Avropa Şurasının Parlament Assambleyası (AŞ PA) Ermənistanda vəziyyətin qarışdığı bir məqamda sanki məqsədli şəkildə Azərbaycanın üzərinə hücuma keçir. Bütün dünyanın gözü qarşısında Ermənistanda qarşıdurmanın baş verdiyi, vətəndaşlara qarşı zor tətbiq edildiyi, hakimiyyətin devrildiyi, xalq ilə hakimiyyət arasında dərin uçurumun mövcud olduğu, ölkənin faktiki olaraq idarəolunmaz hala gəlib çıxdığı bir vaxtda, nədənsə.
AŞ PA-da Azərbaycan kimi sabit bir ölkəni müzakirə etmək üstün tutulur. Bu, təbii ki, birmənalı olaraq qərəzdən, qeyri-obyektiv yanaşmadan, məqsədli şəkildə Azərbaycanı gözdən salmağa çalışmaqdan xəbər verir.
Avropa Şurası Parlament Assambleyasının korrupsiya ilə bağlı hesabatında Azərbaycana qarşı açıq-aşkar qərəz müşahidə olunurdu, bu isə qəbuledilməzdir.
Qeyd edək ki, Azərbaycan Avropa Şurasına 2001-ci ildən üzvdür. Bu müddət ərzində ölkəmizlə bağlı dəfələrlə qərəzli, ikili münasibətli yanaşmanın şahidi olmuşuq. Bir sözlə, ölkəmiz bu təsisatdan obyektiv mövqe əvəzinə daim qərəz görüb. Görün vəziyyət nə həddə çatıbsa, qurumda Azərbaycan nümayəndə heyətinin rəhbəri olan Səməd Seyidov AŞ-dən çıxmağın zəruriliyi ilə bağlı fikir bildirib. S.Seyidov Azərbaycanın öz ləyaqəti uğrunda mübarizə aparacağını və qalib gələcəyini deyib: "Çünki biz azadlıq, demokratiya haqqında, Avropa Şurasına deyil, bütün dünyaya aid olan dəyərlər haqqında düşünürük. Mən 18 il əvvəl Avropa Şurasına gələndə lap əvvəldən demişdim ki, bu mənim şuramdır. Amma indi düşünürəm ki, yox, bu sizin şuranızdır. Mən belə bir Avropa Şurasında olmaq istəmirəm".
Azərbaycanın məhz bu cür münasibətlərə görə Avropa Şurasından çıxmasının zəruriliyini bir çox ictimai-siyasi xadimlər də səsləndiriblər. Hazırkı məqamda Azərbaycanın Avropa Şurasından çıxması lazımdırmı?
Ekspert Azər Həsrət qəzetimizə açıqlamasında bildirdi ki, Azərbaycan bunu istəməyib: “Ancaq quruma üzv olandan bu tərəfə olan münasibətlər deməyə əsas verir ki, AŞ bizimlə yaxşı partnyorluq etməkdə maraqlı deyil. Onların istəyi budur ki, bizi sözə və ələbaxan etsinlər. Təbii ki, biz bununla razılaşmırıq. Bu səbəbdən də belə ikili standartlarla rastlaşmalı oluruq. Ancaq biz istəməzdik ki, belə yanaşma ortaya çıxsın. Azərbaycan ictimaiyyəti bu cür qərəzli yanaşmadan çox narahatdır. Necə olur ki, Ermənistanda insan haqlarının kobud şəkildə pozulduğu haqda heç nə deyilmir, lakin Azərbaycanda bu cür sabitlik hökm sürə-sürə, belə bir inkişaf gedə-gedə özlərindən nələrisə uydurub üstümüzə gəlirlər?
Avropa Şurasının Parlament Assambleyası Ermənistanda vəziyyətin qarışdığı bir məqamda sanki məqsədli şəkildə Azərbaycanın üzərinə hücuma keçir. Bütün dünyanın gözü qarşısında Ermənistanda qarşıdurmanın baş verdiyi, vətəndaşlara qarşı zor tətbiq edildiyi, hakimiyyətin devrildiyi, xalq ilə hakimiyyət arasında dərin uçurumun mövcud olduğu, ölkənin faktiki olaraq idarəolunmaz hala gəlib çıxdığı bir vaxtda, nədənsə, AŞ PA-da Azərbaycan kimi sabit bir ölkəni müzakirə etmək üstün tutulur. Bu, birmənalı olaraq, qərəzdən, qeyri-obyektiv yanaşmadan, məqsədli şəkildə Azərbaycanı gözdən salmağa çalışmaqdan xəbər verir”.
Azər Həsrət daha sonra bildirdi ki, artıq Azərbaycanın qurumu tərk etməkdən başqa çarəsi qalmır: “AŞ PA-da Azərbaycanla bağlı bu cür tez-tələsik “hesabat” ortaya çıxarıb məhz belə bir məqamda müzakirə etməyin özü bizi ciddi düşündürür. Ona görə ki, Avropa Şurasının Parlament Assambleyası Azərbaycanda keçirilmiş prezident seçkilərinin hələ müzakirələri bitməmiş, belə addım atmaqla, əslində, tələskənliyə yol verir. Ümumiyyətlə, bu məsələnin ajiotaj yaradacaq bir şəkildə ortaya atılması özü düşündürücüdür. Yəni sanki məqsədli şəkildə, bilərəkdən, Azərbaycana qarşı hücum təşkil edilib. Tam əminliklə deyə bilərəm ki, bu “hesabat” anti-Azərbaycan, islamofob və ermənipərəst qrupların qurduğu növbəti oyundur. Azərbaycan Avropa Şurasının üzvüdür, AŞ PA-da fəal iştirak edir. Amma bu məsələ dəfələrlə qaldırılıb ki, lazım olacağı təqdirdə Azərbaycan Avropa Şurası ilə münasibətlərə yenidən baxmaq hüququnu özündə saxlayır. Yəni Avropa Şurasında müəyyən dairələr Azərbaycanın üzərinə belə gəlməyə davam edərlərsə, təbii ki, Azərbaycan bu qurumla münasibətlərinə yenidən baxmaq məcburiyyətində qalacaq. Yəni bizi qurumdan çıxmaq kimi qərar verməyə məcbur edirlər. Azərbaycanın Avropa Şurası qarşısında müəyyən öhdəlikləri var və bu öhdəliklərə də əməl edir. AŞ PA-nın isə “hesabatları” tam qərəzlidir. Həmin “hesabatlar”da belə yazırlar: bizim görüşdüyümüz, ünsiyyətdə olduğumuz adamlar bu cür dedi və s. Yəni, göründüyü kimi, bu “hesabatlar”dakı fikirlər, faktiki olaraq, heç bir mənbəyə əsaslanmır”.
Məhəmmədəli QƏRİBLİ
