Aqşin Əliyev: “Qəbul edilən qətnamələrin icrası bizim xeyrimizədir”
Rusiya prezidenti Vladimir Putin Kremldə xarici ölkə səfirlərinin etimadnamələrini qəbul edərkən deyib ki, BMT TŞ qərarlarına əməl edilməsi bütün ölkələr üçün prioritet olmalıdır.
O bildirib ki, BMT Baş Assambleyasının sessiyasında dünya ictimaiyyətinin qarşılaşdığı hədə və təhlükələrin sayının artması barədə həyəcan təbili çalınıb: “Qeyri-sabitlik şəraitində bütün ölkələr beynəlxalq sülhü və təhlükəsizliyi dəstəkləməkdə başlıca məsuliyyət daşıyan BMT Təhlükəsizlik Şurasının qərarlarına hörmət, hüququn aliliyinə riayət etməlidirlər”.
“BMT regional münaqişələrə xüsusi diqqət ayırmalıdır” - deyə Putin bildirib. “BMT regional münaqişələrin həllinə, onların möhkəm, dayanıqlı və uzunmüddətli nizamlanmasının təmin olunmasına xüsusi diqqət ayırmalıdır”, - deyə o vurğulayıb.
“Kataloniyada referendumun keçirilməsi İspaniyanın daxili işidir. Moskva ümid edir ki, İspaniya referendumdan sonra yaranan böhranın öhdəsindən gələcək”. Bunu da Rusiya prezidenti deyib. “Biz İspaniyaya görə çox narahatıq. Lakin bu, əlbəttə ki, İspaniya hökumətinin daxili işidir. Ümid edirik ki, İspaniya böhranın qarşısını almağa nail olacaq”, - deyə o söyləyib.
Qeyd edək ki, V.Putin Kremldə 20 ölkənin yeni səfirlərinin etimadnaməsini qəbul edib. Yeni təyin olunan səfirlər arasında ABŞ səfiri Con Hantsman da var.
Göründüyü kimi, Putin BMT TŞ-nin qəbul etdiyi qətnamələrə hörmətlə yanaşılmasının vacibliyini və prioritet olmasının zəruriliyini vurğulayır. Bu mövqeyin Dağlıq Qarabağla bağlı qəbul edilən qətnamələrin icrasına nə kimi təsiri ola bilər?
Ekspert Aqşin Əliyev qəzetimizə bildirdi ki, Putinin bu mövqeyi həqiqəti əks etdirməklə yanaşı, həm də bizim xeyrimizə işləyir: “Bilirsiniz ki, Rusiya BMT TŞ-nin daimi üzvü olan ölkələrdən biridir. Eyni zamanda, Dağlıq Qarabağ münaqişəsinin nizamlanması ilə bağlı yaradılan Minsk Qrupunun həmsədr ölkəsidir. Bizim üçün bu açıqlamanı maraqlı edən bir çox faktorlar var. Əvvəla BMT TŞ məhz Dağlıq Qarabağla bağlı 4 qətnamə qəbul edib ki, onlar da icra olunmayıb. İkinci bir tərəfdən isə, Azərbaycanın uzun illərdən bəri BMT qətnamələrinin icra edilməsinin zəruri olması ilə bağlı apardığı mübarizəyə artıq səs verənlər tapılıb. Özü də belə mövqeyi Rusiya prezidentinin sərgiləməsi mövzunun effektini daha da artırmış olur. Gəlin məsələnin başqa bir aspektinə də diqqət edək. Məlumdur ki, BMT-nin Baş Assambleyasının 72-ci sessiyasında çıxışı zamanı İlham Əliyev məhz bu mətləbə toxunub. Cənab Prezident BMT tribunasından dedi ki, həmin qurumun qəbul etdiyi qətnamələrin icrasına nəzarət mexanizmi yaradılmalıdır. Məsələnin məhz bu aspektində olan çatışmazlıqları İlham Əliyevdən dolğun və kəskin tənqid edən olmadı. Rusiya prezidentinin sərgilədiyi mövqeyi də məhz həmin tələbə uyğun saya bilərik. İstənilən halda, bunun Dağlıq Qarabağ münaqişəsinin həllinə köməyi var. Çünki qəbul edilən qətnamələrin icrası bizim xeyrimizədir”.
Məhəmmədəli QƏRİBLİ
