Aydın Mirzəzadə: “Azərbaycana diktə etmək kimi səlahiyyətləri heç kim ona verməyib” Qabil Hüseynli: “Avropa Şurasının ermənipərəst mövqe tutmasına heç kimin şübhəsi yoxdur”
Avropa Şurasının baş katibi Torbyorn Yaqlandın Azərbaycan məhkəməsinin qərarına əsasən məhkum olunmuş "REAL" təşkilatının rəhbəri İlqar Məmmədov azadlığa buraxılmadığına görə Azərbaycanın qurumdan kənarlaşdırılmaq ehtimalının olduğunu dilə gətirməsi ölkə ictimaiyyətinin hiddətinə səbəb olub.
Əslində, təkcə Avropa Şurası deyil, eləcə də bir sıra beynəlxalq təşkilatlar tərəfindən analoji bəyanatların veriləcəyi gözlənilən idi. Azərbaycanın beynəlxalq nüfuzunun artması, beynəlxalq reytinq cədvəlində irəliləyərək inkişaf etmiş ölkələri belə geridə qoyması, ən əsası isə, qarşıdan gələn prezident seçkiləri bu tip addımların atılma ehtimalını artırırdı. Müəyyən təhlillər göstərir ki, Yaqlandın Azərbaycana qarşı bu kampaniyanı aparmasında bizimlə qonşu olan bəzi ölkələrin də əli var. Çünki çox ciddi əsaslar olduğu halda, o, bu sərt mövqeyini ruslara qarşı nümayiş etdirmir. Vaxtaşırı Rusiyaya səfər edən bu şəxsin, əslində, ruslara işləməsi barədə məlumatlar da səslənir. Ümumiyyətlə, o, Rusiya barəsində daim yüksək fikirdə olduğunu, Avropanın Rusiya ilə əlaqələrini davamlı olaraq genişləndirməli olduğunun vaciblyini önə çəkir. Burada bəzi konkret nümunələrə diqqət etmək yerinə düşərdi. Hələ 2016-cı ilin dekabrında Moskvaya səfəri zamanı baş katib Rusiya prezidenti Vladimir Putinə bildirmişdi ki, Rusiya və Avropa Şurası arasında əməkdaşlıq fundamental şəkildə zədələnməyib. Bir müddət öncə Fransa prezidenti Emmanuil Makronla görüşdə isə Yaqland bildirib ki, Rusiyanı Avropa Şurasının tamhüquqlu üzvü kimi görmək istəyir. O, fikirlərini belə əsaslandırıb ki, 140 milyon insanı İnsan Haqları üzrə Avropa Məhkəməsinin yurisdiksiyasından kənarda saxlamaq düzgün deyil. Belə çıxır ki, Yaqland Avropa Şurasının üzvü Ukraynanın ərazisini ilhaq edən və digər ərazilərində də münaqişə ocağı yaradan Rusiyanı qurumda tamhüquqlu üzvlüyə qaytarmaq istəyir, amma bir nəfərə görə Azərbaycanın Avropa Şurasından çıxarılmasını sanksiyalaşdırmağa çalışır və bununla 10 milyon insanı Avropa Məhkəməsində öz hüquqlarını müdafiə etməkdən məhrum etməyə cəhd göstərir. Yaqlandın Rusiyanın sifarişi ilə Azərbaycana qarşı belə kampaniya aparması daha çox hansı hədəflərə hesablanıb?
Millət vəkili Aydın Mirzəzadənin sözlərinə görə, bu heç də İlqar Məmmədov məsələsi deyil: “Bu, Azərbaycanın müstəqil xarici, daxili siyasət yürütməsinə qarşı Avropanın müəyyən dairələrinin reaksiyasıdır”. Onun sözlərinə görə, bir müddət əvvəl Azərbaycan “Azəri-Günəşli-Çıraq”la bağlı yeni müqavilə bağladı və SOCAR-ın orada payı 11%-dən 25%-ə qalxdı. Azərbaycan bu gün öz valyuta ehtiyatlarından müstəqil surətdə istifadə edir. Bu, Avropanın müəyyən dairələrini narahat edir və iqtisadi maraqlarına toxunur. Ermənistanı müdafiə edən müəyyən dairələr Azərbaycanı Ermənistana ərazilərini güzəştə getməməsinə görə cəzalandırmağa çalışırlar. Digər tərəfdən, Avropa Məhkəməsi qərar qəbul edib, bu, Avropa Məhkəməsi ilə Azərbaycan arasında olan münasibətdir. Yaqland beynəlxalq təşkilatın bir çinovnikidir. Onun vəzifəsi təşkilatın işlərini aparmaqdır. Azərbaycanın üzərində prokurur nəzarəti həyata keçirmək, Azərbaycana diktə etmək kimi səlahiyyətləri heç kim ona verməyib. Ona görə də hesab edirəm ki, belə bəyanatlar Azərbaycanla Avropa Şurası arasında soyuq münasibətlərə səbəb ola bilər. Bunun da məsuliyyətini, ilk növbədə, Yaqland çəkəcək”.
Politoloq Qabil Hüseynlinin sözlərinə görə, Avropa Şurasının ermənipərəst mövqe tutmasına heç kimin şübhəsi yoxdur. Bu baxımdan da qurum heç zaman Azərbaycan torpaqlarının 20 faizini işğal edən Ermənistana qarşı bir kəlmə söz demir. Son illər AŞPA-da islamofob meyllərinin qalib gəldiyini deyən politoloqun sözlərinə görə, artıq bu qurum müsəlman ölkələrinə qarşı ikili standartlar siyasəti yürüdən bir təşkilata çevrilib: “Bildiyiniz kimi, Avropa Şurası bura üzv dövlətlərin qanunvericiliyinin bir-birinə yaxınlaşdırılması üçün yaradılıb. 2001-ci ildən Azərbaycan da bu quruma üzv olub. Avropa Şurasına üzv olduğumuz ötən müddət ərzində Qərbə inteqrasiya siyasəti yürüdən Azərbaycan yalnız davamlı təzyiqlər, daxili işlərinə kobud müdaxilə, ikili standartlar, qarayaxma və ləkələmə kampaniyası ilə üzləşib”. Q.Hüseynlinin sözlərinə görə, Avropa Şurasının da kifayət qədər nöqsanları var: “Ermənilər Avropada meydan sulayur, at oynadırlar. Avropa Şurasının Azərbaycan və Türkiyəyə qarşı sərt mövqe tutmasının arxasında da ermənilərin xüsusi rolu var”.
Məhəmmədəli QƏRİBLİ
