Şair Ramaldanov: “Azərbaycan hərbi sənayesinin istehsal etdiyi məhsullar Silahlı Qüvvələrin təminatında özünəməxsus yer alıb, həmçinin, xarici ölkələrə də ixrac olunur”
2018-ci ilin birinci rübündə Müdafiə Sənayesi Nazirliyinin müəssisələrində istehsal olunan məhsulun 89 faizini müdafiə və xüsusi təyinatlı, 11 faizini isə mülki təyinatlı məmulatlar təşkil edir. Bunu Müdafiə Sənayesi Nazirliyində 2018-ci ilin birinci rübünün yekunlarına həsr olunmuş Kollegiya iclasında çıxış edən nazir Yavər Camalov bildirib.
O qeyd edib ki, istehsalı mənimsənilmiş müdafiə təyinatlı məmulatlarının çeşid sayı 1200-ə çatdırılıb: “Belə ki, istehsal olunan məmulatlardan döyüş sursatları, müasir atıcı silahlar və artilleriya silahları, pilotsuz uçuş aparatları, zirehli texnikalar və digər müdafiə təyinatlı məmulatlar 10-dan çox ölkəyə ixrac olunur. İxrac olunan məhsulun həcmi 2017-ci ilin müvafiq dövrü ilə müqayisədə iki dəfə artıb”.
Azərbaycanda istehsal olunan hərbi sursatların 10-dan çox ölkəyə ixrac olunmasına münasibət bildirən
keçmiş korpus komandiri, ehtiyatda olan polkovnik Şair Ramaldanov “Bakı-Xəbər”ə açıqlamasında qeyd etdi ki, hərbi sənayenin inkişafı Azərbaycan üçün vacibdir: “Nəzərə almaq lazımdır ki, biz müharibə şəraitindəyik. Birinci Qarabağ müharibəsi onu göstərdi ki, o zamanlar silah-sursat cəhətdən çox böyük problemlər var idi. O zaman xarici ölkələr bizə baha qiymətə hərbi sursat satırdılar. Bu səbəbdən dövlətimiz hərbi sənayesini inkişaf etdirmək qərarına gəldi. Onu da qeyd edim ki, hər bir ölkə hərbi sənayesini inkişaf etdirə bilmir. Prezident İlham Əliyevin şəxsi diqqəti və səyi nəticəsində Azərbaycanın hərbi sənayesi qısa zamanda çox böyük inkişaf yolu keçdi. Hazırda Azərbaycanın hərbi sənayesində 120-ə yaxın müxtəlif hərbi təyinatlı sursatlar istehsal olunur. Məlumat üçün bildirim ki, ölkəmizdə atıcı silah, mərmi və digər hərbi sursatlar istehsal olunur. Qeyd edim ki, hərbi sənayeni inkişaf etdirmək üçün ölkənin iqtisadi inkişafı buna imkan verməlidir. O da bəllidir ki, son 10 ildə Azərbaycan xarici ölkələrdə keçirilən sərgilərdə iştirak edir. Və o sərgilərdə Azərbaycana aid olan guşələrin həcmi ildən-ilə genişlənir. Həmçinin, sərgilərdə nümayiş olunan hərbi sursatların sayı da artır”.
Həmsöhbətimiz onu da vurğuladı ki, Azərbaycanın hərbi sənayesi günün tələbinə uyğun silah-sursat hazırlayır: “Günün tələbinə cavab verən silah-sursat istehsalına daha çox önəm verilir. Müasir tələblərə cavab verən hərbi sursatın istehsalı üçün kadr olmalıdır. Qeyd edim ki, Azərbaycan Texniki Universitetində hərbi sənaye üçün yüksək səviyyəli mütəxəssis hazırlayan xüsusi fakültə var. Həmçinin, Azərbaycan hərbi sənayesinin nümayəndələri inkişaf etmiş ölkələrdə təcrübə keçir, kurslarda iştirak edirlər. Nəzərə almaq lazımdır ki, görülən hər bir iş maliyyə tələb edir. Ölkə başçısı bu sahəyə xüsusi diqqət yetirdiyi üçün, hərbi sənayenin inkişafına şərait yaradıb. Yaradılan şərait nəticəsində Azərbaycanın hərbi sənayesi inkişaf edir. Sevindirici haldır ki, Azərbaycan hərbi sənayesi məhsulları xaricə ölkələrə çıxarılır. Nəticədə bu sahədən də ölkə büdcəsinə gəlir daxil olur”.
Ş.Ramaldanov hesab edir ki, Azərbaycanda hökm sürən daxili sabitlik tək hərbi sənayenin inkişafında deyil, eyni zamanda, geosiyasi arenada, həm də iqtisadi və digər sahələrdə özünü göstərir: “Azərbaycan hərbi sənayesinin istehsal etdiyi məhsullar Silahlı Qüvvələrin təminatında özünəməxsus yer alıb, həmçinin, xarici ölkələrə də ixrac olunur. Bu sahənin inkişafı Azərbaycanın siyasi-iqtisadi gücünü nümayiş etdirir”.
Ehtiyatda olan polkovnik onu da vurğuladı ki, Azərbaycanda istehsal olunan məhsulların 10 ölkəyə deyil, 20 ölkəyə ixracı ilə bağlı müqavilə imzalanıb.
Günel CƏLİLOVA
