Elxan Ələsgərov: “Bakı ilə London arasında nəinki neft-qaz sənayesi sahəsində əməkdaşlıq, həm də siyasi münasibətlər çox yüksək səviyyədədir”
Məlum olduğu kimi, İlham Əliyev prezident seçildikdən sonra ənənəvi olaraq ilk səfərini Türkiyəyə edib. Türkiyə səfərinin ardından isə dövlət başçısı Böyük Britaniyaya gedərək, baş nazir Tereza Mey də daxil olmaqla, orada bir sıra mühüm görüşlər keçirib. Bu həm də onu göstərir ki, Böyük Britaniya da Türkiyə qədər Azərbaycan üçün əhəmiyyət kəsb edir.
London hər zaman Azərbaycanın maraqlarını nəzərə alır. Azərbaycanda prezident seçkisindən dərhal sonra Böyük Britaniyanın baş naziri Tereza Mey İlham Əliyevi Londona dəvət etdi. Azərbaycan Prezidenti Ankaranın ardından Londona getdi. Digər tərəfdən, iqtisadi maraqlar iki ölkənin yaxın əlaqələr qurmasında mühüm rol oynayır. Böyük Britaniyanın BP şirkəti 25 ilə yaxındır Azərbaycana ən çox yatırım həyata keçirən şirkətdir və hələ bir bu qədər müddət də ölkəmizdə fəaliyyət göstərəcək. İlham Əliyevin Londona budəfəki səfəri zamanı Azərbaycan Dövlət Neft Şirkəti ilə BP arasında növbəti saziş imzalandı. Nəzərə almaq lazımdır ki, ötən illər ərzində BP Azərbaycanın enerji sektoruna böyük həcmdə sərmayələr qoyub. İlham Əliyevin Londona səfəri başqa Avropa dövlətlərinin liderlərini də Azərbaycanın dövlət başçısını öz ölkələrində görməyə sövq edəcək. Bütün hallarda, Böyük Britaniyanın Azərbaycan üçün mühüm əhəmiyyət kəsb etdiyi bir daha ortaya çıxır.
Maraqlıdır, bəs ekspertlər bunu necə şərh edirlər? Sözügedən məsələni dəyərləndirən politoloq Elxan Ələsgərovun fikrincə, Prezidentin Türkiyə səfərinin ardınca Böyük Britaniyaya getməsi Azərbaycan xarici siyasətinin istiqaməti, əlaqələrinin səviyyəsi baxımından həm də bir mesaj xarakteri daşıyır. Onun sözlərinə görə, Prezidentin Britaniyaya səfəri təkcə birinci şəxslərlə keçirilən görüşlərlə məhdudlaşmır, həm də işgüzar xarakter daşıyır: “Bakı ilə London arasında mühüm sazişin imzalanması və qarşıda görüləcək işlər hər ölkəyə mənfəət gətirəcək. O üzdən, Prezidentin Böyük Britaniyaya səfəri çox uğurludur. Çünki Azərbaycanla Britaniya arasında nəinki neft-qaz sənayesi sahəsində əməkdaşlıq, həm də siyasi münasibətlər çox yüksək səviyyədədir. Böyük Britaniya, birmənalı olaraq, Azərbaycanın ərazi bütövlüyünü tanıyır, Dağlıq Qarabağla bağlı mövqeyi Azərbaycanın lehinədir. O üzdən, Prezidentin Türkiyə səfərinin ardınca Böyük Britaniyaya getməsi həm də Azərbaycan xarici siyasətinin prioritetlərinin ictimai mesajı sayıla bilər. Böyük Britaniya Azərbaycan iqtisadiyyatına ən çox sərmayə qoyan xarici ölkədir, üstəlik, Britaniya şirkətləri Bakıda çox fəal şəkildə fəaliyyət göstərirlər. Azərbaycanın neft-qaz ixracı prosesində Britaniya böyük rol oynayır və gələcək layihələrdə də bu ölkənin rolu böyük olacaq. Neft-qaz sahəsində texnologiya baxımından inkişaf etmiş bir sıra məsələlər var ki, Britaniya Azərbaycana yardımçı olur. Göründüyü kimi, siyasi, iqtisadi əlaqələrlə yanaşı, iki ölkə arasında hərbi sahədə də müəyyən münasibətlər var. Prezidentin Türkiyə səfərinin ardından Britaniyaya getməsi onu göstərir ki, Azərbaycana dünyada böyük dövlətlərin marağı var. Azərbaycan 2019-cu ildə Qoşulmama Hərəkatına başçılıq edəcək və indidən müəyyən hazırlıqlar görülür. Prezidentin sözügedən səfəri də bu istiqamətdə atılan bir addımdır”.
Vidadi ORDAHALLI
