Aqşin Əliyev: “Bizim ordularımız arasında da sıx əlaqə mövcuddur”
Azərbaycan Prezidenti İlham Əliyev Türkiyə Respublikasının milli müdafiə naziri Nurəddin Caniklinin başçılıq etdiyi nümayəndə heyətini qəbul edib. Dövlət başçısı N.Caniklini Türkiyə milli müdafiə naziri kimi yüksək vəzifəyə təyin olunması münasibətilə təbrik edib və ona fəaliyyətində uğurlar arzulayıb.
Prezident İlham Əliyev, eyni zamanda, N.Caniklinin yeni vəzifəyə təyin olunduqdan sonra qısa müddət ərzində Azərbaycana səfərə gəlməsindən məmnunluğunu ifadə edərək bildirib ki, ölkələrimiz qardaş ölkələrdir və ona görə də Azərbaycan və Türkiyə nazirləri ilk səfərlərini qardaş ölkələrə edirlər. Ölkələrimiz arasında bütün sahələrdə, o cümlədən hərbi-texniki sahədə çox yaxşı əməkdaşlığın və işbirliyinin mövcud olduğunu vurğulayan Prezident İlham Əliyev hərbi-texniki sahədə birgə fəaliyyətin geniş olduğunu deyib.
Dövlət başçısı qeyd edib ki, hərbi texnikanın Türkiyədən alınması bizim gücümüzü daha da artırır. Həm Azərbaycanda, həm də Türkiyədə tez-tez birgə hərbi təlimlərin keçirilməsini yüksək qiymətləndirən Prezident İlham Əliyev bildirib ki, bu, Türkiyə-Azərbaycan birliyini daha da gücləndirir və bölgədə sülhün və sabitliyin möhkəmləndirilməsi işinə xidmət edir.
N.Canikli isə Azərbaycanla Türkiyənin qardaş ölkələr olduğunu və əlaqələrimizin bütün sahələrdə uğurla inkişaf etdiyini vurğulayaraq bildirib ki, məqsədimiz bu əməkdaşlıq əlaqələrini daha da genişləndirmək və möhkəmləndirməkdir. N.Canikli Türkiyənin FETÖ ilə mübarizəsinə ölkəmizin verdiyi dəstəyə görə minnətdarlığını bildirib.
Prezident İlham Əliyev bu yaxınlarda Türkiyə prezidenti Rəcəb Tayyib Ərdoğanla Nyu-Yorkdakı görüşünü məmnunluqla xatırlayıb.
Prezident Türkiyə müdafiə nazirini qəbul edərkən Türkiyədən alınan silahlara böyük önəm verdiyimizi qeyd edib. Prezidentin belə bir qənaətə gəlməsinin səbəbi nə ilə bağlı ola bilər?
Ekspert Aqşin Əliyevin sözlərinə görə, Azərbaycanın Türkiyə ilə münasibətləri, bütün sahələrdə olduğu kimi, hərbi sahədə də yüksək səviyyədədir: “Etibarlı tərəfdaş kimi, təbii ki, Azərbaycanın Türkiyədən silah alması daha güvənli və sərfəlidir. Bizim ordularımız arasında da sıx kommunikasiya mövcuddur. Tez-tez birgə hərbi təlimlər keçiririk.
Türkiyənin BMT Adi Silahlar Registrinə təqdim etdiyi silah ixracına dair ötənilki illik hesabatda əsas yeri zirehli nəqliyyat vasitələri tutub. Hesabat dövründə Türkiyə 268 ədəd zirehli maşın ixracını reallaşdırıb. Hesabat dövründə Bəhreynə 37, Küveytə 40, Mavritaniyaya 6 ədəd, Monteneqroya 1 ədəd modeli açıqlanmayan zirehli personal daşıyıcı, Tunisə 142 ədəd zirehli maşın (o cümlədən, 14 ədədi ambulans konfiqurasiyası olmaqla 71 ədəd 4×4 “Kirpi” MRAP), Türkmənistana 62 ədəd (28 ədəd “Kirpi” MRAP, 34 ədəd açıqlanmayan model personal daşıyıcı) satıb.
Bundan başqa, rəsmi Ankara 2016-cı ildə Azərbaycana 146 ədəd artilleriya sistemi, 72 ədəd uzaqmənzilli artilleriya raketi satdığını açıqlayıb. Rəsmi hesabatlardan da görünür ki, Türkiyə ilə Azərbaycan arasında bu sahədə ciddi işbirliyi var. Əminik ki, bu il ərzində göstəricilər daha da artıb. Hətta bizim rəsmilərin verdiyi açıqlamalardan məlum olur ki, qardaş ölkə ilə bizim birgə silah istehsal etməklə də bağlı işlərimizdə xeyli irəliləyiş var”.
Məhəmmədəli QƏRİBLİ
