Günel Fərhadqızı: “Regional layihələrdən təcrid olunması fonunda iqtisadi durumun daha da pisləşəcəyi gözlənir”
Ermənistanda “Mənim addımım” etiraz hərəkatının lideri, baş nazir seçiləcəyi gözlənilən Nikol Paşinyan indiki blokada şəraitində ölkə iqtisadiyyatının inkişaf imkanları barədə öz baxışlarını açıqlayıb.
Paşinyan Azərbaycan və Türkiyə tərəfdən blokadanın qaldırılmasına ümid etmədiyini, iqtisadiyyatın bu şəraitdə inkişafına nail olmağa çalışacağını deyib: “Biz arzuolunanlara deyil, reallıqlara əsaslanmalıyıq. Azərbaycan və Türkiyədə gedən proseslər bizə blokadanın götürüləcəyinə ümid etmək üçün əsas vermir. Biz iqtisadiyyatımızı indiki şərtlərdə daha effektiv etməliyik. Mən informasiya texnologiyalarının inkişafını nəzərdə tuturam. Ümid edirəm ki, son hadisələr Ermənistana investisiyaların cəlb edilməsi üçün zəmin yaradıb. Biz biznesə məsələləri rəqabət şəraitində həll etmək imkanı yaratmalıyıq”.
Erməni inqilabı liderinin fikrincə, iqtisadiyyatın inkişafının yeni komponenti investisiyalara imkan yaradılması, azad iqtisadi rəqabət olmalıdır: “Əgər siyasi şərtlər yaransa, iqtisadiyyat bundan yararlanacaq. Yükdaşımalar sahəsində də rəqabətliliyi təmin etmək lazımdır”.
Hakimiyyətə gəlməyin bir addımlığında olan bu şəxsin Ermənistan iqtisadiyyatını hətta blokada şəraitində inkişaf etdirəcəyinə dair səsləndirdiyi fikirləri nə dərəcədə real və əsaslı saymaq olar?
İqtisadçı Günel Fərhadqızı qəzetimizə bildirdi ki, Paşinyanın bu mövzuda verdiyi açıqlama populist xarakterlidir və heç bir iqtisadi dəlilə əsalanmır: “O, hakimiyyətə gəlmək üçün şirin vədlər verməlidir. Bilirsiniz ki, hazırda əhalinin böyük hissəsi sosial ədalətsizlik və kasıbçılıq səbəbindən onun arxasınca gedir. Bu səbəbdən də həmin kütlənin psixologiyasına uyğun olan açıqlama məhz bu yöndə olmalıdır. Mən bunu daha çox siyasi maraqdan irəli gələn və əsası olmayan bir açıqlama hesab edirəm. Son 10 ildə Serj Sarkisyan hakimiyyəti bu durumu dəyişmək üçün heç nə edə bilməyib. Məhz Qarabağ konflikti üzündən Ermənistanın beynəlxalq arenada mövqeləri pisləşib, regionda mühüm laiyhələrdən kənarda qalıb. Ermənistandan fərqli olaraq, Azərbaycan ötən dövr ərzində dinamik inkişaf nümayiş etdirə bilib. Məsələn, məlumdur ki, son 15 il ərzində iqtisadi sahədə Azərbaycan qədər sürətli inkişaf edən ikinci ölkə yoxdur. Qeyd olunan müddətdə Azərbaycan iqtisadiyyatı 3,2 dəfə artıb. Aydındır ki, blokadanın yarılması Ermənistana genişmiqyaslı iqtisadi layihələrə qoşulma imkanı verəcək. Ancaq göründüyü kimi, Paşinyan blokadadan çıxmağın yollarından deyil, məhz belə şəraitdəki inkişafdan danışır. O dərk edir ki, yalnız ərazi münaqişələrinin dəstəklənməsindən imtina etmək ideyası qarşılıqlı faydalı iqtisadi layihələrin hazırlanmasına gətirib çıxara bilər. Münaqişə nəticəsində Ermənistan siyasi təcrid vəziyyətinə düşüb. Ermənistan 4 ölkə ilə həmsərhəddir ki, onlardan ikisi ilə münasibətləri gərgindir. Türkiyə Azərbaycanın strateji müttəfiqidir və sərhədləri, əvvəlki kimi, Ermənistan üçün qapalı saxlayır. Paşinyan məhz bu iki ölkə ilə sərhədlərin açılmasına ümid etmirsə, demək, onun yürütdüyü siyasət əvvəlkilərdən fərqlənməyəcək. Ermənistan iqtisadiyyatında tənəzzülü şərtləndirən amillərə diqqət edək. Onların özlərinin verdiyi statistikaya görə, sənaye sahəsində işləyənlərin sayı 458 min nəfərdən 180 minədək (2.5 dəfə) azalıb ki, bu da, öz növbəsində, elektrik enerjisi, təbii qaz istehsalının və istehlakının azaldılmasına təsir göstərib. Paşinyan qeyd edir ki, onlar üçün əsas prioritet İKT-nin inkişafıdır. Bəli, bu gün Ermənistan informasiya texnologiyalarına sərmayə qoyur. Eyni zamanda, hər hansı bir inkişaf etməkdə olan sənaye sahəsində olduğu kimi, Ermənistan texnologiya dəyişikliyinə tez cavab vermək ehtiyacı ilə üzləşir. Sənaye miqyasında rəqabətqabiliyyətli məhsullar istehsal etmək üçün daha geniş bir auditoriya və qlobal investisiyaların cəlb edilməsi lazımdır. Ancaq onların yürütdüyü işğalçı siyasət buna maneə törədir. Bütün bunlar bir daha göstərir ki, Qarabağ münaqişəsi həll edilmədən Ermənistanın inkişafı mümkün deyil. Ermənistanın Dağlıq Qarabağ münaqişəsinə görə blokada vəziyyətində qalması, regional layihələrdən təcrid olunması fonunda isə iqtisadi durumun daha da pisləşəcəyi gözlənir”.
Məhəmmədəli QƏRİBLİ
