Qabil Hüseynli: “Bu baxımdan da hesab edirəm ki, Əli Həsənovun təklifi Aİ tərəfindən ciddi nəzərdən keçirilməlidir”
Noyabrın 20-də Belçikanın paytaxtı Brüsseldə Azərbaycanın Diasporla İş üzrə Dövlət Komitəsinin və Avropa Azərbaycanlıları Konqresinin təşkilati dəstəyi ilə “Separatizmin beynəlxalq sülhə və təhlükəsizliyə yaratdığı təhdidlər” mövzusunda beynəlxalq forum işinə başlayıb.
Tədbirdə Azərbaycan Prezidentinin ictimai-siyasi məsələlər üzrə köməkçisi-şöbə müdiri Əli Həsənov, Azərbaycanın Belçikadakı Səfirliyinin nümayəndələri, Diasporla İş üzrə Dövlət Komitəsinin sədri Nazim İbrahimov, Azərbaycanın Avropada fəaliyyət göstərən diaspor təşkilatlarının rəhbərləri, həmçinin, bir çox nüfuzlu beynəlxalq ekspertlər, siyasi xadimlər, sabiq ölkə prezidentləri, baş nazirlər və parlament sədrləri iştirak edirlər.
Ə.Həsənov tədbirdə çıxışı zamanı qeyd edib ki, Azərbaycan yalnız Aİ-nin enerji təminatı və təhlükəsizliyi baxımından, habelə “Qonşuluq siyasəti”nin əsas tərəfdaşlarından biri kimi deyil, həmçinin, dünyanın müxtəlif bölgələrində - Əfqanıstanda, İraqda, Balkanlarda və s. həyata keçirdiyi sülhyaratma proseslərində birbaşa iştirakı, NATO-nun qeyri-hərbi ehtiyatlarla təchizatı, təhlükəsiz hava dəhlizinin təqdim olunması istiqamətində fəaliyyəti ilə Qərbin etibarlı tərəfdaşı hesab olunur: “Hazırda Aİ ilə Azərbaycan arasında yeni saziş üzrə danışıqlar prosesi davam edir. İnanıram ki, bu sənədin imzalanması tərəflər arasında siyasi dialoq, insan hüquqları, ticarət, investisiya, iqtisadi, qanunverici, mədəni və digər sahələrdə genişmiqyaslı əməkdaşlığın möhkəmlənməsi üçün əlverişli imkanlar yaradacaq.
Təəssüf ki, Ermənistan-Azərbaycan, Dağlıq Qarabağ münaqişəsi kimi hələ də həllini tapmamış problemlər Azərbaycanın Aİ ilə yüksək səviyyədə tərəfdaşlıq münasibətlərinin inkişaf etməsinə maneçilik törədir. Münaqişə ilə bağlı BMT-nin, o cümlədən Aİ-nin müvafiq qətnamələrinin tələblərinə baxmayaq, Ermənistan Azərbaycana qarşı işğalçılıq siyasətini davam etdirir. Hesab edirəm ki, Aİ-nin işğalçı dövlətə qarşı sərt mövqedən çıxış etməsi bu qurumla Azərbaycan arasındakı strateji tərəfdaşlıq əlaqələrini möhkəmləndirən növbəti mühüm faktorlardan biri ola bilər”.
Əli Həsənov Ermənistana qarşı Aİ-nin sərt mövqedən çıxış etməsinin zəruriliyini vurğulayanda nəyi nəzərdə tutub?
Politoloq Qabil Hüseynlinin sözlərinə görə, Aİ yalnız Azərbaycanla deyil, eyni zamanda, Ermənistanla da əməkdaşlıq sazişi imzalamaqda maraqlıdır: “Artıq bu sazişin imzalanması ilə bağlı vaxt bitmək üzrədir. Ancaq hesab edirəm ki, həmin sazişdə Aİ istəyir ki, nə Ermənistanın, nə də Azərbaycanın xətrinə dəysin. Ona görə də, məndə olan məlumata əsasən, yekun sənəddə həm ərazi bütövlüyü, həm də xalqların öz müqəddəratını təyin etməsi ilə bağlı bənd yer alacaq. Bu tamamilə Azərbaycanın maraqlarına uyğun deyil. Azərbaycan tərəfi istəyir ki, Aİ konkret olaraq Azərbaycanın ərazi bütövlüyünün pozulduğuna sənəddə dolayısı ilə olsa da işarə etsin. Yəni real mənzərənin təsvirini əks etdirən bir bəndi ora salsın. Hesab edirəm ki, Əli Həsənovun eyhamında da məhz bu məqamlar nəzərdə tutulur. Yəni necə ola bilər ki, Aİ həm işğalçı, həm də işğala məruz qalanla eyni məsafədə qalsın və tərəfdaşlıq etsin? Bu baxımdan da hesab edirəm ki, Əli Həsənovun təklifi Aİ tərəfindən ciddi nəzərdən keçirilməlidir. Doğru olaraq bildirilib ki, buna əməl olunması Azərbaycanla Aİ arasında münasibətləri daha da dərinləşdirə bilər. İnsafən götürəndə də Azərbaycan Aİ-dən qeyri-adi nəsə tələb etmir. Haqqı dəstəkləməsini istəyir”.
Məhəmmədəli QƏRİBLİ
