Mübariz Əhmədoğlu: “ABŞ Prezidentinin məktubu yüksək dəyərləndirməyə ehtiyacı olan vacib hadisədir”
Amerika Birləşmiş Ştatlarının Prezidenti Donald Tramp Prezident İlham Əliyevi təbrik edib.
Təbrikdə deyilir: “Hörmətli cənab Prezident, mən Amerika və Azərbaycan xalqları üçün qarşılıqlı maraq doğuran bir çox sahələrdə Sizinlə birgə işləmək əzmindəyəm.
Biz Sizinlə birlikdə terrorçuluğun məğlub edilməsində, yeni iş yerlərinin yaradılmasında və Avropanın enerji təhlükəsizliyinin yaxşılaşdırılmasında tərəqqi əldə edə bilərik. Korrupsiyaya qarşı mübarizədə və Dağlıq Qarabağ münaqişəsinin sülh yolu ilə həllində irəliləyiş bu səylərə töhfə verəcək. Sizə və Azərbaycan xalqına ən xoş arzularımı bildirirəm”.
Əslində, Trampın ünvanladığı məktubu Azərbaycan cəmiyyəti maraqla gözləyirdi. Çünki bu amil, eyni zamanda, dünyanın ən böyük güclərindən sayılan ABŞ-ın ölkəmizdə keçirilən seçkilərə münasibətinin göstəricisi sayılır. Hətta bəzi radikal qüvvələr yanılaraq hesab edirdilər ki, Tramp, ümumiyyətlə, İlham Əliyevə təbrik ünvanlamayacaq. Ancaq, göründüyü kimi, gözlənilən məktub göndərilib, hətta deyərdik ki, ABŞ-ın əvvəlki prezidenti olan Obamanın vaxtilə analoji məzmunu əhatə edən təbrik məktubundan vaxt baxımından ünvanına daha tez yetişib. Məktubun məzmunundan da görünür ki, ABŞ bizimlə bir sıra mühüm sahələrdə əməkdaşlıq etməkdə xüsusilə maraqlıdır. Bura terrorçuluqla mübarizəni, yeni iş yerlərinin yaradılmasını və Avropanın enerji təhlükəsizliyinin yaxşılaşdırılması istiqamətində birgə əməkdaşlıq səylərini aid edə bilərik. Trampın məktubunda başqa hansı zəruri detallara toxunulub?
Siyasi İnnovasiya və Texnologiyalar Mərkəzinin rəhbəri Mübariz Əhmədoğlunun sözlərinə görə, Trampın məktubunda Azərbaycan üçün vacib olan bir sıra məsələlərə vurğu edilir: “Ölkəmizdə keçirilən 11 aprel prezident seçkilərindən sonra Donald Tramp Prezident İlham Əliyevə ilk dəfə məktub göndərdi. Məktubda qeyd olunduğu kimi, ABŞ Prezidenti İlham Əliyevə terrorla mübarizə istiqamətində, Avropanın enerji təhlükəsizliyinin yaxşılaşdırılmasında və Dağlıq Qarabağ münaqişəsinin tənzimlənməsində birgə fəaliyyət təklif edir. Münasibətlərin bu səviyyəyə çatması çox müsbət haldır. Təbii ki, ABŞ-ı narahat edən məsələlərdən biri də Cənubi Qafqazda təhlükəsizliyin təmin olunmasıdır. Hazırda bizim coğrafiyada vəziyyəti mürəkkəbləşdirən başlıca amil Ermənistanda baş verən hadisələrdir. İstənilən an düşmən ölkədə vəziyyət nəzarətdən çıxa bilər. Ona görə Ermənistan, hər zaman olduğu kimi, təhlükə mənbəyi olaraq qalır. Hazırkı şəraitdə təhlükəni idarə etmək problemi aktual amilə çevrilib. Bu baxımdan da ABŞ regionda təhlükəsizliyin təmin olunmasında ölkəmizin roluna üstünlük verir. Regiondakı sabitliyi pozan ikinci amil kimi Rusiya-Qərb mübarizəsidir. İki böyük güc arasındakı mübarizənin əsasını enerji mübarizəsi təşkil edir. ABŞ çalışır ki, Rusiya qazını Avropaya buraxmasın. Əvəzində Kreml də Avropaya digər yerlərdən göndərilən qaza məhdudiyyət qoyur. Ona görə Azərbaycan bu məsələdə də regional təhlükəsizliklə bağlı proseslərin içərisinə düşə bilər. Belə vəziyyətdə Qərbin dəstəyi olmasa, məsələ Azərbaycan üçün asan olmayacaq. Amerika bunu başa düşür və bizmlə bu sahədə də əməkdaşlıq etmək istəyir. Terrorla mücadiləyə gəldikdə isə, biz Trampın hakimiyyətə gəlişindən əvvəl də bu sahədə ABŞ-la sistemli və yaxından əməkdaşlıq etmişik. Trampın məktublarında Dağlıq Qarabağ münaqişəsinin həllinin vurğulanması diqqət çəkir. Bu onu göstərir ki, ABŞ bölgədə bəzi dövlətlərin təkbaşına hegemonluğuna imkan verməyəcək və nəticə etibarilə münaqişənin beynəlxalq hüquq normalarına uyğun, ədalətli formada həll edilməsi üçün səylərini əsirgəməyəcək. ABŞ Prezidentinin məktubu yüksək dəyərləndirməyə ehtiyacı olan vacib hadisədir. Hesab edirəm ki, ABŞ-Azərbaycan əlaqələrinin durmadan inkişaf etməsi hər iki ölkənin siyasi və iqtisadi maraqlarına tam uyğundur”.
Məhəmmədəli QƏRİBLİ
