatmaq məqsədi güdürlər”.
Vidadi ORDAHALLI
