Vəfa Heydərli: “Proseslərin gedişi göstərir ki, Tramp administrasiyası Azərbaycanı öz yaxın tərəfdaşı kimi qəbul edir və bu siyasəti davam etdirməkdə maraqlıdır”
Ermənistan mətbuatı yazır ki, ABŞ-ın Miçiqan ştatı qondarma “Dağlıq Qarabağ Respublikası”nın “müstəqilliyi”ni tanıyıb. Məlum olduğu kimi, ABŞ-dakı ştatlar belə addımları həmin ölkədə yaşayan erməni lobbisinin sifarişi əsasında atır. Ermənilərin ABŞ-dakı bu çabaları nəyə hesablana bilər?
Politoloq Vəfa Heydərli qəzetimizə bildirdi ki, ilk növbədə, Ermənistan mətbuatının yaydığı məlumatın doğruluğu yoxlanmalıdır. Çünki onlar bu tip mövzularda çoxlu sayda dezinformasiyalar yayıblar. Qondarma “DQR”in “müstəqilliyi”ni tanımağa gəldikdə isə, ermənilər bu sarıdan heç bir nəticə əldə edə bilmir. Dünyanın heç bir ölkəsi onu tanımır. Hətta Ermənistanın özünün belə həmin separatçı qurumun “müstəqilliyi”ni tanımağa cürəti çatmır. Bunu ölkələrlə bağlı edə bilməyəndə isə daha asan varianta əl atırlar. Erməni lobbisinin təsir imkanları güclü olan ABŞ müxtəlif ştatlarında istədikləri məsələni gündəmə çıxarırlar. Bilirsiniz ki, ayrı-ayrı ştatların qəbul etdiyi qərarlar həmin ölkənin rəsmi mövqeyi sayılmır. Həmin qərarların ermənilər üçün də müstəsna əhəmiyyəti yoxdur. Ancaq onların belə addımları məhz bu məqamda atması da təsadüfi deyil. Ermənilər Tramp administrasiyası ilə Azərbaycan hökumətinin yaxşılaşmaqda olan münasibətlərini əngəlləmək üçün belə mənasız gedişlər edirlər. Tramp hakimiyyətə gələndən sonra erməni lobbisinə qarşı sərt addımlar atdı. Onların ABŞ-dakı mövqeyi, təsir imkanları get-gedə zəifləyir. Düşünmürəm ki, ermənilərin təsiri altına düşən bəzi ştatların verdikləri ədalətsiz qərarlar ABŞ-Azərbaycan münasibətlərindəki müsbət dinamikaya təsir edə bilsin. Proseslərin gedişi göstərir ki, Tramp administrasiyası Azərbaycanı öz yaxın tərəfdaşı kimi qəbul edir və bu siyasəti davam etdirməkdə maraqlıdır”.
Məsələyə XİN-in Mətbuat xidmətinin rəhbəri Hikmət Hacıyev də münasibət bildirib. O qeyd edib ki, ABŞ-ın bu mövqeyi bir daha 22 sentyabr tarixində BMT Baş Assambleyasının 72-ci sessiyası çərçivəsində GUAM Xarici İşlər Nazirləri Şurası və ABŞ arasında keçirilmiş görüşdə qəbul edilmiş yekun bəyanatda öz təsdiqini tapıb: “Bəyanatda ABŞ-ın Helsinki Yekun Aktına uyğun olaraq, GUAM-a üzv dövlətlərin suverenliyi və ərazi bütövlüyünə sadiqliyi bir daha bəyan edilir. Həmçinin, GUAM-a üzv dövlətlərin məruz qaldığı gücdən istifadə təhdidinə münasibətdə narahatlıq ifadə olunur. Ermənistan-Azərbaycan, Dağlıq Qarabağ münaqişəsinin ATƏT-in Minsk Qrupun həmsədrlərinin vasitəçiliyi ilə substantiv danışıqlar yolu ilə həllinə və regionda davamlı sülhün təmin olunmasına töhfə vermək əvəzinə Ermənistan və ABŞ-dakı erməni lobbisi və onun təsiri altında olan bəzi şəxslər özlərini gülünc vəziyyətinə qoyan bu kimi lüzumsuz fəaliyyətlə məşğul olurlar”.
Məhəmmədəli QƏRİBLİ
