Yeganə Hacıyeva: “Bütün bunlar sözügedən personanın ölkəmizə qarşı apardığı kampaniyanın sırf qərəzdən ibarət olduğuna dair heç bir şübhə yeri qoymur”
Ermənistan mətbuatı Avropa Şurasının insan haqları üzrə komissarı Nils Muyjnieksin Azərbaycan barədə yağdırdığı hədyan fikirlərə geniş yer ayırıb. Komissar yenə öz ampluasına sadiq qalaraq iddia edib ki, guya Azərbaycanda insan haqları ilə bağlı vəziyyət qənaətbəxş deyil və buna görə bizim ölkəni cəzalandırmaq lazımdır.
Əslində, Muyjnieksin bu açıqlamasında bizim üçün təəccüblü nəsə yoxdur. Çünki məlum persona çoxdandır ki, erməni təbliğatçısı kimi “Mister X” adı ilə ifşa olunub.
Bir müddət əvvəl Avropa Strateji Kəşfiyyat və Təhlükəsizlik Mərkəzi (ESISC) Avropa Şurası Parlament Assambleyasında (AŞ PA) Soros Fondunun maliyyələşdirdiyi deputatlar, erməni məmurlar və QHT-lərdən ibarət "gizli şəbəkə"ni ifşa edən məruzənin ikinci hissəsini dərc edib.
AŞ PA-da gizli şəkildə çalışan erməni şəbəkəsinə həsr olunmuş sənəddə məruzənin müəllifləri şəbəkənin əsas fiquru olan "Cənab X"ın kimliyini açıqlayıblar. "Cənab X" 5 ildir ki Avropa Şurasının insan haqları üzrə komissarı və Sorosun əməkdaşı, latviyalı Nils Muyjnieksdir.
Məruzədə bildirilir ki, 2012-ci ildə AŞ PA-ya seçilən N.Muyjnieks Soros Fondu ilə birbaşa əlaqəsi olan və həmin fond tərəfindən maliyyələşdirilən Avropa ölkələrinin baş nazirlərini, Ermənistanın rəsmi şəxslərini və QHT-ləri birləşdirən, Ermənistanın maraqlarına xidmət edən şəbəkənin əsas fiquru olub: "Avropa Şurasındakı mövqeyi sayəsində Soros Fondu "Human Rights Watch", Avropa Stabillik Təşəbbüsü (ESI), "Amnesty İnternational", “İnsan Haqları Evi”, hətta "Açıq dialoq" kimi tanınmış QHT-lərdə mühüm rol oynayıb". Qeyd olunub ki, bu intensiv fəaliyyət erməni lobbisinin siyasi mövqeyini Avropa Şurasına, həmçinin, Avropa Parlamentinə "sırımağı" qarşısına məqsəd qoyub və bu fəaliyyətə daha çox şəxsin qatılmasına çalışır: "Şəbəkə xüsusən Şimal və Baltik ölkələrini, Niderland və alman sosialistlərini təmsil edən baş nazirlərin "ovunda" fəallıq göstərir".
Hesabatda N.Muyjnieksin AŞ komissarı olduğu son 5 il ərzində Soros Fondu ilə əlaqəsi olan QHT-lərin eyni vaxtda və paralel olaraq AŞ PA-nın plenar iclaslarında bir neçə tədbir təşkil edərək tanındığı qeyd olunan cədvəl göstərilib.
Belə xislətdə olan birisinin Azərbaycan haqda işlətdiyi fikirləri nə dərəcədə obyektiv saymaq olar?
Politoloq Yeganə Hacıyeva qəzetimizə açıqlamasında bildirdi ki, Avropa Birliyi ilə Azərbaycan arasında strateji tərəfdaşlıq sazişinin detallarının işləndiyi və Azərbaycanın təşəbbüsçüsü olduğu və Avropa enerji təchizatı istiqamətində həyata keçirdiyi qlobal energetik layihələr barədə tərəfdaşları ilə müzakirələr apardığı bir zamanda ölkəmizə qarşı aparılan qarayaxma kampaniyasının yeni dalğası ilə üz-üzəyik: “Aparılan bu kampaniyalar bir neçə istiqamət üzrə, qlobal iqtisadi layihələrdə rəqib cəbhəyə xidmət edən müəyyən siyasi-iqtisadi lobbi qruplarının sifarişlərini həyata keçirən siyasilər, sözdə insan haqları təşkilatları və əlbəttə ki, erməni lobbisinə bağlı dairələr tərəfindən həyata keçirilir. Azərbaycana qarşı aparılan kampaniyalarda insan haqları, demokratiya və korrupsiya mövzuları istifadə olunur. Bu kampaniyaların icraçıları isə zamanında Avropa qurumlarında vəzifə tutmuş şəxslərdir. Bunlardan biri kimi Azərbaycana qarşı çirkli fəaliyyəti özünə peşə etmiş, az qala hər çıxışında Azərbaycanı tənqid edən, sırf bu istiqamət üzrə "ixtisaslaşmış" Avropa Şurasının insan haqları üzrə komissarı N.Myujnieysk kimi xadimləri nümunə göstərə bilərik.
Avropa Şurasının insan haqları üzrə komissarı kimi fəaliyyəti dövründə əməkdaşlıq etdiyi 47 üzv ölkədən sırf Azərbaycana hədəflənmiş biri kimi N.Myujnieyskin erməni lobbi və siyasi dairələrinə yaxınlığı beynəlxalq hesabatlarda belə öz əksini tapıb. Avropa Şurası insan haqları üzrə komissari kimi Nils əməkdaşlıq etdiyi 47 üzv ölkədən təkcə Azərbaycana qarşı Avropa İnsan Haqları Məhkəməsinə 7 dəfə çağırış edib, özünün tərtib etdiyi "siyasi məhbus siyahısının" layihəsinın lobbiçiliyi ilə isə Avropa Şurasında ölkəmizə qarşı sanksiya və təcridolunma siyasəti yürüdülməsinə nail olmağa çalışıb. Onun bu siyahısı Azərbaycandaxili hər hansı bir insan haqları qurupu tərəfindən dəstəklənməməsi üzündən iflasa uğramış, Avropa Şurasında Nilsin anti-Azərbaycan fəaliyyətinin obyektivliyi şübhəsi ilə layihəsi ləğv olunmuş, onun nəticəsində isə Avropa Şurası ilə Azərbaycan arasında əməkdaşlıq fundamental olaraq zərər görməyib.
Bütün bunlar sözügedən personanın ölkəmizə qarşı apardığı kampaniyanın sırf qərəzdən ibarət olduğuna dair heç bir şübhə yeri qoymur”.
Məhəmmədəli QƏRİBLİ
